Flood Tragedy / ବନ୍ୟାରେ ଶୌଚ ଯନ୍ତ୍ରଣା; ପୁଅ ଓ ଶାଶୁଙ୍କ ବଞ୍ଚାଇବାକୁ ଯାଇ ଚାଲିଗଲା ମାଆର ଜୀବନ

ବାଲେଶ୍ଵର: ବନ୍ୟାର ପ୍ରଳୟଙ୍କରୀ ରୂପ କେବଳ ଘରଦ୍ୱାର ଭାଙ୍ଗିନି କି ଚାଷଜମି ଉଜାଡ଼ିନି, ଓଡ଼ିଶାର ବନ୍ୟାଞ୍ଚଳରେ ସୃଷ୍ଟି କରିଛି ଏକ ବଡ଼ ଦୁର୍ଦ୍ଦଶା । ଆଉ ତାହା ହେଉଛି- ‘ଶୌଚାଳୟ ସମସ୍ୟା’ । ପାଣି ଭିତରେ ଫସି ରହିଥିବା ବିପନ୍ନଙ୍କ ପାଇଁ ଏବେ ଶୌଚ ହେବା ଏକ ବଡ଼ ଚ୍ୟାଲେଞ୍ଜ ସାଜିଛି । ଆଉ ଏହି ଶୌଚାଳୟ ସମସ୍ୟା ଦିନକ ତଳେ ବାଲେଶ୍ୱର ଭୋଗରାଇରେ ନେଇଛି ଜଣେ ମା’ର ଜୀବନ । କେନ୍ଦ୍ରାପଡ଼ାରୁ ଯାଜପୁର... ଚାରିଆଡ଼େ ଶୌଚାଳୟ ପାଣିରେ ବୁଡ଼ି ରହିଥିବାରୁ ମହିଳା ଓ ବିପନ୍ନମାନେ କିଭଳି ନାହିଁ ନଥିବା ଯନ୍ତ୍ରଣା ଭୋଗୁଛନ୍ତି ।

ଚାରିଆଡ଼େ ବନ୍ୟାର କରାଳ ରୂପ । ଘରଦ୍ୱାରରୁ ରାସ୍ତାଘାଟ, ସବୁଠି କେବଳ ପାଣି ଆଉ ପାଣି । ଆଉ ଏହି ବନ୍ୟାଜଳ ହିଁ ଦିନକ ତଳେ ଏକ ହସଖୁସିର ପରିବାରରେ ଢାଳିଦେଇଛି ବିଷାଦର ଲୁହ । ବାଲେଶ୍ୱର ଭୋଗରାଇ ବ୍ଲକ୍ କୁଳିଦା ଗାଁରେ ଘଟିଛି ଏକ ଅତ୍ୟନ୍ତ ହୃଦୟବିଦାରକ ଘଟଣା । ରାତିରେ ଘରଦ୍ୱାର ବନ୍ୟାଜଳରେ ବୁଡ଼ିଯାଇଥିବା ବେଳେ ସୁମତି ଜେନା ନିଜ ସାନ ପୁଅକୁ ଶୌଚ କରାଇବା ପାଇଁ ଶାଶୁଙ୍କ ସହ ଘର ଆଗରେ ଥିବା ଡଙ୍ଗା ପାଖକୁ ନେଇଯାଇଥିଲେ ।

ଏଥିସହ ପଢ଼ନ୍ତୁ: ଆଉ ଚଳିବନି ମନମାନି; ପାନୀୟ ଜଳ ପ୍ରକଳ୍ପ ନ ସରିଲେ ସିଧା ଏତଲା 

ହେଲେ ହଠାତ୍ ଭାରସାମ୍ୟ ହରାଇ ପୁଅ ଡଙ୍ଗାରୁ ବନ୍ୟାପାଣିକୁ ଖସି ପଡ଼ିଥିଲା । ନାତିକୁ ବଞ୍ଚାଇବାକୁ ଯାଇ ଶାଶୁ ବି ପାଣିରେ ଫସି ଯାଇଥିଲେ । ନିଜ ଜୀବନକୁ ବାଜି ଲଗାଇ ସୁମତି ସାହସର ସହ ପୁଅ ଓ ଶାଶୁଙ୍କୁ ପାଣିରୁ ସୁରକ୍ଷିତ ଉଦ୍ଧାର କରିଦେଲେ ସିନା, ହେଲେ ପ୍ରବଳ ସ୍ରୋତରେ ନିଜେ ବୁଡ଼ିଗଲେ । ଗ୍ରାମବାସୀ ତାଙ୍କୁ ଉଦ୍ଧାର କରି ହସ୍ପିଟାଲ ନେଇଥିଲେ ବି ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।

ସୁମତିଙ୍କ ଏହି କରୁଣ ମୃତ୍ୟୁ ବନ୍ୟାଞ୍ଚଳରେ ଉପୁଜିଥିବା ଗମ୍ଭୀର ଶୌଚାଳୟ ସମସ୍ୟା ଉଜାଗର କରିଛି । କେନ୍ଦ୍ରାପଡ଼ାରୁ ଯାଜପୁର... ଚାରିଆଡ଼େ ବନ୍ୟାପାଣି ଜମିରହିଥିବାରୁ ଶୌଚାଳୟ ସବୁ ବୁଡ଼ି ରହିଛି । ପୋଖରୀ ଓ ନଳକୂପରେ ଦୂଷିତ ପାଣି । ଯାଜପୁର ଦଶରଥପୁର ବ୍ଲକ୍‌ର ୬୨ଟି ଗାଁର ଲୋକେ ଶୌଚ ପାଇଁ ନାହିଁ ନଥିବା ଦୁର୍ଦ୍ଦଶା ଭୋଗୁଛନ୍ତି ।

ଡୋଭାବିଲ ପାଟଣା ନଦୀବନ୍ଧ ଉପରେ ପ୍ରଶାସନ ଅସ୍ଥାୟୀ ଶୌଚାଳୟ କରିଛି ସତ, ହେଲେ ତାହା ପର୍ଯ୍ୟାପ୍ତ ନୁହେଁ । ପାଣି ଭିତରେ ସାପ, ବେଙ୍ଗ ଓ ଗୋଧି ଭଳି ବିଷାକ୍ତ ସରୀସୃପଙ୍କ ଭୟ ଥିଲେ ବି ମହିଳାମାନେ ଜୀବନକୁ ବାଜି ଲଗାଇ ଶୌଚ ପାଇଁ ଯାଉଛନ୍ତି । କିଛି ସ୍ଥାନରେ ଲୋକେ ବାଧ୍ୟ ହୋଇ ପଲିଥିନରେ ଶୌଚ କରି ଭସାଇ ଦେଉଥିବା ଭଳି ଚିତ୍ର ସାମ୍ନାକୁ ଆସିଛି ।

ଏଥିସହ ପଢ଼ନ୍ତୁ: ପ୍ଲାଟଫର୍ମରେ ଥିବା ରେଷ୍ଟରୁମ୍‌ରେ ମହିଳାଙ୍କୁ ରେଲୱେ କର୍ମଚାରୀଙ୍କ ଦୁଷ୍କର୍ମ ଅଭିଯୋଗ 

ବନ୍ୟାଞ୍ଚଳରେ ସାନିଟେସନ୍ ସମସ୍ୟାକୁ ନେଇ ବାଲେଶ୍ୱର ଅତିରିକ୍ତ ଜିଲ୍ଲାପାଳ କହିଛନ୍ତି, "ପ୍ରଶାସନ ପକ୍ଷରୁ ସମସ୍ତ ବାତ୍ୟା ଆଶ୍ରୟସ୍ଥଳୀ ଓ ଟେମ୍ପରାରୀ ସେଡ୍‌ଗୁଡ଼ିକରେ ଶୌଚାଳୟ ବ୍ୟବସ୍ଥା କରାଯାଇଛି । ଏହାସହ ଭ୍ରାମ୍ୟମାଣ ଶୌଚାଳୟ ବ୍ୟବସ୍ଥା ମଧ୍ୟ ହୋଇଛି । ମହିଳାଙ୍କ ସୁରକ୍ଷା ଓ ସ୍ୱାସ୍ଥ୍ୟ ପାଇଁ ଆଶା ଦିଦି ଓ ସ୍ୱାସ୍ଥ୍ୟମିତ୍ରମାନେ କାର୍ଯ୍ୟ କରୁଛନ୍ତି ଏବଂ ସାନିଟାରୀ ନ୍ୟାପକିନ୍ ଯୋଗାଇ ଦିଆଯାଉଛି ।"

ସୁମତିଙ୍କ ଆତ୍ମବଳିଦାନ ଆମ ବ୍ୟବସ୍ଥା ପ୍ରତି ଏକ ବଡ଼ ଚେତାବନୀ । କେବଳ ରିଲିଫ୍ ନୁହେଁ, ବନ୍ୟା ସମୟରେ ବିପନ୍ନଙ୍କ ପାଇଁ ଶୌଚାଳୟ ଓ ବିଶୁଦ୍ଧ ପାନୀୟ ଜଳର ସ୍ଥାୟୀ ବ୍ୟବସ୍ଥା ନକଲେ, ଆଗକୁ ଏଭଳି ଅନେକ ଅମୂଲ୍ୟ ଜୀବନ ଚାଲିଯିବ ।