ଆନ୍ଧ୍ରପ୍ରଦେଶରେ ବଢ଼ୁଛି କୋଭିଡ୍ ସଂକ୍ରମଣ । ଏହାକୁ ଦୃଷ୍ଟିରେ ରଖି ଗଞ୍ଜାମ ଜିଲ୍ଲାରେ ସତର୍କତା ବଢ଼ାଇବାକୁ ନିର୍ଦ୍ଦେଶ ଦିଆଯାଇଛି । ସମସ୍ତ SARI ବା ଗୁରୁତର ଶ୍ୱାସକ୍ରିୟା ସଂକ୍ରମଣ ଥିବା ରୋଗୀଙ୍କର କୋଭିଡ୍ ପରୀକ୍ଷା ବାଧ୍ୟତାମୂଳକ କରାଯାଇଛି । ଇନଫ୍ଲୁଏଞ୍ଜା ସଦୃଶ ଲକ୍ଷଣ ଥିବା ରୋଗୀଙ୍କ ମଧ୍ୟରୁ ଅତି କମରେ ୫ ପ୍ରତିଶତଙ୍କର ନମୁନା ପରୀକ୍ଷା କରିବାକୁ କୁହାଯାଇଛି ।

ସମସ୍ତ ସ୍ୱାସ୍ଥ୍ୟ କେନ୍ଦ୍ରରେ ଆଇସୋଲେସନ ୱାର୍ଡ, ଅକ୍ସିଜେନ ବେଡ୍, ଅକ୍ସିଜେନ ପ୍ଲାଣ୍ଟ, ସିଲିଣ୍ଡର ଓ ଆବଶ୍ୟକ ଚିକିତ୍ସା ସାମଗ୍ରୀ ପ୍ରସ୍ତୁତ ରଖିବାକୁ ନିର୍ଦ୍ଦେଶ ଦିଆଯାଇଛି । ଆଶା ଓ ଏଏନଏମ୍ କର୍ମୀମାନେ ଗ୍ରାମ ସ୍ତରରେ ଜ୍ୱର କିମ୍ବା ଶ୍ୱାସକଷ୍ଟ ରୋଗୀଙ୍କୁ ଚିହ୍ନଟ କରି ସଚେତନତା ସୃଷ୍ଟି କରିବେ । ORS, ପାରାସିଟାମଲ, ଜିଙ୍କ୍‌, ଭିଟାମିନ-A, ଶ୍ୱାସକଷ୍ଟ ଔଷଧ, ଆଜିଥ୍ରୋମାଇସିନ୍ ଓ ଟିଟାନସ୍ ଟିକା ସହ ଆବଶ୍ୟକ ଔଷଧର ପର୍ଯ୍ୟାପ୍ତ ମହଜୁଦ ରଖିବାକୁ କୁହାଯାଇଛି । ପ୍ରତିଦିନ କୋଭିଡ୍ ପରୀକ୍ଷା, ହସ୍ପିଟାଲ ପ୍ରସ୍ତୁତି ଓ ଔଷଧ ମହଜୁଦ ସମ୍ପର୍କିତ ରିପୋର୍ଟ ଜିଲ୍ଲା ସ୍ୱାସ୍ଥ୍ୟ କାର୍ଯ୍ୟାଳୟକୁ ପଠାଇବାକୁ ନିର୍ଦ୍ଦେଶ ଦିଆଯାଇଛି ।

ଅଧିକ ପଢ଼ନ୍ତୁ: ଆଜି ଶ୍ରୀଜିଉଙ୍କ ନବଯୌବନ ଦର୍ଶନ, ଦର୍ଶନ ପାଇଁ ପୁରୀରେ ଶ୍ରଦ୍ଧାଳୁଙ୍କ ଭିଡ଼

ସେପଟେ କୋଭିଡ ସ୍ଥିତିକୁ ନେଇ ସ୍ବାସ୍ଥ୍ୟ ମନ୍ତ୍ରୀ ମୁକେଶ ମହାଲିଙ୍ଗ ବଡ଼ ବୈଠକ ଡାକିଛନ୍ତି । ଲୋକସେବା ଭବନରେ ସ୍ୱାସ୍ଥ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ବୈଠକ ବସିବ । ଏଥିରେ ସ୍ୱାସ୍ଥ୍ୟ ସଚିବ, ଜନ ସ୍ଵାସ୍ଥ୍ୟ ନିର୍ଦ୍ଦେଶକଙ୍କ ସହ ସ୍ୱାସ୍ଥ୍ୟ ବିଭାଗର ବରିଷ୍ଠ ଅଧିକାରୀ ସାମିଲ ହେବେ । ଆଗକୁ ରଥଯାତ୍ରା ଥିବାରୁ ଆଗୁଆ ଆଉ କ'ଣ ପଦକ୍ଷେପ ନିଆଯାଇପାରେ ସେ ପ୍ରସ୍ତୁତି ନେଇ ହେବ ଆଲୋଚନା । ଆନ୍ଧ୍ରରେ ଦୁଇ ଜଣଙ୍କ କୋଭିଡରେ ମୃତ୍ୟୁ ପରେ ଓଡ଼ିଶାର ସୀମାନ୍ତ ଜିଲ୍ଲା ଆଲର୍ଟରେ ରହିଛି ।