ଅର୍ଗସ ବ୍ୟୁରୋ : ବିଜେପି ନେତୃତ୍ବରେ ଓଡ଼ିଶାରେ ହେବ ନୂଆ ସରକାର । କୁଚିଣ୍ଡାରେ ବିଜୟ ସଂକଳ୍ପ ସମାବେଶରେ ଧର୍ମେନ୍ଦ୍ରଙ୍କ ଦମ୍ଭୋକ୍ତି । କୃଷିଭିତ୍ତିକ ଅଞ୍ଚଳରେ ଧାନ କିଣାରେ ହେଉଛି ମନଇଚ୍ଛା କଟନୀ-ଛଟନୀ । ମୋଦି ୧୦ ହଜାର କୋଟି ଦେବା ସତ୍ବେ ଓଡ଼ିଆବାସୀଙ୍କୁ ମିଳୁନି ପିଇବା ପାଣି । ଧର୍ମେନ୍ଦ୍ର କହିଲେ, ଅପାରଗ ବିଜେଡି ସରକାରକୁ ବଦଳାଇବା ପାଇଁ ଦୃଢ଼ ସଂକଳ୍ପ ନେଇଛନ୍ତି ଓଡ଼ିଶାବାସୀ ।

ଓଡ଼ିଶାର ଅସ୍ମିତାକୁ ଅକ୍ଷୁର୍ଣ୍ଣ ପାଇଁ ଏଥର ସରକାର ବଦଳିବା ଦରକାର । ବିଜେପି ନେତୃତ୍ବରେ ଓଡ଼ିଶାରେ ହେବ ନୂଆ ସରକାର । କୁଚିଣ୍ଡାରେ ବିଜୟ ସଂକଳ୍ପ ସମାବେଶରେ ଏଭଳି ଦମ୍ଭୋକ୍ତି ଭରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।  ମୋଦିଙ୍କ ଶାସନରେ ଗରିବ ମାନଙ୍କ ପାଇଁ ସବୁଠୁ ଅଧିକ କାମ ହୋଇଛି । ଓଡ଼ିଶାବାସୀଙ୍କୁ ଶୁଦ୍ଧ ପାନୀୟ ଜଳ ଯୋଗାଇବାକୁ ମୋଦି ୧୦ ହଜାର କୋଟି ଦେଇଛନ୍ତି, କିନ୍ତୁ ଖରାଦିନରେ ପାଣି ମୁନ୍ଦେ ପାଇଁ ଡହଳ ବିକଳ ହେଉଛନ୍ତି ରାଜ୍ୟବାସୀ । 

ଧାନ କିଣାରେ ମନଇଚ୍ଛା କଟନୀ-ଛଟନୀ କରାଯାଉଛି, ମିଲରଙ୍କ ସହ ମିଶି ଚାଷୀଙ୍କ ପେଟରେ ଲାତ ମାରୁଛି ବିଜେଡି ସରକାର । କୃଷିଭିତ୍ତିକ ଅଞ୍ଚଳ ଉପରେ ଗୁରୁତର ପ୍ରଭାବ ପଡୁଛି । ୨୪ ବର୍ଷର ବିଜେଡି ସରକାରରେ କୁଚିଣ୍ଡା ସମ୍ପୂର୍ଣ୍ଣ ଅବହେଳିତ । ଜଳସେଚନ ହେଉନଥିବାରୁ ଚାଷୀ ଦୁର୍ଦ୍ଦଶା ଭୋଗୁଛନ୍ତି । ଜଙ୍ଗଲଜାତ ଦ୍ରବ୍ୟର ଉପଯୁକ୍ତ ମୂଲ୍ୟ ଦେଉନାହିଁ ରାଜ୍ୟ ସରକାର । ପେସା ଆକ୍ଟ କାର୍ଯ୍ୟକାରୀ ହେଉନଥିବା ବେଳେ ଆଦିବାସୀଙ୍କୁ ସ୍ଥାୟୀ ଜମି ପଟ୍ଟା ମିଳୁନାହିଁ । 

ଅଧିକ ପଢନ୍ତୁ ଓଡ଼ିଶା ଖବର

ଶ୍ରୀ ପ୍ରଧାନ ପ୍ରଶ୍ନ କରିଛନ୍ତି, ଆଦିବାସୀଙ୍କ ଜମି ବିକିବା ପାଇଁ କିଏ ନେଇଥିଲା ନିଷ୍ପତ୍ତି ? ଏହା ବିରୋଧରେ ଲୋକେ ମେଳି ବାନ୍ଧିଛନ୍ତି । ଦୁର୍ନୀତିଗ୍ରସ୍ତ, ଅପାରଗ ବିଜେଡି ସରକାରକୁ ବଦଳାଇବାକୁ ଜନତା ଦୃଢ ସଂକଳ୍ପ ନେଇଛନ୍ତି । କୁଚିଣ୍ଡା ବିଜୟ ସଂକଳ୍ପ ସମାବେଶରେ ଧର୍ମେନ୍ଦ୍ରଙ୍କ ଉପସ୍ଥିତିରେ ପଦ୍ମ ଧରିଥିଲେ ବହୁ କର୍ମୀ । କୁଚିଣ୍ଡା ନିର୍ବାଚନ ମଣ୍ଡଳୀ କୁସୁମି ଓ କେଶାଇବାହାଲରେ ବିଶାଳ ରୋଡ୍ ସୋ କରିଛନ୍ତି କେନ୍ଦ୍ରମନ୍ତ୍ରୀ । ଯେଉଁଥିରେ ହୋଇଥିଲା ହଜାର ହଜାର ଲୋକଙ୍କ ସମାଗମ ।