ଅର୍ଗସ ବ୍ୟୁରୋ : ବଲାଙ୍ଗିର ବେଲପଡ଼ା ବ୍ଲକ ସୁଲେକେଲାରୁ ଆସିଛି ଦାଦନ ଯନ୍ତ୍ରଣାର କରୁଣ କାହାଣୀ । ପରିବାର ସହ ତେଲେଙ୍ଗାନାକୁ ଦାଦନ ଖଟିବାକୁ ଯାଇଥିଲେ କାହ୍ନୁ ମଲ୍ଲିକ । ଇଟା ଭାଟିରେ କାମ କରିବା ବେଳେ ମାଲିକ ନିର୍ଯାତନା ଦେଉଥିଲା । ଦେହ ଅସୁସ୍ଥ ହେବା ପରେ ବି କାମ କରିବାକୁ ବାଧ୍ୟ କରୁଥିଲା । ଗୁରୁତର ହେବା ପରେ ଘରକୁ ପଠାଇ ଦେଲା ଭାଟି ମାଲିକ । ଆଉ ଘରେ ପହଞ୍ଚିବା ପରେ କାହ୍ନୁଙ୍କର ମୃତ୍ୟୁ ହୋଇଛି । ଏତିକିରେ ସରିନାହିଁ ଏ ପରିବାରର ଦୁର୍ଦ୍ଦଶା । ବାପାର ମୃତ୍ୟୁ ପରେ ୧୨ ବର୍ଷର ଝିଅକୁ ବନ୍ଧକ ରଖି ଟଙ୍କା ମାଗୁଛି ଭାଟି ମାଲିକ । 

ଝିଅକୁ ଉଦ୍ଧାର ସହ ଦାଦନ ସର୍ଦ୍ଦାରକୁ ଗିରଫ ଓ ପରିବାରକୁ କ୍ଷତିପୂରଣ ଦାବିରେ ମୃତଦେହ ରଖି ଧାରଣା ଦେଇଛନ୍ତି ପରିବାର ଲୋକେ । ତୁରନ୍ତ ଏ ନେଇ ପଦକ୍ଷେପ ନେବାକୁ ଦାବି କରିଛି କୋଶଳ ମୁକ୍ତି ମୋର୍ଚ୍ଚା । ଗତ ସପ୍ତାହରେ ଆନ୍ଧ୍ରପ୍ରଦେଶ ବିଜୟନଗରମ୍ କୁ ଦାଦନ ଖଟିବାକୁ ଯାଇ ଶବ ହୋଇ ଫେରିଥିଲେ ବଲାଙ୍ଗିର ଜିଲ୍ଲା ମୁରିବାହାଲ ଥାନା ବାନ୍ଦୁପଳା ପଂଚାୟତ କଚେରଭାଡ଼ି ଗାଁର ବନିତା ମହାନନ୍ଦ । ଦାଦନ ଯନ୍ତ୍ରଣାର ଦୁଃଖ ଦେଖିବାକୁ ମିଳିଛି ମୁଖ୍ୟମନ୍ତ୍ରୀଙ୍କ ଜିଲ୍ଲା ଗଞ୍ଜାମ ପାତ୍ରପୁର ବ୍ଲକ୍ ପାତ୍ରପୁର ଗାଁର । 

ଦାଦନ ଖଟିବାକୁ ଯାଇଥିବା ଡମ୍ବରୁ ସେଠୀଙ୍କ ୧୯ ବର୍ଷର ପୁଅ ଦୀପକ ଗତ ଜାନୁଆରୀ ପ୍ରଥମ ସପ୍ତାହରେ ଶବ ହୋଇ ଫେରିଥିଲେ । ଏକ ଘରୋଇ କମ୍ପାନୀରେ କାମ କରୁଥିବା ଦୀପକ ଡିସେମ୍ବର ୩୦ ତାରିଖରେ ହଠାତ୍ ଅସୁସ୍ଥ ହୋଇପଡ଼ିଥିଲେ । ରାତିରେ ମୃତ୍ୟୁ ହେଲା । ମୃତଦେହ ଆଣିବାକୁ ପ୍ରଶାସନ କୌଣସି ସାହାଯ୍ୟ କଲାନାହିଁ । ଧାର କରଜ କରି ଆମ୍ବୁଲାନ୍ସ ଯୋଗେ ୪ ଦିନ ପରେ ଶବ ଆଣିଲେ ପରିବାର ଲୋକେ ।  

ଅଧିକ ପଢନ୍ତୁ ଓଡ଼ିଶା ଖବର

ରାଜ୍ୟରେ ଅପାର ସମ୍ଭାବନା, ମାଳ ମାଳ ସରକାରୀ ଯୋଜନା । ତଥାପି ୨୪ ବର୍ଷର ବିଜେଡି ସରକାରର ଅପାରଗତା କାରଣରୁ ଲକ୍ଷ ଲକ୍ଷ ଓଡ଼ିଆ ଭୋଗୁଛନ୍ତି ଦାଦନ ଦୁର୍ଦ୍ଦଶା । କିନ୍ତୁ ଶୁଣନ୍ତୁ ଅପାରଗତା ଲୁଚାଇବାକୁ କିଛି ଦିନ ତଳେ କେମିତି ବାହାସ୍ଫଟ ମାରିଥିଲେ ରାଜ୍ୟର ଶ୍ରମମନ୍ତ୍ରୀ ସାରଦା ନାୟକ । ବଲାଙ୍ଗୀରରୁ ନେଇ ଗଞ୍ଜାମ ଯାଏଁ ଦାଦନ ଯନ୍ତ୍ରଣାର ଏ ସବୁ ଉଦାହରଣ ଦେଖିବା ପରେ ଏବେ ଜବାବ ଦିଅନ୍ତୁ ସାରଦା ନାୟକ, ଦାଦନ ବଡ଼ ପ୍ରସଙ୍ଗ ନା ନୁହେଁ ?