Nisa Maharana / କୋର୍ଟରେ ହାଜର ହେଲେ ନିଶା ମହାରଣା; ବହୁଦିନ ଧରି ଖୋଜୁଥିଲା ବଲାଙ୍ଗୀର ସଦର ପୋଲିସ

କୋର୍ଟରେ ମଞ୍ଚ ଅଭିନେତ୍ରୀ ନିଶା ମହାରଣାଙ୍କ ଆତ୍ମସମର୍ପଣ । ଅଶ୍ଳୀଳ ନୃତ୍ୟ ପରିବେଷଣ ଅଭିଯୋଗରେ ବଲାଙ୍ଗୀର ସଦର ଥାନାରେ ହୋଇଥିଲା ମାମଲା । ଅଭିନେତ୍ରୀ ନିଶା ମହାରଣା ବଲାଙ୍ଗୀର ଏସଡିଜେଏମ କୋର୍ଟରେ ହାଜର ହୋଇଛନ୍ତି । 

ବଲାଙ୍ଗୀର ସଦର ଥାନା ଚନ୍ଦନଭାଟି ଗାଁରେ ଗତ ଡିସେମ୍ବର ୧୨ ରାତିରେ ଅଶ୍ଳୀଳ ନୃତ୍ୟ ପରିବେଷଣ ମାମଲାରେ ଆଜି ବଲାଙ୍ଗୀର କୋର୍ଟରେ ହାଜର ହୋଇଛନ୍ତି ନିଶା । ଡିସେମ୍ବର ୧୪ରେ ତତ୍କାଳୀନ ଚନ୍ଦନଭାଟି ଫାଣ୍ଡି ଅଧିକାରୀ ରଞ୍ଜିତ ପଧାନ ଏ ନେଇ ବଲାଙ୍ଗୀର ସଦର ଥାନାରେ ଅଭିଯୋଗ କରିଥିଲେ । ସଦର ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ଡିସେମ୍ବର ୧୫ରେ ଯାତ୍ରା କମିଟି ସଭାପତି ଓ ସଂପାଦକଙ୍କୁ ଗିରଫ କରି କୋର୍ଟ ଚାଲାଣ କରିଥିଲା ।

• ଆଗୁଆ ମିଳିଥିଲା ଜାମିନ

ଗିରଫଦାରୀ ଭୟରେ ନିଶା ଉଚ୍ଚ ନ୍ୟାୟାଳୟରେ ଆଗୁଆ ଜାମିନ ପାଇଁ ଆବେଦନ କରିଥିଲେ । ଉଚ୍ଚ ନ୍ୟାୟାଳୟ ନିଶାଙ୍କୁ ସର୍ତ୍ତମୂଳକ ଜାମିନ ପ୍ରଦାନ ସହ ବଲାଙ୍ଗୀର ଏସଡିଜେଏମ କୋର୍ଟରେ ହାଜର ହେବାପାଇଁ ନିଶାଙ୍କୁ ନିର୍ଦ୍ଦେଶ ଦେଇଥିଲେ । ଆଜି ଅପରାହ୍ନ ପ୍ରାୟ ୧ଟା ୪୫ରେ ନିଶା ନିଜ ଓକିଲଙ୍କ ସହ ବଲାଙ୍ଗୀର ଏସଡିଜେଏମ କୋର୍ଟରେ ହାଜର ହୋଇଛନ୍ତି ।

ଏଥିସହ ପଢନ୍ତୁ: ଜାସମିନଙ୍କୁ ଛାଡି ମିଷ୍ଟ୍ରି ଗର୍ଲଙ୍କ ସହ ଅଲି, ଧୋକାକୁ ନେଇ ମୁହଁ ଖୋଲିଲେ ଅଭିନେତ୍ରୀ...

• ବଲାଙ୍ଗୀରରେ ଅଶ୍ଳୀଳ ଡାନ୍ସ କରିଥିଲେ ନିଶା

ବଲାଙ୍ଗୀର ସଦର ଥାନା ଅନ୍ତର୍ଗତ ଚନ୍ଦନବାଟି ଗ୍ରାମରେ ଅପେରା ଦୁର୍ଗା ମନ୍ଦିର ନାଁରେ ଗତ ୮ ତାରିଖରୁ ୧୨ ତାରିଖ ପର୍ଯ୍ୟନ୍ତ ଅପେରା ପ୍ରଦର୍ଶିତ ହୋଇଥିଲା ଏବଂ ଏହାକୁ ସାଇ କୃପା ଏସଏଚଜି ଦ୍ଵାରା ଆୟୋଜିତ କରାଯାଇଥିଲା । ତେବେ ଅପେରା କମିଟି ଆଇଟମ୍ ଡ୍ୟାନ୍ସର ନିଶା ମହାରଣାଙ୍କୁ ଡାକିଥିଲା । ଏଠାରେ ନିଶା ଅଶ୍ଳୀଳ ନୃତ୍ୟ ପରିବେଷଣ କରି ଯାତ୍ରାପ୍ରେମୀଙ୍କୁ ଲଜ୍ଜିତ କରିଥିଲେ ।

ଏହି ଭିଡିଓଟି ସୋସିଆଲ ମିଡିଆରେ ଖୁବ ଭାଇରାଲ ହୋଇଥିଲା । ଏହାପରେ ବଲାଙ୍ଗୀର ସଦର ପୋଲିସ ମାମଲା ରୁଜୁ କରିଥିଲା । ଆୟୋଜକ କମିଟିର ସଭାପତି ସୁରେନ୍ଦ୍ର ନାଗ, ସମ୍ପାଦକ ରାଧେଶ୍ୟାମ ମେହେର, ଅପେରା ମ୍ୟାନେଜର ଶଙ୍କର ସେନାପତି ଓ ଅନ୍ୟ ସଦସ୍ୟମାନଙ୍କ ସହ ଅଭିନେତ୍ରୀ ନିଶା ମହାରଣାଙ୍କ ନାଁରେ ମାମଲା ରୁଜୁ ହୋଇଥିଲା । ଏଥିରେ ପୋଲିସ୍ ଦୁଇ ଜଣଙ୍କୁ ଗିରଫ କରି କୋର୍ଟ ଚାଲାଣ ମଧ୍ୟ କରିଛି । କିଛି ଦିନ ତଳେ ବଲାଙ୍ଗୀର ପୋଲିସ ରାଜଧାନୀ ଭୁବନେଶ୍ଵର ଆସି ନିଶା ମହାରଣାଙ୍କୁ ଖୋଜୁଥିଲା । ହେଲେ ନିଶା ନିଜ ଆପାର୍ଟମେଣ୍ଟରୁ ସକାଳୁ ସକାଳୁ ଗାଏବ ହୋଇଯାଇଥିଲେ । ଏହାର କିଛି ଦିନ ପରେ ସେ କୋର୍ଟରେ ପହଞ୍ଚି ଆତ୍ମସମର୍ପଣ କରିଛନ୍ତି ।