BMC Expansion / ବଢ଼ିବ ରାଜଧାନୀର ପରିସୀମା, BMCରେ ମିଶିବ ଉପକଣ୍ଠର ୪୬ ଗାଁ

୨୦୨୭ ପୌର ନିର୍ବାଚନ ପୂର୍ବରୁ ବଢ଼ିବ ଭୁବନେଶ୍ବର ମହାନଗର ନିଗମର ପରିସୀମା । ଭୁବନେଶ୍ବର ଉପକଣ୍ଠର ୪୬ଟି ଗାଁ ମିଶାଇବାକୁ ରାଜ୍ୟ ସରକାରଙ୍କ ନିକଟକୁ ଗଲା ପ୍ରସ୍ତାବ । ଯାହାଫଳରେ ଆଗକୁ ରାଜଧାନୀର ଓ୍ବାର୍ଡ ସଂଖ୍ୟା ବୃଦ୍ଧି ପାଇବ ।

୨୦୨୭ ପୌର ନିର୍ବାଚନ ପୂର୍ବରୁ ଆହୁରି ବୃହତ୍ ଓ ସବଳ ହେବାକୁ ଯାଉଛି ଭୁବନେଶ୍ୱର ମହାନଗର ନିଗମ । ବଢ଼ିବାକୁ ଯାଉଛି ରାଜଧାନୀର ଭୌଗୋଳିକ ସୀମାରେଖା ଏବଂ ଏହା ସହ ବୃଦ୍ଧି ପାଇବ ୱାର୍ଡ ସଂଖ୍ୟା । ସହରର ଆଖପାଖ ଉପକଣ୍ଠ ଅଞ୍ଚଳର ୪୬ଟି ଗାଁକୁ ବିଏମସି ଅଧୀନକୁ ଆଣିବା ପାଇଁ ପ୍ରସ୍ତାବ ଦିଆଯାଇଛି । ପୂର୍ବରୁ ୨୬ଟି ଗାଁକୁ ସାମିଲ କରିବା ପାଇଁ ସୁପାରିଶ ହୋଇଥିବା ବେଳେ, ଏବେ ପୁଣି ନୂଆ କରି ୨୦ଟି ଗାଁ ପାଇଁ ପ୍ରସ୍ତାବ ଯାଇଛି । ବିଶେଷ କରି ଇଟିପୁର, ଧଉଳି, ଜଟଣୀର ପ୍ରଧାନସାହି ଓ ଟିକରପଡ଼ା ଭଳି ୪ଟି ମୁଖ୍ୟ ପଞ୍ଚାୟତକୁ ସାମିଲ କରିବାକୁ ସୁପାରିଶ କରାଯାଇଛି ।

ଅଧିକ ପଢ଼ନ୍ତୁ: ବନ୍ୟା ପୀଡ଼ିତଙ୍କ ପାଇଁ ମୁଖ୍ୟମନ୍ତ୍ରୀଙ୍କ ବଡ଼ ଘୋଷଣା…୧୦୦୦ କୋଟିର ସ୍ୱତନ୍ତ୍ର ପ୍ୟାକେଜ…

ପ୍ରସ୍ତାବିତ ତାଲିକା ଅନୁସାରେ ଏକାମ୍ର ନିର୍ବାଚନ ମଣ୍ଡଳୀର ୬ଟି ପଞ୍ଚାୟତ, ଉତ୍ତର-ଭୁବନେଶ୍ୱରର ୫ଟି ପଞ୍ଚାୟତ ଏବଂ ଜଟଣୀ ନିର୍ବାଚନ ମଣ୍ଡଳୀର ଏକାଧିକ ପଞ୍ଚାୟତ ବିଏମସିରେ ସାମିଲ ହେବାକୁ ଯାଉଛି । ୪୬ଟି ଗାଁର ଚୂଡ଼ାନ୍ତ ତାଲିକା ପ୍ରସ୍ତୁତ କରି ରାଜ୍ୟ ସରକାରଙ୍କ ପାଖକୁ ପଠାଇଛି BMC । ରାଜଧାନୀର ଉପକଣ୍ଠ ଅଞ୍ଚଳଗୁଡ଼ିକରେ ବର୍ତ୍ତମାନ ଦ୍ରୁତଗତିରେ ନଗରୀକରଣ ହେଉଛି । ଲୋକମାନେ ଉଚ୍ଚ ଦରରେ ଜାଗା କିଣି ଘରଦ୍ୱାର କରି ରହୁଛନ୍ତି ସତ, ହେଲେ ସେମାନଙ୍କୁ ପୌର ପରିଷଦର ମୌଳିକ ସୁବିଧା ସୁଯୋଗ ମିଳିପାରୁନାହିଁ । ଖୁବଶୀଘ୍ର ଏହି ଗାଁ ଗୁଡିକ ବିଏମସି ସହ ମିଶିବ ବୋଲ କହିଛନ୍ତି ବିଏମସି ମେୟର ।

୨୦୨୭ ପୌର ନିର୍ବାଚନ ପୂର୍ବରୁ ରାଜଧାନୀର ସୀମା ପୁନଃନିର୍ଦ୍ଧାରଣ ହେବା ନିଶ୍ଚିତ ଭାବେ ଉପକଣ୍ଠବାସୀଙ୍କ ପାଇଁ ନୂଆ ଆଶା ସଞ୍ଚାର କରିଛି । ତେବେ ସରକାରଙ୍କ ମୋହର ବାଜିବା ପରେ ଏହି ୪୬ଟି ଗାଁର ନାଗରିକଙ୍କୁ କେବେ ମିଳୁଛି ସହରୀ ସୁବିଧା, ତାହା ଦେଖିବାକୁ ବାକି ରହିଲା ।