ଦୁଇ ସପ୍ତାହ ଭିତରେ ଛଅ ଛଅ ଥର ଓଡ଼ିଶା ସୀମାରେ ଅନୁପ୍ରବେଶ ପାଇଁ ଉଦ୍ୟମ

ଅର୍ଗସ ବ୍ୟୁରୋ : ଓଡ଼ିଶା ସୀମାରେ ଆନ୍ଧ୍ରର ଦାଦାଗିରି । ଦୁଇ ସପ୍ତାହ ଭିତରେ ଛଅ ଛଅ ଥର ଅନୁପ୍ରବେଶ ପାଇଁ ଉଦ୍ୟମ । ଏବେ ଖୁଲମଖୁଲ୍ଲା କୋଟିଆରେ ଆନ୍ଧ୍ର ଆୟୋଜନ କରିଛି ଭୋଟର ସଚେତନତା ଶିବିର । ନିଜ ରାଜ୍ୟରେ ମତଦାନକୁ ୮୦ ପ୍ରତିଶତକୁ ବୃଦ୍ଧି କରିବା ଉଦ୍ଦେଶ୍ୟରେ ଓଡ଼ିଶା ସୀମାରେ ଆସି ଲୋକଙ୍କୁ ଭୋଟ ଦେବାକୁ ପ୍ରବର୍ତ୍ତାଉଛି ଆନ୍ଧ୍ର । ହେଲେ ଏ ଦିଗରେ ଜିଲ୍ଲା ପ୍ରଶାସନ କୌଣସି କାର୍ଯ୍ୟାନୁଷ୍ଠାନ ନେଇନଥିବା ଦେଖିବାକୁ ମିଳିଛି । 

କୋଟିୟା ପୁଞ୍ଜ ଫାଟୁ ସିନେରି ଠାରେ ବୁଧବାର ଆନ୍ଧ୍ର ପ୍ରଦେଶ ପକ୍ଷରୁ ଅନୁଷ୍ଠିତ ବୈଠକରେ ଆନ୍ଧ୍ର ପ୍ରଦେଶ ମନ୍ୟୁମ ଜିଲ୍ଲା ତଥା ପାର୍ବତି ପୁରମ ଜିଲ୍ଲା ସ୍ୱିପ୍ ନୋଡାଲ ଅଫିସର ଏ ରାଜଶେଖର ରେଡ୍ଡୀ ଏବଂ ମହିଳା ଓ ଶିଶୁ କଲ୍ୟାଣ ବିଭାଗ ଉନ୍ନୟନ ଅଧିକାରୀ ବି ସତ୍ୟବତୀ, ଆଇସିଡିଏସ ଏ.ବିଜୟଲକ୍ଷ୍ମୀ ଯୋଗ ଦେଇ ଏହି କାର୍ଯ୍ୟକ୍ରମ କରାଇଥିଲେ। କିଛି ଦିନ ପୂର୍ବରୁ କୋଟିଆ ପଞ୍ଚାୟତ ଉପର ସେମ୍ବି, ତଳ ସେମ୍ବି ଓ ଧୂଳିପଦର ଗାଁରେ ପୋଲିଓ କ୍ୟାମ୍ପ୍ କରିଥିଲା ଆନ୍ଧ୍ରର ସ୍ବାସ୍ଥ୍ୟ ଟିମ୍ । 

ଅଧିକ ପଢନ୍ତୁ ଓଡ଼ିଶା ଖବର

କୋଟିଆ ନେରେଡ଼ି ୱାଲସା ସାପ୍ତାହିକ ହାଟରେ ଆନ୍ଧ୍ର ପକ୍ଷରୁ କରାଯାଇଥିଲା ପୋଲିସ ଓ ସ୍ବାସ୍ଥ୍ୟ ଶିବିର । ସାଲୁରୁ ପୋଲିସ ପକ୍ଷରୁ ଓଡ଼ିଶାର ଯୁବକଙ୍କୁ ଛତା, ରାସନ ଓ ଭଲିବଲ୍ କିଟ୍ ବି ବଣ୍ଟାଯାଇଥିଲା । ବାରମ୍ବାର ଆନ୍ଧ୍ର ଓଡ଼ିଆଙ୍କ ହକ୍ ଓ ଆତ୍ମସ୍ବାଭିମାନ ଉପରେ କୁଠାରଘାତ କରୁଥିବା ବେଳେ ୨୪ ବର୍ଷର ଅପାରଗ ସରକାର ଏ ଦିଗରେ ସାଜିଛନ୍ତି ନିଦାବିଷ୍ଣୁ ।