ABVP Wins Unopposed / ରାଜଧାନୀ ମହାବିଦ୍ୟାଳୟରେ ନିର୍ଦ୍ୱନ୍ଦ୍ୱରେ ନିର୍ବାଚିତ ହେଲେ ABVP ପ୍ରାର୍ଥୀ

ଭୁବନେଶ୍ୱର: ଓଡ଼ିଶା ଛାତ୍ର ସଂସଦ ନିର୍ବାଚନକୁ ଆଉ ୪ଦିନ ଥିବାବେଳେ ରାଜଧାନୀ ମହାବିଦ୍ୟାଳୟରେ ନିର୍ଦ୍ୱନ୍ଦ୍ୱରେ ନିର୍ବାଚିତ ହେଲେ ABVP ପ୍ରାର୍ଥୀ । ଚଳିତ ବର୍ଷ ରାଜଧାନୀ ମହାବିଦ୍ୟାଳୟର ଛାତ୍ର ସଂସଦ ନିର୍ବାଚନ ପାଇଁ ମୋଟ ୨୯ଟି ପଦବୀ ମଧ୍ୟରୁ ୨୦ଟି ପଦବୀରେ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ABVP)ର ପ୍ରାର୍ଥୀମାନେ ନିର୍ଦ୍ୱନ୍ଦ୍ୱରେ ନିର୍ବାଚିତ ହୋଇଛନ୍ତି । ଏହାପରେ ସମସ୍ତ ବିଜୟୀ ପ୍ରାର୍ଥୀଙ୍କୁ ରାଜଧାନୀ କଲେଜ ଛାତ୍ର ସଂସଦର ପୂର୍ବତନ ସଭାପତି ରଜତ କୁମାର ପରିଡ଼ା ଆନ୍ତରିକ ଶୁଭେଚ୍ଛା ଓ ଅଭିନନ୍ଦନ ଜଣାଇଛନ୍ତି ।

ଏହି ଅବସରରେ ପରିଡ଼ା କହିଛନ୍ତି ଯେ, ଛାତ୍ର ସଂସଦ ହେଉଛି ଛାତ୍ରଛାତ୍ରୀଙ୍କ ସ୍ୱରକୁ ପ୍ରତିନିଧିତ୍ୱ କରିବା ଏବଂ ମହାବିଦ୍ୟାଳୟର ବିକାଶରେ ଯୋଗଦାନ ଦେବାର ଏକ ଗୁରୁତ୍ୱପୂର୍ଣ୍ଣ ମଞ୍ଚ । ନବନିର୍ବାଚିତ ପ୍ରତିନିଧିମାନେ ଶୃଙ୍ଖଳା, ଏକତା ଓ ଦାୟିତ୍ୱବୋଧ ବଜାୟ ରଖି ମହାବିଦ୍ୟାଳୟର ସର୍ବାଙ୍ଗୀନ ଉନ୍ନତି, ଛାତ୍ରଛାତ୍ରୀଙ୍କ ମୌଳିକ ସମସ୍ୟାର ସମାଧାନ, ସେମାନଙ୍କ ହିତର ସୁରକ୍ଷା ଏବଂ ବୌଦ୍ଧିକ ବିକାଶ ପାଇଁ ନିଷ୍ଠାର ସହ କାର୍ଯ୍ୟ କରିବେ ବୋଲି ସେ ଆଶା ପ୍ରକାଶ କରିଛନ୍ତି ।

ପଢନ୍ତୁ ଏହି ଖବର: ନିର୍ବାଚନ ମୈଦାନରେ ୬୫୦୦ରୁ ଅଧିକ ପ୍ରାର୍ଥୀ; ଆଜିଠୁ କ୍ୟାମ୍ପସରେ ସରଗରମ ହେବ ପ୍ରଚାର

ସେ ଆହୁରି କହିଛନ୍ତି ଯେ, ନିର୍ବାଚନରେ ମିଳିଥିବା ଦାୟିତ୍ୱକୁ କେବଳ ପଦବୀ ଭାବେ ନୁହେଁ, ବରଂ ଛାତ୍ରଛାତ୍ରୀଙ୍କ ସେବା ଓ ମହାବିଦ୍ୟାଳୟର ଉନ୍ନତି ପାଇଁ ଏକ ସୁଯୋଗ ଭାବେ ଗ୍ରହଣ କରିବା ଉଚିତ । ଛାତ୍ରଛାତ୍ରୀଙ୍କ ଆଶା ଓ ଆକାଂକ୍ଷାକୁ ସମ୍ମାନ ଦେଇ ସମସ୍ତେ ମିଳିମିଶି ରାଜଧାନୀ ମହାବିଦ୍ୟାଳୟର ଗୌରବ ଓ ମର୍ଯ୍ୟାଦା ବୃଦ୍ଧି ପାଇଁ କାର୍ଯ୍ୟ କରିବେ ବୋଲି ସେ ଆଶାବ୍ୟକ୍ତ କରିଛନ୍ତି । ଆଗାମୀ ୧୫ ତାରିଖରେ ଅନ୍ୟ ପଦବୀ ଗୁଡିକରେ ମଧ୍ୟ ଏବିଭିପି ବିଜୟ ଲାଭ କରିବ ବୋଲି ସେ ଆଶା ପ୍ରକାଶ କରିଛନ୍ତି । ଶେଷରେ, ମହାପ୍ରଭୁଙ୍କ ନିକଟରେ ସମସ୍ତ ନବନିର୍ବାଚିତ ପ୍ରତିନିଧିଙ୍କ ଉଜ୍ଜ୍ୱଳ ଭବିଷ୍ୟତ, ସଫଳତା ଓ ଛାତ୍ରଛାତ୍ରୀଙ୍କ ପାଇଁ ନିଷ୍ଠାପର ସେବା କରିବାର ଶକ୍ତି କାମନା କରିଛନ୍ତି ।

• ପୋଲିସ ପକ୍ଷରୁ ସୁରକ୍ଷା ବ୍ୟବସ୍ଥା କଡ଼ାକଡ଼ି

ଆସନ୍ତା ୧୫ ତାରିଖରେ ହେବାକୁ ଥିବା ଛାତ୍ର ସଂସଦ ନିର୍ବାଚନ ପାଇଁ ରାଜ୍ୟ ପୋଲିସ ମୁଖ୍ୟାଳୟ ପକ୍ଷରୁ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି । ଡିଜିପି ବିନୟତୋଷ ମିଶ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ଉଚ୍ଚସ୍ତରୀୟ ଭିଡିଓ କନ୍‌ଫରେନ୍ସିଂ ବୈଠକରେ ସମସ୍ତ ଜିଲ୍ଲା ଏସ୍‌ପି ଓ ରେଞ୍ଜ ଆଇଜି/ଡିଆଇଜି ସାମିଲ ହୋଇଥିଲେ । କଲେଜ କ୍ୟାମ୍ପସରେ ହିଂସା ଘଟିବା ପରେ ପଦକ୍ଷେପ ନେବା ଅପେକ୍ଷା ଆଗୁଆ ସତର୍କତା ଅବଲମ୍ବନ କରି ଉତ୍ତେଜନା ରୋକିବାକୁ ଡିଜିପି କଡ଼ା ନିର୍ଦ୍ଦେଶ ଦେଇଛନ୍ତି ।