Election Campaigning / ନିର୍ବାଚନ ମୈଦାନରେ ୬୫୦୦ରୁ ଅଧିକ ପ୍ରାର୍ଥୀ; ଆଜିଠୁ କ୍ୟାମ୍ପସରେ ସରଗରମ ହେବ ପ୍ରଚାର

ଭୁବନେଶ୍ଵର: ସରିଲା ନାମାଙ୍କନ ଏବେ ଜମିବ ପ୍ରଚାର । ଛାତ୍ର ସଂସଦ ନିର୍ବାଚନ ଲାଗି ରାଜ୍ୟର ବିଭିନ୍ନ କଲେଜରେ ରାଜନୈତିକ ମାହୋଲ ଉଷ୍ମ ହୋଇଥିବା ବେଳେ ଭୋଟରଙ୍କୁ ନିଜ ପକ୍ଷରେ କରିବାକୁ ଆଜିଠୁ କ୍ୟାମ୍ପସରେ ସରଗରମ ହେବ ପ୍ରଚାର । ତେବେ ଉଚ୍ଚଶିକ୍ଷା ବିଭାଗର ସୂଚନା ଆଧାରରେ ରାଜ୍ୟର ବିଭିନ୍ନ କଲେଜ ଓ ବିଶ୍ୱବିଦ୍ୟାଳୟ ପାଇଁ ଚୂଡ଼ାନ୍ତ ପ୍ରାର୍ଥୀ ତାଲିକା ପ୍ରକାଶ ପାଇଛି । ମନୋନୟନ ପତ୍ର ଯାଞ୍ଚ ଓ ପ୍ରତ୍ୟାହାର ପରେ ଏବେ ସ୍ପଷ୍ଟ ହୋଇଯାଇଛି ନିର୍ବାଚନୀ ମଇଦାନର ଚିତ୍ର । ରାଜ୍ୟର ୩୪୭ଟି କଲେଜରେ ୬ ହଜାର ୩୬୨ ଜଣ ଏବଂ ୧୩ଟି ବିଶ୍ୱବିଦ୍ୟାଳୟରେ ୨୮୭ ଜଣ ପ୍ରାର୍ଥୀ ଚୂଡ଼ାନ୍ତ ଲଢ଼େଇ ପାଇଁ ପ୍ରସ୍ତୁତ ଅଛନ୍ତି।

• ଉଷ୍ମ ହେଉଛି କ୍ୟାମ୍ପସ ରାଜନୀତି

କ୍ୟାମ୍ପସଗୁଡ଼ିକରେ ଏବେ ନିର୍ବାଚନୀ ସରଗରମ ବୃଦ୍ଧି ପାଇବାରେ ଲାଗିଛି । ଛାତ୍ର ସଂସଦ ନିର୍ବାଚନରେ ମୋଟ ଭାଗ ନେଉଥିବା କଲେଜ ସଂଖ୍ୟା ରହିଛି ୩୪୭ । ମୋଟ ନୋମିନେସନ ୮ ହଜାର ୩୭୦ ଥିବାବେଳେ ନାକଚ ହୋଇଥିବା ପ୍ରାର୍ଥିପତ୍ର ସଂଖ୍ୟା ୧ ହଜାର ୧୯୬ । କାଏମ ରହିଥିବା ପ୍ରାର୍ଥିପତ୍ର ସଂଖ୍ୟା ରହିଛି ୭ ହଜାର ୧୭୪ । ୪୦୫ ଜଣ ମନୋନୟନ ପ୍ରତ୍ୟାହାର କରିଥିବାବେଳେ ଚୂଡ଼ାନ୍ତ ମଇଦାନରେ ଥିବା ମୋଟ ପ୍ରାର୍ଥୀ ୬ ହଜାର ୩୬୨ ରହିଛି ।

• ୧୩ଟି ବିଶ୍ୱବିଦ୍ୟାଳୟରେ ଛାତ୍ର ସଂସଦ ନିର୍ବାଚନ

ସେହିପରି ବିଶ୍ୱବିଦ୍ୟାଳୟ ଛାତ୍ର ସଂସଦ ନିର୍ବାଚନରେ ମୋଟ ଭାଗ ନେଉଥିବା ବିଶ୍ୱବିଦ୍ୟାଳୟ ସଂଖ୍ୟା ୧୩ ରହିଛି । ମୋଟ ମନୋନୟନ ପତ୍ର ୪୨୯ ଥିବାବେଳେ ନାକଚ ହୋଇଥିବା ପ୍ରାର୍ଥୀପତ୍ର ୪୯ ଓ କାଏମ ରହିଥିବା ପ୍ରାର୍ଥୀପତ୍ର ୩୮୦ ରହିଛି । ୩୪ ପ୍ରାର୍ଥୀ ମନୋନୟନ ପ୍ରତ୍ୟାହାର କରିଛନ୍ତି । ଚୂଡ଼ାନ୍ତ ମଇଦାନରେ ଅଛନ୍ତି ମୋଟ ୨୮୭ ପ୍ରାର୍ଥୀ ।

ପଢନ୍ତୁ ଏହି ଖବର: SVM କଲେଜ କ୍ୟାମ୍ପସ ବାହାରେ ଉତ୍ତେଜନା; ଅଣଛାତ୍ରଙ୍କ ଝଗଡ଼ାକୁ ନେଇ ବିଗିଡ଼ିଲା ସ୍ଥିତି

• ପୋଲିସ ପକ୍ଷରୁ ସୁରକ୍ଷା ବ୍ୟବସ୍ଥା କଡ଼ାକଡ଼ି

ଆସନ୍ତା ୧୫ ତାରିଖରେ ହେବାକୁ ଥିବା ଛାତ୍ର ସଂସଦ ନିର୍ବାଚନ ପାଇଁ ରାଜ୍ୟ ପୋଲିସ ମୁଖ୍ୟାଳୟ ପକ୍ଷରୁ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି । ଡିଜିପି ବିନୟତୋଷ ମିଶ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ଉଚ୍ଚସ୍ତରୀୟ ଭିଡିଓ କନ୍‌ଫରେନ୍ସିଂ ବୈଠକରେ ସମସ୍ତ ଜିଲ୍ଲା ଏସ୍‌ପି ଓ ରେଞ୍ଜ ଆଇଜି/ଡିଆଇଜି ସାମିଲ ହୋଇଥିଲେ । କଲେଜ କ୍ୟାମ୍ପସରେ ହିଂସା ଘଟିବା ପରେ ପଦକ୍ଷେପ ନେବା ଅପେକ୍ଷା ଆଗୁଆ ସତର୍କତା ଅବଲମ୍ବନ କରି ଉତ୍ତେଜନା ରୋକିବାକୁ ଡିଜିପି କଡ଼ା ନିର୍ଦ୍ଦେଶ ଦେଇଛନ୍ତି ।

• ସମ୍ବେଦନଶୀଳ ସ୍ଥାନ ଉପରେ ବିଶେଷ ନଜର

କଲେଜ କର୍ତ୍ତୃପକ୍ଷଙ୍କ ସହ ନିୟମିତ ଯୋଗାଯୋଗ ରଖିବା ସହ ସମ୍ବେଦନଶୀଳ ସ୍ଥାନଗୁଡ଼ିକ ଉପରେ ସ୍ୱତନ୍ତ୍ର ନଜର ରଖିବାକୁ କୁହାଯାଇଛି । ଶାନ୍ତିଶୃଙ୍ଖଳା ରକ୍ଷା ଓ ନିର୍ବାଚନ ପରବର୍ତ୍ତୀ ହିଂସା ଏଡ଼ାଇବା ପାଇଁ ଆବଶ୍ୟକତା ଅନୁଯାୟୀ ପୋଲିସ ଫୋର୍ସ ମୁତୟନ କରାଯିବ । ଏହି ସମୀକ୍ଷା ବୈଠକରେ ଗୁଇନ୍ଦା ନିର୍ଦ୍ଦେଶକ ଆର.ପି. କୋଚେ, ଏଡିଜି ରାଜେଶ କୁମାର ଓ ଅତିରିକ୍ତ ପୋଲିସ କମିଶନର ନରସିଂହ ଭୋଳଙ୍କ ସମେତ ବରିଷ୍ଠ ପୋଲିସ ଅଧିକାରୀମାନେ ଉପସ୍ଥିତ ଥିଲେ ।