RTO Rules / ଏଣିକି ଫାଙ୍କି ପାରିବେନି ଗାଡ଼ି ମାଲିକ, ସବୁ RTOକୁ ନୂଆ ନିର୍ଦ୍ଦେଶ

ବେଆଇନ କାମରେ ଗାଡ଼ି ବ୍ୟବହାର କରୁଥିଲେ ସାବଧାନ । ଜାଲିଆତିରେ ଲାଗିବ ବ୍ରେକ୍‌ । ଆଉ ଫାଙ୍କି ପାରିବେନି ଗାଡ଼ି ମାଲିକ । ଗାଡ଼ି ପଞ୍ଜିକରଣ ଓ ମାଲିକାନା ପରିବର୍ତ୍ତନ କ୍ଷେତ୍ରରେ ଆଧାର କାର୍ଡ ବାଧ୍ୟତାମୂଳକ । ଯାଞ୍ଚ କରିବାକୁ ସବୁ RTOଙ୍କୁ ନିର୍ଦ୍ଦେଶ ଦେଲା ପରିବହନ ବିଭାଗ ।

ଦୁର୍ଘଟଣା ଘଟୁଛି.. ଲୋକଙ୍କ ଜୀବନ ଯାଉଛି.. ହେଲେ ମାମଲା ତଦନ୍ତ ବେଳେ ପୋଲିସ ଓ ପରିବହନ ବିଭାଗ ବାଉଳା ହେଉଛି । କାରଣ ଗାଡି ମାଲିକର ପରିଚୟ ପତ୍ରରେ ଗୋଟିଏ ଠିକଣା ଥିବା ବେଳେ ଗାଡି କିଣିବା ବେଳେ ଦାଖଲ ହୋଇଥିବା କାଗଜ ପତ୍ରରେ ରହୁଛି ଅଲଗା ଠିକଣା । ବିଭିନ୍ନ ସ୍ଥାନରୁ ଏଭଳି ମାମଲା ସାମ୍ନାକୁ ଆସିବା ପରେ କଠୋର ହୋଇଛି ପରିବହନ ବିଭାଗ । ଏଥିପାଇଁ ଗାଡ଼ି ମାଲିକଙ୍କ ଠିକଣା, ପରିଚୟ ଓ ଆରଟିଓ ପରିସୀମା ଆଦିର କଡ଼ାକଡ଼ି ଯାଞ୍ଚ କରିବାକୁ ସବୁ RTOଙ୍କୁ ନିର୍ଦ୍ଦେଶ ଦେଇଛି ପରିବହନ ବିଭାଗ । ଚିଠିରେ କୁହାଯାଇଛି...

୧ - ସବୁ ପ୍ରକାର କାମ ପାଇଁ ଆଧାର ଯାଞ୍ଚ ବାଧ୍ୟତାମୂଳକ ହେବ
୨ - ଯଦି ଆବେଦନପତ୍ର ଓ ପରିଚୟପତ୍ରରେ ନାମ, ଫୋନ୍ ନମ୍ବର ଓ ଠିକଣା ଭୁଲ ଥିଲେ ଏହା ଖାରଜ ହେବ
୩- ପରିବହନ ଗାଡ଼ି ପାଇଁ ଏହି ନିୟମ ଅଧିକ କଡ଼ାକଡ଼ି କରାଯିବ
୪- ମାଲିକାନା ପରିବର୍ତ୍ତନ ସମୟରେ କ୍ରେତାଙ୍କ କାଗଜପତ୍ର ଭଲ ଭାବେ ଯାଞ୍ଚ କରାଯିବ

ଅଧିକ ପଢ଼ନ୍ତୁ: ଦେଶରେ ମୌସୁମୀର ତାଣ୍ଡବ ! ୬୦ରୁ ଅଧିକ ମୃତ, ଦିଲ୍ଲୀରେ ରେଡ୍ ଆଲର୍ଟ

ଦୁର୍ଘଟଣା ସହ ଗଞ୍ଜେଇ, ବ୍ରାଉନସୁଗାର ଆଦି ଚାଲାଣ କ୍ଷେତ୍ରରେ ପ୍ରାୟ ବାହାର ରାଜ୍ୟର ଗାଡ଼ି ବ୍ୟବହାର ହେଉଥିବା ନଜର ଆସୁଛି । କିଛି କ୍ଷେତ୍ରରେ ନମ୍ବର ପ୍ଲେଟ ପରିବର୍ତ୍ତନ କରି ଦିଆଯାଇଥିବା ବେଳେ ସଠିକ ତଦନ୍ତ ବାଟ ହୁଡ଼ିଛି । ତେଣୁ ଯାନଟିକୁ ସାଧାରଣତଃ କେଉଁଠାରେ ରଖାଯାଏ ଏବଂ ମାଲିକଙ୍କର ବ୍ୟବସାୟିକ ସ୍ଥାନ କେଉଁଠାରେ ଅଛି ତାହା ମଧ୍ୟ ଯାଞ୍ଚ କରିବେ କର୍ତ୍ତୃପକ୍ଷ । ପରିବହନ ଯାନର ବୈଧ ସାର୍ଟିଫିକେଟ, ପରମିଟ୍ କିମ୍ବା ବୀମା କାଗଜପତ୍ର ନ ମିଳିଲେ ଆଇନ ଅନୁଯାୟୀ ତୁରନ୍ତ କାର୍ଯ୍ୟାନୁଷ୍ଠାନ ହେବ ।

ବଡ଼ କଥା ହେଉଛି ଖାମଖିଆଲି ମନୋଭାବ ରଖୁଥିବା ପରିବହନ ଅଧିକାରୀଙ୍କୁ ଚେତେଇ ଦେଇଛି ବିଭାଗ । ଏଣିକି କୌଣସି ଗାଡ଼ି ମାଲିକଙ୍କ ଠିକଣା ଭୁଲ୍‌ ଥିବା ଜଣାପଡ଼ିବା ପରେ ବି ଏହାକୁ ଅନୁମୋଦନ କରିଥିବା ଅଧିକାରୀଙ୍କୁ ଉତ୍ତରଦାୟୀ କରାଯାଇ କାର୍ଯ୍ୟାନୁଷ୍ଠାନ ନିଆଯିବ ।