ଅର୍ଗସ ବ୍ୟୁରୋ : ଶାସକ ଦଳରେ ଅସମ୍ଭାଳ ଗୋଷ୍ଠୀ କନ୍ଦଳ । ଗାଁରୁ ନେଇ ସହର ସବୁଠି ଆଶାୟୀ ମାଳ ମାଳ । ଅଧିକାଂଶ ଆସନରେ ବିଜେଡି ବିଧାୟକଙ୍କ ବିରୋଧରେ ମେଳି । ନିଜ ଦଳର ନେତାଙ୍କ ବିରୋଧରେ ବିଜେଡି ନେତାଙ୍କ ରଣହୁଙ୍କାର । ନିଆଳିରେ ମୋଟର ସାଇକେଲ ରାଲି । ନିଜ ଦଳର ବିଧାୟକଙ୍କ ବିରୋଧରେ ଶକ୍ତି ପ୍ରଦର୍ଶନ କଲେ ବିଜେଡି ଟିକେଟ୍ ଆଶାୟୀ ତୃପ୍ତିରଞ୍ଜନ ବେହେରା । ବିଜେଡି ବିଧାୟକ ପ୍ରମୋଦ ମଲ୍ଲିକଙ୍କୁ ଲଗାତାର ଟାର୍ଗେଟ୍ କରିଆସୁଛନ୍ତି ତୃପ୍ତି ଓ ତାଙ୍କ ସମର୍ଥକ । 

ଟିକେଟ କଳିରେ ଭୁବନେଶ୍ବରରେ ନବୀନ ନିବାସ ଆଗରେ ମାରପିଟ ଲାଗିଥିଲେ ପ୍ରମୋଦ ଓ ତୃପ୍ତିଙ୍କ ଗୋଷ୍ଠୀ । ପ୍ରମୋଦ ଟିକେଟ ପାଇ ଜିତିଥିଲେ ବି ତାଙ୍କ ବିରୋଧରେ ଥିବା ଦଳୀୟ ଅସନ୍ତୋଷର ନିଆଁ ସେମିତି ଜଳୁଛି । ନିଆଳିରେ ଦୀର୍ଘ ୧୫ ବର୍ଷ ହେଲା ପ୍ରମୋଦ ମଲ୍ଲିକଙ୍କ କୁଶାସନରେ ଅସ୍ତବ୍ୟସ୍ତ ନିଆଳିବାସୀ । ଖୋଦ ବିଜେଡି କର୍ମୀ ମାନେ ନିଆଳିରେ ଶୀତଳଭଣ୍ଡାର, ହାଟ, ଶୌଚାଳୟ, କୃଷକ ମାନଙ୍କ ପ୍ରସଙ୍ଗ ନେଇ ବିଧାୟକଙ୍କୁ କରିଛନ୍ତି ସିଧା ସିଧା ଟାର୍ଗେଟ । ଏବଂ ମୁଖ୍ୟମନ୍ତ୍ରୀଙ୍କୁ ଯୁବ ଚେହେରା ତୃପ୍ତିଙ୍କୁ ଟିକେଟ ଦେବା ପାଇଁ ଦାବି କରିଛନ୍ତି ।

ଅଧିକ ପଢନ୍ତୁ ଓଡ଼ିଶା ଖବର

ବିଜେଡି ଯୁବ ନେତା ଚଶାପୁଆ ତୃପ୍ତି ରଞ୍ଜନ ବେହେରା ଙ୍କ ନେତୃତ୍ୱରେ ନିଆଳି ବ୍ଲକରୁ ବିରାଟ ବାଇକ୍ ଶୋଭାଯାତ୍ରା ବାହାରି ବିଜୁ ପଟ୍ଟନାୟକ ଙ୍କ ପ୍ରତିମୂର୍ତ୍ତି ରେ ମାଲ୍ୟାର୍ପଣ ପ୍ରଦାନ କରି କଣ୍ଟାପଡ଼ା ବ୍ଲକରେ ପହଞ୍ଚିଥିଲା । ଏବଂ ଶୁଭେଚ୍ଛୁ ମାନେ ବିଭିନ୍ନ ସ୍ଥାନରେ ତୃପ୍ତିଙ୍କୁ ସମର୍ଥନ ଜଣାଇଥିବା ଦେଖିବାକୁ ମିଳିଥିଲା । ନିର୍ବାଚନ ଯେତେ ପାଖେଇ ଆସୁଛି ଟିକେଟ ଆଶାୟୀଙ୍କ ମଧ୍ୟରେ ପ୍ରତିଯୋଗିତା ବଢି ଚାଲିଛି । ତେବେ ଦେଖିବାକୁ ବାକି ରହିଲା ନିଆଳି ବିଜେଡି ଟିକେଟ କାହାକୁ ମିଳୁଛି ।