Paneer Raid Odisha / ଭୁବନେଶ୍ଵରରୁ କଟକ ଓ ବ୍ରହ୍ମପୁର ସଵୁଠି ଭେଜାଲ୍ ପନିର; ଖାଇବା ଥାଳିରେ ପରସା ଯାଉଛି କି ବିଷ ?

ଖାଦ୍ୟ ସରୁକ୍ଷା ମାନକ ଅନୁସାରେ ଶୁଦ୍ଧ କ୍ଷୀରରୁ ପ୍ରସ୍ତୁତ ଛେନାରେ ତିଆରି ହୁଏ ପନିର । ଯାହା ଖାଇବା ପାଇଁ ଉପଯୋଗୀ । ହେଲେ ଅଳ୍ପ କ୍ଷୀରରୁ ଅଧିକ ପନିର ପ୍ରସ୍ତୁତ କରିବା ଉଦ୍ଦେଶ୍ୟରେ, ଅସାଧୁ ବ୍ୟବସାୟୀମାନେ ଏଥିରେ ମଇଦା କିମ୍ବା ଆରାରୁଟ୍ ପାଉଡର ମିଶାଉଛନ୍ତି । ଏପିରିକି ଏହାକୁ ଅଧିକ ସମୟ ତାଜା ରଖିବା ପାଇଁ ମାରାତ୍ମକ ରାସାୟନିକ ପଦର୍ଥ ମିଶାଉଥିବା ମଧ୍ୟ ଅନେକ ସମୟରେ ଅଭିଯୋଗ ହୁଏ । ସେହିଭଳି ନିର୍ଦ୍ଦିଷ୍ଟ ଅଭିଯୋଗ ପାଇବା ପରେ ଚଢ଼ାଉକୁ ଜୋରଦାର କରାଯାଇଛି ।

• ଟେଷ୍ଟ କରିବା ମାତ୍ରେ କଳା ପଡୁଛି ପନିର

ସୁସ୍ଥ ଓ ପୃଷ୍ଟିକର ଭାବି ଆପଣ ଯେଉଁ ପନିର କିମ୍ବା ଖୁଆ ଖାଉଛନ୍ତି, ତାହା ଗୁରୁତର ସ୍ବାସ୍ଥ୍ୟ ସମସ୍ୟା ସୃଷ୍ଟି କରିବ କି ନାହିଁ ବୋଲି ଏବେ ପ୍ରଶ୍ନ ଉଠିଛି । ବ୍ରହ୍ମପୁର ସହରର ଖାଲ୍ସା ସାହି, ଆଗା ସାହି, ମିଲେଟ୍ରି ଲାଇନ୍ ଓ ଏସଏନଟି ରାସ୍ତାରେ ଥିବା ୧୫ରୁ ଅଧିକ ଦୋକାନରେ ଚଢ଼ାଉ କରିଛି BEMC ଖାଦ୍ୟ ନିରାପତ୍ତା ବିଭାଗ । ଥାଳିରେ ରଖାଯାଇଥିବା ପନିର ଓ ଖୁଆ ଉପରେ ଆୟୋଡିନ୍ ପକାଇବା ମାତ୍ରେ ତାହା କଳା ପଡ଼ିଯାଇଥିଲା, ଯାହା ଅପମିଶ୍ରଣର ସ୍ପଷ୍ଟ ପ୍ରମାଣ । ସେହିପରି ଭୁବନେଶ୍ୱରର 'ଦି ୱାର୍ଲ୍ଡ ମଲ୍' ସମେତ ଅନେକ ରେଷ୍ଟୁରାଣ୍ଟରେ BMC ଫୁଡ୍ ସେଫଟି ଟିମ୍ ଚଢ଼ାଉ କରି ଜବତ କରିଛନ୍ତି ବିପୁଳ ପରିମାଣର ନକଲି ପନିର ଓ ଏକ୍ସପାୟରୀ କ୍ଷୀର ପ୍ୟାକେଟ୍ । ଯାହାକୁ ନଷ୍ଟ କରାଯିବା ସହ ପ୍ରସ୍ତୁତକାରୀଙ୍କ ଉପରେ ଜରିମାନା କରାଯାଇଛି ।

• ଅପମିଶ୍ରିତ ପନିର ଆସୁଛି କେଉଁଠୁ ?

କଟକ ସହରକୁ ନିଆଳି ଅଞ୍ଚଳରୁ ବିପୁଳ ପନିର ଆସୁଥିବା ସୂଚନା ମିଳିଥିଲା । ନିଆଳିର ନୂଆଗାଁ ସ୍ଥିତ ମିଲ୍କ ପାଉଡର ଗୋଦାମରୁ ମିଳିଛି ସାଂଘାତିକ ତଥ୍ୟ । ପ୍ରସ୍ତୁତକାରୀମାନେ ଅଧିକ ଲାଭ ଆଶାରେ ସ୍କିମ୍ଡ ମିଲ୍କ ପାଉଡର ମିଶାଉଛନ୍ତି । କେବଳ ସେତିକି ନୁହେଁ, ଅସାଧୁ ବ୍ୟବସାୟୀମାନେ କାଷ୍ଟିକ୍ ସୋଡା, ଲିକ୍ୱିଡ୍ ସୋପ୍, ୟୁରିଆ ଓ ବିଷାକ୍ତ କେମିକାଲ୍ସ ବ୍ୟବହାର କରି କ୍ଷୀର ଓ ପନିର ପ୍ରସ୍ତୁତ କରୁଥିବା ମଧ୍ୟ ଜଣାପଡ଼ିଛି ।

• ଶସ୍ତା ପନିର, ମାଲେମାଲ ବ୍ୟବସାୟୀ

ବଜାରରେ ନକଲି ପନିରର ଖେଳକୁ ବୁଝନ୍ତୁ । ହିସାବ ଅନୁସାରେ, ୧୦୦ ଲିଟର କ୍ଷୀରରୁ ମାତ୍ର ୧୮ କେଜି ଅସଲି ପନିର ପ୍ରସ୍ତୁତ ହୁଏ । ବଜାରରେ ଅସଲି ପନିର କିଲୋଗ୍ରାମ୍ ପ୍ରତି ୪୦୦ ଟଙ୍କାରୁ ଅଧିକରେ ବିକ୍ରି ହେଉଛି । ହେଲେ ଖୋଲା ବଜାରରେ ମାତ୍ର ୨୫୦ରୁ ୩୦୦ ଟଙ୍କାରେ ମିଳୁଛି ଭେଜାଲ ପନିର । ଶସ୍ତା ନକଲି ପନିର ଯୋଗୁଁ ମାଲେମାଲ ହେଉଛନ୍ତି ଅସାଧୁ ବ୍ୟବସାୟୀ । ସେପଟେ ବଜାରରେ ପଇସା ଦେଇ ରୋଗ କିଣୁଛନ୍ତି ଗ୍ରାହକ ।

ପଢନ୍ତୁ ଏହି ଖବର: 'ଆନାଲଗ ପନୀର'କୁ ସମ୍ପୂର୍ଣ୍ଣ ନିଷେଧ କଲେ ସରକାର; ବିକ୍ରି ଧରାପଡ଼ିଲେ ହେବ ଜେଲ୍

ଗୋଟିଏ ପଟେ ରାଜ୍ୟରେ ଡାଏରୀ କ୍ଷେତ୍ରର ବିକାଶ ପାଇଁ କେନ୍ଦ୍ର ସରକାର ୧୫୦୦ କୋଟିରୁ ଅଧିକ ଟଙ୍କା ଦେଇଛନ୍ତି । 'ମୁଖ୍ୟମନ୍ତ୍ରୀ କାମଧେନୁ ଯୋଜନା'ରେ ୧,୪୩୭ କୋଟି ଟଙ୍କା ବ୍ୟୟ କରାଯାଉଛି । ହେଲେ ଏତେ ସବୁ ପରେ ବି ଲୋକମାନେ ସୁସ୍ଥ ଓ ସ୍ୱଚ୍ଛ କ୍ଷୀର ପାଇବାରୁ ବଞ୍ଚିତ ହେଉଛନ୍ତି । FSSAI, ଟ୍ରେଡ୍ ମାର୍କ ଓ ମ୍ୟୁନିସିପାଲଟି ଲାଇସେନ୍ସ ନିୟମକୁ କଡ଼ାକଡ଼ି ନକଲେ, ଏହି ଲାଭଖୋର ମାନସିକତା ଲୋକଙ୍କ ଜୀବନ ସହ ଖେଳି ଚାଲିଥିବ ବୋଲି ଆଶଙ୍କା କରାଯାଉଛି ।