Bidyabharati Jail Life / ଜେଲ୍‌ର ଚାରିକାନ୍ଥ ଭିତରେ ବିଦ୍ୟାଭାରତୀ; କେମିତି କଟୁଛି ଦିନ, କ'ଣ ଖାଉଛନ୍ତି ବିଦ୍ୟା ?

ବହୁଚର୍ଚ୍ଚିତ ଏସିଏଫ୍ ସୌମ୍ୟରଞ୍ଜନ ମହାପାତ୍ର ମୃତ୍ୟୁ ମାମଲାରେ ସାମ୍ନାକୁ ଆସିଛି ନୂଆ ଘଟଣାକ୍ରମ । ଦୀର୍ଘ ୫ ବର୍ଷର ଆଇନଗତ ଛକାପଞ୍ଛା ଓ ତଦନ୍ତ ପରେ ଶେଷରେ ଜେଲ୍‌ର ଚାରିକାନ୍ଥ ଭିତରେ ସୌମ୍ୟରଞ୍ଜନଙ୍କ ପତ୍ନୀ ବିଦ୍ୟାଭାରତୀ ପଣ୍ଡା, ତତ୍କାଳୀନ ଡିଏଫ୍‌ଓ ସଂଗ୍ରାମ ବେହେରା ଏବଂ ରୋଷେୟା ମନ୍ମଥ କୁମ୍ଭ । ଦିନେ ସାରା ରାଜ୍ୟକୁ ଦୋହଲାଇ ଦେଇଥିବା ଏହି ହତ୍ୟାକାଣ୍ଡର ମୁଖ୍ୟ ନାୟିକା କୁହାଯାଉଥିବା ବିଦ୍ୟାଭାରତୀ ଏବେ ପାରଳାଖେମୁଣ୍ଡି ଉପ-କାରାଗାରରେ। ବାହାର ଦୁନିଆର ହୋ-ହାଲ୍ଲାଠାରୁ ଦୂରରେ ଜେଲ୍ କାନ୍ଥ ଭିତରେ କେମିତି କଟୁଛି ବିଦ୍ୟାଭାରତୀଙ୍କ ଦିନରାତି?

• ଜେଲ ଚାରିକାନ୍ଥ ଭିତରେ ବିଦ୍ୟା

୨୦୨୧ ମସିହାର ସେହି ଚର୍ଚ୍ଚିତ ରାତି। ଆଉ ସୌମ୍ୟରଞ୍ଜନଙ୍କ ରହସ୍ୟଜନକ ମୃତ୍ୟୁ। ସେଦିନ ଯେଉଁ ବିଦ୍ୟାଭାରତୀଙ୍କ ନାଁରେ ଆସିଥିଲା ସ୍ୱାମୀଙ୍କୁ ଜାଳି ମାରିଦେବାର ସଙ୍ଗୀନ ଅଭିଯୋଗ, ଆଜି ସେ ଜେଲର ଚାରିକାନ୍ଥ ଭିତରେ ଅଛନ୍ତି । ବାହାର ଦୁନିଆର କୋଳାହଳ ଓ ମୋବାଇଲ୍ ଫୋନ୍ ଠାରୁ ସମ୍ପୂର୍ଣ୍ଣ ଦୂରରେ ଏବେ ପାରଳାଖେମୁଣ୍ଡି ଉପ-କାରାଗାରରେ ଦିନ କାଟୁଛନ୍ତି ବିଦ୍ୟା । ସକାଳୁ ଜେଲ୍ ଘଣ୍ଟି ସହ ନିନ୍ଦ ଭାଙ୍ଗୁଛି, ନିର୍ଦ୍ଧାରିତ ସମୟରେ ଖାଉଛନ୍ତି ଜେଲ୍‌ର ଖାଦ୍ୟ। ହେଲେ ଯେଉଁ ବିଦ୍ୟାଭାରତୀଙ୍କ ବାବଦରେ ଦିନେ ସାରା ଓଡ଼ିଶା ଚର୍ଚ୍ଚା କରୁଥିଲା, ସେ ଏବେ କୁଆଡ଼େ ମହିଳା ୱାର୍ଡରେ ସମ୍ପୂର୍ଣ୍ଣ ଗୁମସୁମ୍ ।

• ଗୁମସୁମ୍ ରହୁଛନ୍ତି ବିଦ୍ୟାଭାରତୀ

କାହା ସହ କଥା ହେଉନାହାନ୍ତି, କାହା ଆଡ଼କୁ ଚାହୁଁନାହାନ୍ତି। ଖାଲି ଜେଲ୍‌ର ଚଟାଣରେ ବସି ନିଜ ଭାଗ୍ୟକୁ ଆଦରି ରହିଛନ୍ତି । ସବୁଠୁ ବଡ଼ କଥା ହେଉଛି, ଦୁଇଦିନ ପରେ ବି ବିଦ୍ୟାଭାରତୀ ଏଯାଏଁ ଜେଲ୍‌ରୁ ବାହାରିବା ପାଇଁ ବେଲ୍ ଆବେଦନ ମଧ୍ୟ କରିନାହାନ୍ତି । ଆଉ ସବୁଠାରୁ ବଡ଼ ଟ୍ୱିଷ୍ଟ ହେଉଛି, ଡିଏଫ୍‌ଓ ସଂଗ୍ରାମ ବେହେରା ଓ ରୋଷେୟା ମନ୍ମଥ କୁମ୍ଭ ମଧ୍ୟ ଏବେ ସେହି ଜେଲ୍‌ର ଚାରିକାନ୍ଥ ଭିତରେ ଅଛନ୍ତି। ସ୍ୱାମୀ ଜୀବିତ ଥିବା ବେଳେ ଯେଉଁ କାହାଣୀ ବାହାରେ ଚାଲିଥିଲା, ସେହି ଚରିତ୍ରମାନେ ଏବେ ଗୋଟିଏ ଜେଲ୍ ଛାତ ତଳେ ଦିନ କାଟୁଛନ୍ତି । ତେବେ ପୁରୁଷ ଓ ମହିଳା ହାଜତ ଅଲଗା ଥିବାରୁ ସଂଗ୍ରାମ ଓ ବିଦ୍ୟାଙ୍କ ମଧ୍ୟରେ ଦେଖାସାକ୍ଷାତ୍ ହୋଇଛି ନା ନାହିଁ, ସେ ନେଇ ଜେଲ୍ ଭିତରେ ସସପେନ୍ସ ଜାରି ରହିଛି।

ପଢନ୍ତୁ ଏହି ଖବର: ଗିଡିପାବାଲିରେ ଉଦ୍ଧାର କାର୍ଯ୍ୟ ଜାରି: ଗୋଟିଏ ପରିବାରର ୫ ଜଣଙ୍କ ମୃତଦେହ ଉଦ୍ଧାର, ମୋଟ ମୃତ୍ୟୁ ସଂଖ୍ୟା ୭କୁ ବୃଦ୍ଧି

ସୌମ୍ୟରଞ୍ଜନଙ୍କ ମୃତ୍ୟୁକୁ ନେଇ ସୃଷ୍ଟି ହୋଇଥିବା କଳା ମେଘ ଏଯାଏଁ ସମ୍ପୂର୍ଣ୍ଣ ହଟିନି । ପତ୍ନୀ ବିଦ୍ୟାଭାରତୀ, ଡିଏଫ୍‌ଓ ସଂଗ୍ରାମ ଏବଂ ରୋଷେୟା ମନ୍ମଥ ଏବେ ଜେଲ୍‌ରେ ରହି ନ୍ୟାୟିକ ପ୍ରକ୍ରିୟାକୁ ସାମ୍ନା କରୁଛନ୍ତି । ତେବେ ସୌମ୍ୟରଞ୍ଜନଙ୍କ ମୃତ୍ୟୁ ପଛର ପ୍ରକୃତ ରହସ୍ୟ ଉପରୁ ପରଦା କେବେ ହଟୁଛି ଏବଂ ଆଇନ ଏହି ଅଭିଯୁକ୍ତଙ୍କ ବିରୋଧରେ କି ନିଷ୍ପତ୍ତି ନେଉଛି, ତାହା ଉପରେ ଏବେ ସାରା ଓଡ଼ିଶାବାସୀଙ୍କ ନଜର ।