Rath Yatra Painting Competition 2026 / ଅର୍ଗସ ରଥଯାତ୍ରା ପେଣ୍ଟିଂ ପ୍ରତିଯୋଗିତା ୨୦୨୬; ବିଜୟିନୀ ହେଲେ ବିଷ୍ଣୁପ୍ରିୟା ମହାପାତ୍ର, ଜିତିଲେ ୧୧,୦୦୦ ପୁରସ୍କାର ରାଶି

ଭୁବନେଶ୍ଵର: ରାଜ୍ୟର କୁନି କୁନି ପିଲାଙ୍କ ମଧ୍ୟରେ ଲୁଚି ରହିଥିବା ପ୍ରତିଭାକୁ ଆହୁରି ପ୍ରୋତ୍ସାହିତ କରିବା ଲାଗି ଅର୍ଗସ ନ୍ୟୁଜ ଓ ସୌରଭ ଟେଷ୍ଟ ପେପର ପକ୍ଷରୁ ଆୟୋଜିତ ହୋଇଥିଲା 'ରଥଯାତ୍ରା ପେଣ୍ଟିଂ ପ୍ରତିଯୋଗିତା ୨୦୨୬' । ତେବେ ଆଜି ଅର୍ଗସ୍ ନ୍ୟୁଜ୍ ଅଫିସ ପରିସରରେ ବିଜେତାଙ୍କ ନାମ ଘୋଷଣା ହୋଇଛି । ଏହି ଚିତ୍ରାଙ୍କନ ପ୍ରତିଯୋଗିତାରେ ହଜାର ହଜାର ସଂଖ୍ୟାରେ କୁନି ପ୍ରତିଭା ଅଂଶଗ୍ରହଣ କରିଥିବାବେଳେ ଶ୍ରେଷ୍ଠ-୧୦ ଜଣଙ୍କୁ ଚୟନ କରାଯାଇଥିଲା ଓ ସେମାନଙ୍କ ମଧ୍ୟରୁ ୩ ଜଣ କୃତି ଛାତ୍ରଛାତ୍ରୀଙ୍କୁ ଆଜି ପୁରସ୍କୃତ କରାଯାଇଛି ।

ଚଳିତ ବର୍ଷ ରଥଯାତ୍ରା ଅବସରରେ ଏହି ଚିତ୍ରାଙ୍କନ ପ୍ରତିଯୋଗିତା ଅନୁଷ୍ଠିତ ହୋଇଥିଲା । ବିଶ୍ଵପ୍ରସିଦ୍ଧ ଘୋଷଯାତ୍ରାର ଅବିସ୍ମରଣୀୟ ମୁହୂର୍ତ୍ତ, ଉତ୍ସବର ଉଲ୍ଲାସ ଓ ମହାପ୍ରଭୁଙ୍କ ଅଲୌକିକ ଲୀଳାକୁ ନେଇ କୁନି କୁନି ପିଲାମାନେ ନିଜ ତୂଳିରେ ଅତି ସ୍ପଷ୍ଟ ଓ ସୁନ୍ଦର ଭାବେ ଚିତ୍ର ଆଙ୍କିଥିଲେ । ଏହା ଚିତ୍ର ତ ନୁହେଁ, ସତେ ଯେପରି ମହାପ୍ରଭୁଙ୍କ ଜୀବନ୍ତ ପ୍ରତିମା ଥିଲା । ଚତୁର୍ଥରୁ ଦଶମ ଶ୍ରେଣୀର ଛାତ୍ରଛାତ୍ରୀଙ୍କ ପାଇଁ ଏହି ପ୍ରତିଯୋଗିତା ରହିଥିଲା । ପିଲାମାନେ ମହାପ୍ରଭୁଙ୍କୁ ଏମିତି ରଙ୍ଗରେ ସଜାଇଥିଲେ ଯେ ସେଥିରେ ଝଲସିଥିଲା ଓଡ଼ିଆ ସଂସ୍କୃତି ଏବଂ କୋଟି କୋଟି ଓଡିଆଙ୍କ ଭକ୍ତି ।

• ଅଂଶଗ୍ରହଣ କରିଥିଲେ ୨୦୦୦ରୁ ଅଧିକ ଛାତ୍ରଛାତ୍ରୀ

ଅର୍ଗସ୍ ଓ ସୌରଭ ଟେଷ୍ଟ ପେପର ପକ୍ଷରୁ ଆୟୋଜିତ ଏହି ଚିତ୍ରାଙ୍କନ ପ୍ରତିଯୋଗିତାରେ ପ୍ରାୟ ୨୦୦୦ରୁ ଅଧିକ ଛାତ୍ରଛାତ୍ରୀ ଅଂଶଗ୍ରହଣ କରିଥିଲେ । କୁନି ପିଲାଙ୍କ ଚିତ୍ରାଙ୍କନର ମୂଲ୍ୟାଙ୍କନ କରିବା ଲାଗି ଜଜ୍ ସାଜିଥିଲେ ବି.କେ ଆର୍ଟ କଲେଜର ପ୍ରଫେସର ମୀନକେତନ ପଟ୍ଟନାୟକ । ତେବେ ଆଜି ପୁରସ୍କାର ପ୍ରଦାନ ଉତ୍ସବରେ ଉପସ୍ଥିତ ଥିଲେ ସୌରଭ ଟେଷ୍ଟ ପେପରର ମ୍ୟାନେଜିଂ ପାର୍ଟନର ସୌରଭ ବରାରିୱାଲା ଓ ନେହା ବରାରିୱାଲା । ଏହାସହିତ ଅର୍ଗସ ନ୍ୟୁଜର ମୁଖ୍ୟ ସମ୍ପାଦକ ଶିଶିର ଭଟ୍ଟମିଶ୍ର, କାର୍ଯ୍ୟକାରୀ ସମ୍ପାଦକ ଦୁର୍ଗାଶିଷ, ଅର୍ଗସ ଡିଜିଟାଲର କାର୍ଯ୍ୟକାରୀ ସମ୍ପାଦକ ସଂଗ୍ରାମ ଷଡ଼ଙ୍ଗୀ ମଧ୍ୟ ଉପସ୍ଥିତ ଥିଲେ ।

ପଢନ୍ତୁ ଏହି ଖବର: ବର୍ଷକରେ କଲେଜରେ ହେବ ୭୦୦ ଅଧ୍ୟାପକ ଓ ୧୪୦୦ ପ୍ରଫେସର ନିଯୁକ୍ତି: ଉଚ୍ଚଶିକ୍ଷା ମନ୍ତ୍ରୀ

• ୩ ବିଜେତା ପୁରସ୍କୃତ

ଏହି ପ୍ରତିଯୋଗିତାର ପ୍ରଥମ ବିଜେତା ହେଲେ ମୟୂରଭଞ୍ଜର ବିଷ୍ଣୁପ୍ରିୟା ମହାପାତ୍ର । ଦ୍ବିତୀୟ ବିଜେତା ହେଲେ କଟକର ସୌମ୍ୟ ରଞ୍ଜନ ଦାସ ଏବଂ ତୃତୀୟ ବିଜେତା ହେଉଛନ୍ତି ସମ୍ବିତ ସୌମ୍ୟ ଦର୍ଶନ ସାହୁ । ଏହି ଶ୍ରେଷ୍ଠ ୩ ବିଜେତାଙ୍କୁ ପୁରସ୍କାର ରାଶି ମଧ୍ୟ ପ୍ରଦାନ କରାଯାଇଥିଲା । ପ୍ରଥମ ବିଜେତାଙ୍କୁ ୧୧,୦୦୦ ଟଙ୍କା ପୁରସ୍କାର ରାଶି ପ୍ରଦାନ କରାଯାଇଥିବାବେଳେ ଦ୍ବିତୀୟ ଓ ତୃତୀୟ ବିଜେତାଙ୍କୁ ୫,୧୦୦ ଟଙ୍କା ଲେଖାଏଁ ପ୍ରଦାନ କରାଯାଇଛି । ୩ ବିଜେତାଙ୍କ ବ୍ୟତୀତ ଶ୍ରେଷ୍ଠ-୧୦ରେ ପହଞ୍ଚିଥିବା କୃତି ଅଂଶଗ୍ରହଣକାରୀମାନେ ହେଉଛନ୍ତି ଏସ.କେ ଆହିଲ ଫୈଜ, ଅଙ୍କିତା ମହାନ୍ତି, ସାଇ ସ୍ଵରୂପା ପରିଡ଼ା, ଶର୍ମିଷ୍ଠା ମହାରଣା, ଶ୍ରୀତମ ପୂଜାରୀ, ଲକ୍ଷ୍ଣୀପ୍ରିୟା ବିଶ୍ଵାଳ ଏବଂ ସିନ୍ଧୁସ୍ମିତା ସାହୁ । ତେବେ କୃତି ଛାତ୍ରଛାତ୍ରୀଙ୍କୁ Argus News ଓ ସୌରଭ ଟେଷ୍ଟ ପେପର ପକ୍ଷରୁ ଢେର ସାରା ଅଭିନନ୍ଦନ ।