ଅର୍ଗସ ବ୍ୟୁରୋ : ଦେବଗଡ଼ ନିର୍ବାଚନୀ ସଭାରେ କେନ୍ଦ୍ରମନ୍ତ୍ରୀଙ୍କ ଘୋଷଣା ପରେ ରାଜ୍ୟସାରା ଲୋକଙ୍କ ମଧ୍ୟରେ ଦେଖିବାକୁ ମିଳିଛି ଆଗ୍ରହ । ରାଜ୍ୟରେ ବିଜେପି ସରକାରକୁ ଆସିଲେ ପ୍ରତି ମହିଳାଙ୍କୁ ମାସିକ ହଜାରେ ଟଙ୍କା ଭତ୍ତା ଏବଂ ଚାଷୀଙ୍କୁ ଧାନ କ୍ବିଣ୍ଟାଲ ପିଛା ୩୧ଶହ ଟଙ୍କା ଦେବାକୁ ପ୍ରତିଶ୍ରୁତି ଦେଇଛି ବିଜେପି । ଛତିଶଗଡ଼ରେ ବି ବିଧାନସଭା ନିର୍ବାଚନ ପୂର୍ବରୁ ବିଜେପି ଦେଇଥିଲା ସମାନ ପ୍ରତିଶ୍ରୁତି । ଯାହାର ଫଳ ସ୍ବରୂପ ସବୁ ଆକଳନକୁ ଭୁଲ ପ୍ରମାଣିତ କରି ଛତିଶଗଡ଼ରେ ବିଜେପି ହାସଲ କରିଥିଲା ବମ୍ପର ଭିକ୍ଟ୍ରି । ଛତିଶଗଡ଼କୁ ଲାଗିଛି ଓଡ଼ିଶାର ଅଧିକ ଧାନ ଉତ୍ପାଦନ ହେଉଥିବା ଜିଲ୍ଲାଗୁଡ଼ିକ । 

ଓଡ଼ିଶା ଚାଷୀ କଟନୀଛଟନୀ ଓ ଅଭାବି ବିକ୍ରୀର ଶିକାର ହେଉଥିବା ବେଳେ ପଡ଼ୋଶୀ ରାଜ୍ୟର ଚାଷୀ କ୍ବିଣ୍ଟାଲ ୩୧ ଶହ ଟଙ୍କାରେ ଧାନ ବିକୁଥିବା ଦେଖି ଓଡ଼ିଶା ଚାଷୀ ମନରେ ଦୁଃଖ ହେଉଥିଲା । ଏବେ ବିଜେପିର ଘୋଷଣା ସେମାନଙ୍କ ମଧ୍ୟରେ ସଂଚାର କରିଛି ନୂଆ ଆଶା । ରାଜ୍ୟରେ ବିଜେଡିର ବଡ଼ ଭୋଟ୍ ବ୍ୟାଙ୍କ ହେଉଛନ୍ତି ମହିଳା । ଆଉ ପ୍ରତି ମହିଳାଙ୍କୁ ମାସିକ ହଜାରେ ଟଙ୍କାର ଭତ୍ତା ପ୍ରତିଶ୍ରୁତି ବିଜେଡିର ଏହି ଭୋଟ୍ ବ୍ୟାଙ୍କକୁ ଭାଙ୍ଗିବାର ବଡ଼ ଅସ୍ତ୍ର ସାବ୍ୟସ୍ତ ହୋଇପାରେ । ଏହି ଗ୍ୟାରେଣ୍ଟି ବଳରେ ଯଦି ବିଜେପି ମହିଳା ଭୋଟ୍ କୁ ନିଜ ସପକ୍ଷରେ କରିନିଏ ତାହାରେ ଓଡ଼ିଶାରେ ୨୪ ବର୍ଷର ସତ୍ତା ପରିବର୍ତ୍ତନ ଅସମ୍ଭବ ନୁହେଁ । 

ଅଧିକ ପଢନ୍ତୁ ଓଡ଼ିଶା ଖବର

କିଛି ମାସ ତଳେ ଶେଷ ହୋଇଥିବା ଛତିଶଗଡ଼, ମଧ୍ୟପ୍ରଦେଶ ଓ ରାଜସ୍ତାନ ବିଧାନସଭା ନିର୍ବାଚନରେ ବିଜେପି ପାଇଁ  ବିଜୟର ରାସ୍ତା ଅସହଜ ମନେ ହେଉଥିଲା । କିନ୍ତୁ ମୋଦି ଗ୍ୟାରେଣ୍ଟି ବଳରେ ୩ ରାଜ୍ୟରେ ବମ୍ପର ବିଜୟ ହାସଲ କରିଥିଲା ଭାରତୀୟ ଜନତା ପାର୍ଟି । ଏବେ ପ୍ରଶ୍ନ ଓଡ଼ିଶାରେ ବି କମାଲ ଦେଖାଇବକି ମୋଦି ଗ୍ୟାରେଣ୍ଟି ? ଚାଷୀ ଓ ମହିଳାଙ୍କ ବିଶ୍ବାସ ଜିତିବାରେ ସଫଳ ହେବକି ବିଜେପିର ଏହି ୨ ପ୍ରତିଶ୍ରୁତି ?