ଅର୍ଗସ ବ୍ୟୁରୋ : ନିର୍ବାଚନ ତାରିଖ ଘୋଷଣା ପାଇଁ କାଉନ ଡାଉନ ଆରମ୍ଭ । ଯେ କୌଣସି ମୁହୂର୍ତ୍ତରେ ବାଜିପାରେ ନିର୍ବାଚନୀ ବିଗୁଲ । ଲାଗୁ ହେବ ହୋଇପାରେ ଆଦର୍ଶ ଆଚରଣ ବିଧି । ଯାହାକୁ ଦୃଷ୍ଟିରେ ଓଡ଼ିଶାରେ ନିର୍ବାଚନ ପ୍ରସ୍ତୁତିର ସମୀକ୍ଷା କରୁଛନ୍ତି ଜାତୀୟ ନିର୍ବାଚନ ଆୟୋଗ ଏବଂ ତାଙ୍କ ଟିମ । ଭୋଟର ତାଲିକା, EVM ସ୍ଥିତି, ଜିଲ୍ଲା ସ୍ତରରେ ପ୍ରସ୍ତୁତି, ସମ୍ବେଦନଶୀଳ ବୁଥ ଭଳି ପ୍ରସଙ୍ଗରେ ସମୀକ୍ଷା କରୁଛନ୍ତି ଜାତୀୟ ନିର୍ବାଚନ ଆୟୋଗ । ପ୍ରଥମ ଦିନରେ ଆଜି ପୃଥକ ପୃଥକ ଦୁଇଟି ବୈଠକ କରାଯାଇଛି । ପ୍ରଥମ ବୈଠକରେ ରାଜ୍ୟର ସମସ୍ତ ରାଜନୈତିକ ଦଳ ମାନଙ୍କ ସହ ଆଲୋଚନା କରିଥିଲେ ନିର୍ବାଚନ କମିଶନ । ପରେ ସମସ୍ତ ଜିଲାପାଳ ଏବଂ ଏସପି ଙ୍କ ସହ ଦୀର୍ଘ ସମୟ ଧରି କରିଥିଲେ ଆଲୋଚନା । 

ରାଜନୈତିକ ଦଳ ମାନେ ମଧ୍ୟ ନିର୍ବାଚନ କମିଶନଙ୍କ ନିକଟରେ ଅନେକ ଆପତ୍ତି ଅଭିଯୋଗ ରଖିଛନ୍ତି।  ନିର୍ବାଚନ ସମୟରେ ବିଜେଡିର କଳାଟଙ୍କା, ଗୁଣ୍ଡାରାଜ ଓ ପ୍ରଶାସନିକ କଳର ଅପବ୍ୟବହାର ବନ୍ଦ କରିବା ପାଇଁ ଦାବି କରିଛନ୍ତି ବିରୋଧୀ । ବିଜେପିର ଦାବି ଗୁଡ଼ିକ ରହିଛି, ଆମ ଓଡ଼ିଶା ନବୀନ ଓଡ଼ିଶା” ଲୋଗରେ ବିଜୁ ଜନତା ଦଳର ନିର୍ବାଚନ ଚିହ୍ନ ‘ଶଙ୍ଖ ଚିହ୍ନ’ର ବ୍ୟବହାର ଉପରେ ରୋକ ଲଗାଯାଉ । ଶାସକ ଦଳ ଦ୍ବାରା ସୃଷ୍ଟି ନିର୍ବାଚନୀ ହିଂସା ରୋକିବାକୁ ବ୍ୟାପକ ପରିମାଣରେ କେନ୍ଦ୍ରୀୟ ସୁରକ୍ଷା ବାହିନୀ ମୁତୟନ କରାଯାଉ । ନିର୍ବାଚନ ସମୟରେ ଷ୍ଟ୍ରଙ୍ଗ ରୁମ୍ ପରିସର ଓ ଭୋଟ କେନ୍ଦ୍ରରେ ୨୪ ଘଂଟିଆ ସିସିଟିଭି କ୍ୟାମେରା, ଭିଡିଓ ଗ୍ରାଫି ଓ ପର୍ଯ୍ୟାପ୍ତ ପରିମାଣରେ କେନ୍ଦ୍ରୀୟ ସୁରକ୍ଷା ବଳୟ ମୁତୟନ କରାଯାଉ ।

ସେହିଭଳି କଂଗ୍ରେସର ମଧ୍ୟ ଦାବି ରହିଛି, ନିର୍ବାଚନକୁ ଅବାଧ ଓ ମୁକ୍ତ କରିବା ପାଇଁ କଳା ଟଙ୍କା ଉପରେ ରୋକ ଲଗାଯାଉ । ଇଲେକ୍ଟରୋରାଲ ବଣ୍ଡ ଉପରେ ସୁପ୍ରିମକୋର୍ଟଙ୍କ ନିର୍ଦ୍ଦେଶ କୁ କଡାକଡି ପାଳନ କରାଯାଉ । ଉଦ୍ଦେଶ୍ୟ ମୂଳକ ଭାବେ ତାଲିକାରୁ ଭୋଟରଙ୍କ ନାଁ କଟାଯାଉଛି ତାକୁ ରୋକିବା ଦିଗରେ ପଦକ୍ଷେପ ନିଆଯାଉ ।

ଅଧିକ ପଢନ୍ତୁ ଓଡ଼ିଶା ଖବର

ସେହିପରି ବିଜେଡି ବି ନିର୍ବାଚନ ସମୟରେ ସରକାରୀ ଦଳକୁ ଶୁଣିବାକୁ ପର୍ଯ୍ୟାପ୍ତ ସମୟ ଦିଆଯାଉ ବୋଲି ଦାବି କରିଛି । ଆସନ୍ତା କାଲି ଜାତୀୟ ନିର୍ବାଚନ ଆୟୋଗ ରାଜ୍ୟର ମୁଖ୍ୟ ଶାସନ ସଚିବ, ଉନ୍ନୟନ କମିଶନର, ମୁଖ୍ୟ ନିର୍ବାଚନ ଅଧିକାରୀ ଓ ପୋଲିସ ଡ଼ିଜି ଙ୍କ ଭଳି ଉଚ୍ଚ ପଦସ୍ଥ ଅଧିକାରୀଙ୍କ ସହ ଆଲୋଚନା କରି ଅପରାହ୍ନରେ ସାମ୍ବାଦିକ ସମ୍ମିଳନୀ କରିବେ ।