Jhalmuri Food Poisoning / ଝାଲମୁଢ଼ି ଖାଇ ହଟହଟା; ୫୦ରୁ ଊର୍ଦ୍ଧ୍ୱ ଗ୍ରାମବାସୀ ଝାଡ଼ାବାନ୍ତିରେ ଆକ୍ରାନ୍ତ

ସୁବର୍ଣ୍ଣପୁର: ଝାଲମୁଢି ଖାଇବା ହେଲା କାଳ । ଏକାବେଳେ ୫୦ରୁ ଅଧିକ ଲୋକ ଝାଡ଼ାବାନ୍ତିରେ ଆକ୍ରାନ୍ତ ହୋଇଛନ୍ତି । ପେଟ କାମୁଡ଼ିବା ସହ ତରଳ ଝାଡ଼ା ହେଉଥିବା ଜଣାପଡ଼ିଛି । ରାତି ଅଧରୁ ଝାଡ଼ାବାନ୍ତିର ଲକ୍ଷଣ ଦେଖାଯିବାପରେ ସମସ୍ତ ଆକ୍ରାନ୍ତଙ୍କୁ ଚିକିତ୍ସା ପାଇଁ ନିକଟସ୍ଥ ସ୍ଵାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି । ସୁବର୍ଣ୍ଣପୁର ଜିଲ୍ଲା ଉଲୁଣ୍ଡା ବ୍ଲକ ଅନ୍ତର୍ଗତ ମାଙ୍କଡ଼ବାହାଲ ଗ୍ରାମରୁ ସାମ୍ନାକୁ ଆସିଛି ଏହି ଖବର ।

• ଗାଁକୁ ଝାଲମୁଢି କିଣି ଖାଇଥିଲେ

ଗତକାଲି ଅପରାହ୍ନରେ ବଡ଼ାଳି ଗ୍ରାମର ଜଣେ ବ୍ୟକ୍ତି ମାଙ୍କଡ଼ବାହାଲ ଗାଁକୁ ଝାଲମୁଢ଼ି ବିକ୍ରି କରିବାକୁ ଆସିଥିଲେ । ଗାଁର ଅନେକ ଲୋକ ସେହି ଝାଲମୁଢ଼ି ଖାଇଥିବା ବେଳେ ରାତିରୁ ସେମାନଙ୍କଠାରେ ଝାଡ଼ା ଓ ବାନ୍ତିର ଲକ୍ଷଣ ଦେଖାଦେଇଥିଲା । ଅସୁସ୍ଥତା ବୃଦ୍ଧି ପାଇବାରୁ ତୁରନ୍ତ ସମସ୍ତଙ୍କୁ ଉଲୁଣ୍ଡା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା । ଆଜି ମଧ୍ୟ କେତେକ ଲୋକ ଆକ୍ରାନ୍ତ ହୋଇ ମେଡିକାଲରେ ଚିକିତ୍ସାଧୀନ ରହିଛନ୍ତି ।

• ଗାଁରେ ପହଞ୍ଚିଲା ମେଡିକାଲ ଟିମ

ଗ୍ରାମବାସୀଙ୍କ କହିବା କଥା ଯେ, ଗାଁକୁ ଝାଲମୁଢି ବିକିବା ପାଇଁ ଜଣେ ବ୍ୟକ୍ତି ଆସିଥିଲା । ଏହାପରେ ଗାଁର ଅନେକ ଲୋକ ତା'ଠୁ ଝାଲମୁଢି କିଣିଥିଲେ । ଏହାପରେ ଧୀରେ ଧୀରେ ଲୋକଙ୍କ ସ୍ଵାସ୍ଥ୍ୟାବସ୍ଥା ବିଗିଡ଼ିଥିଲା । ଛୋଟପିଲା ମଧ୍ୟ ଝାଡ଼ାବାନ୍ତିରେ ଆକ୍ରାନ୍ତ ହୋଇଛନ୍ତି । ଖବର ଜଣାପଡ଼ିବା ପରେ ଏକ ମେଡିକାଲ ଟିମ ଗାଁରେ ପହଞ୍ଚି ଆକ୍ରାନ୍ତଙ୍କ ଚିକିତ୍ସା କରିବା ସହ ଔଷଧ ବଣ୍ଟନ କରିଛି । କିଛି ଲୋକ ଉଲୁଣ୍ଡା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି ହୋଇ ଚିକିତ୍ସିତ ହେଉଛନ୍ତି ।

ପଢନ୍ତୁ ଏହି ଖବର: ଶରୀରେ ଭିଟାମିନ D କମିଲେ କେଉଁ ଲକ୍ଷଣ ଦିଶେ ? ଜମାରୁ କରନ୍ତୁନି ଅଣଦେଖା

• କିଛି ଦିନ ପୂର୍ବରୁ ରୁଟି ଖାଇ ଅସୁସ୍ଥ ହୋଇଥିଲେ

ଗତ ମାସରେ ଏକ ଖବର ଆସିଥିଲା । ଗଜପତି ଜିଲ୍ଲାରେ ଗୁରାଣ୍ଡି ଥାନା ଅନ୍ତର୍ଗତ ଉପଲଡା ପଞ୍ଚାୟତର ଖାରଡ଼ା ଗାଁରେ ରୁଟି ଖାଇ ଗୋଟିଏ ପରିବାରର ୬ ଜଣ ଅସୁସ୍ଥ ହୋଇପଡ଼ିଥିଲେ । ପରିବାରର ସଦସ୍ୟମାନେ ସାତମାଇଲ ଅଞ୍ଚଳର ଏକ ଦୋକାନରୁ ଅଟା କିଣି ଘରକୁ ଆଣିଥିଲେ । ପରେ ସେହି ଅଟାରେ ରୁଟି ପ୍ରସ୍ତୁତ କରି ପରିବାରର ସଦସ୍ୟମାନେ ଖାଇଥିଲେ । ରୁଟି ଖାଇବାର କିଛି ସମୟ ପରେ ୬ ଜଣଙ୍କ ସ୍ୱାସ୍ଥ୍ୟାବସ୍ଥା ହଠାତ୍‌ ଖରାପ ହୋଇପଡ଼ିଥିଲା । ସମସ୍ତଙ୍କୁ ଗୁରୁତର ଅବସ୍ଥାରେ ପାରଳାଖେମୁଣ୍ଡି ମୁଖ୍ୟ ଚିକିତ୍ସାଳୟକୁ ନିଆଯାଇ ଭର୍ତ୍ତି କରାଯାଇଥିଲା । ଏବେ ସମସ୍ତେ ସୁସ୍ଥ ଥିବା ଜଣାପଡ଼ିଛି ।