ହଟ୍ଟଗୋଳରେ ଆରମ୍ଭ ହୋଇଥିବା ବିଧାନସଭା କାର୍ଯ୍ୟ ଶେଷ ହୋଇଛି ଅଧରାତିରେ । ଗତକାଲି ରାତି ପ୍ରାୟ ୧୨ଟା ୩୯ ପର୍ଯ୍ୟନ୍ତ ଚାଲିଥିଲା ସରଗରମ ଆଲୋଚନା । ବିରୋଧୀଙ୍କ ପ୍ରବଳ ହଟ୍ଟଗୋଳ ଓ ଶାସକ ଦଳର ଯୁକ୍ତି ଭିତରେ ଗୃହରେ ପାରିତ ହୋଇଛି ‘ସରକାରୀ ବିଶ୍ୱବିଦ୍ୟାଳୟ ଶିକ୍ଷକ ନିଯୁକ୍ତି ବିଲ୍-୨୦୨୬’ । ବାଦ ବିବାଦ ଭିତରେ ବିଧାୟକ ଓ ମନ୍ତ୍ରୀଙ୍କ ଦରମା ବୃଦ୍ଧି ବିଲ୍‌କୁ ମଧ୍ୟ ସରକାର ପ୍ରତ୍ୟାହାର କରି ନେଇଛନ୍ତି । ଅନ୍ୟପଟେ ନିର୍ଦ୍ଧାରିତ ସମୟ ପୂର୍ବରୁ ଗୃହକୁ ବନ୍ଦ କରିବା ନେଇ ଶାସକ ବିଜେପି ଏବଂ ବିରୋଧୀ ବିଜେଡି-କଂଗ୍ରେସ ମଧ୍ୟରେ ତୀବ୍ର ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଛି ।

୪ ଘଣ୍ଟାର ସରଗରମ ଆଲୋଚନା । ତର୍କ କରୁଥାନ୍ତି ବିରୋଧୀ । ଉତ୍ତର ରଖୁଥାନ୍ତି ଉଚ୍ଚଶିକ୍ଷା ମନ୍ତ୍ରୀ । ମଙ୍ଗଳବାର ରାତି ୧୨.୩୯ ପର୍ଯ୍ୟନ୍ତ ବିଧାନସଭା ଚାଲିଥିବା ବେଳେ ଶିକ୍ଷକ କ୍ୟାଡରରେ ସଂରକ୍ଷଣ ବିଧେୟକ ୨୦୨୬ ବିଲ୍‌ ଉପରେ ଏଭଳି ଆଲୋଚନା ଦେଖିବାକୁ ମିଳିଥିଲା । ତେବେ ବିରୋଧୀଙ୍କ ବିରୋଧ ସତ୍ତ୍ବେ ଶାସକ ଦଳ ବିଧାୟକଙ୍କ ସମର୍ଥନ ଯୋଗୁଁ ଗୃହରେ ପାରିତ ହୋଇଛି ଏହି ବିଲ୍‌ । ଏହା ସହ ବିଧାୟକ, ମନ୍ତ୍ରୀ, ବାଚସ୍ପତି ଓ ଉପବାଚସ୍ପତିଙ୍କ ଦରମା, ଭତ୍ତା ଓ ପେନସନ୍‌ ସଂଶୋଧନ ବିଲ୍ ୨୦୨୫ ବି ପ୍ରତ୍ୟାହାର ହୋଇଛି । ଯାହାକୁ ସ୍ୱାଗତ କରିଛନ୍ତି ୩ ରାଜନୈତିକ ଦଳ ।

ଅଧିକ ପଢ଼ନ୍ତୁ: ଜିଲ୍ଲା ଯୋଜନା ବୋର୍ଡ ଗଠନ କଲେ ସରକାର, ୪ ମନ୍ତ୍ରୀ ଓ ୨୬ ବିଧାୟକ ହେଲେ ଅଧ୍ୟକ୍ଷ

ଫେବ୍ରୁଆରୀ ୧୭ରୁ ଆରମ୍ଭ ହୋଇଥିଲା ପ୍ରଥମ ପର୍ଯ୍ୟାୟ ବଜେଟ ଅଧିବେଶନ । ଚାଷୀ ପ୍ରସଙ୍ଗ ଉଠାଇ ପ୍ରଥମ ଦିନରୁ ଗୃହକୁ ଅଚଳ କରିଥିଲେ ବିରୋଧୀ ବିଜେଡି ଓ କଂଗ୍ରେସ । ଧୋଇ ହୋଇଯାଇଥିଲା ପ୍ରଶ୍ନକାଳ ଓ ଶୂନ୍ୟକାଳ । ରାଜ୍ୟସଭା ନିର୍ବାଚନ ପରେ ମାର୍ଚ୍ଚ ୧୭ରୁ ଏସସିବି ଅଗ୍ନିକାଣ୍ଡ ପ୍ରସଙ୍ଗ ନେଇ ପୁଣି ଗୃହକୁ ଅଚଳ କରିଥିଲେ ବିରୋଧୀ । ଏପ୍ରିଲ ୮ ପର୍ଯ୍ୟନ୍ତ ଗୃହ କାର୍ଯ୍ୟ ଚାଲିବା ପାଇଁ ତାରିଖ ଧାର୍ଯ୍ୟ ଥିବା ବେଳେ ଏହା ପୂର୍ବରୁ ବିଧାନସଭା ବନ୍ଦ ପାଇଁ ସରକାରଙ୍କୁ ସମାଲୋଚନା କରିଛି ବିଜେଡି । କଂଗ୍ରେସ ବି ବିଜେଡି ସ୍ୱରରେ ସ୍ୱର ମିଳାଇଥିବା ବେଳେ ବିଜେପି ଏହାର ଜବାବ ରଖିଛି ।

ଚଳିତ ଅଧିବେଶନରେ ଅଧିକାଂଶ ଦିନ ବିରୋଧୀଙ୍କ ହୋ ହାଲ୍ଲାରେ ଗୃହ କାର୍ଯ୍ୟ ଧୋଇ ହୋଇଯାଇଥିବା ବେଳେ ଗୃହରେ ବିଜେଡି-କଂଗ୍ରେସ ଏକ ହେବା ଦୃଶ୍ୟ ଦେଖିବାକୁ ମିଳିଥିଲା । ଏହା ଆଗକୁ ସରକାର ବିରୋଧରେ ନୂଆ ରାଜନୈତିକ ସମୀକରଣ ସୃଷ୍ଟି କରୁଛି ନା ନିଜ ଦଳକୁ ଭାଙ୍ଗୁଛି ତାହା ଦେଖିବାକୁ ଅପେକ୍ଷା ।