Restoration Work / ପୁନରୁଦ୍ଧାର କାର୍ଯ୍ୟକୁ ଅଧିକ ସୁଦୃଢ଼ କରିବା ପାଇଁ ବ୍ରହ୍ମପୁରକୁ ଆଉ ୫ ଜଣ ଯନ୍ତ୍ରୀ ନିୟୋଜିତ

ଭୁବନେଶ୍ୱର: ବାତ୍ୟା ‘ଅର୍ଣ୍ଣବ’ ପରବର୍ତ୍ତୀ ବନ୍ୟା ପରିସ୍ଥିତିର ମୁକାବିଲା, ରିଲିଫ୍ ଓ ପୁନରୁଦ୍ଧାର କାର୍ଯ୍ୟକୁ ଅଧିକ ତ୍ୱରାନ୍ୱିତ ଏବଂ ସୁଦୃଢ଼ କରିବା ଉଦ୍ଦେଶ୍ୟରେ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ପକ୍ଷରୁ ବିଭିନ୍ନ ସହରାଞ୍ଚଳ ସ୍ଥାନୀୟ ସଂସ୍ଥା (ULB)ରୁ ଆଉ ୫ ଜଣ ଯନ୍ତ୍ରୀଙ୍କୁ ବ୍ରହ୍ମପୁର ମହାନଗର ନିଗମରେ ନିୟୋଜିତ କରାଯାଇଛି ।

ବ୍ରହ୍ମପୁରରେ ପୂର୍ବରୁ ଚାଲିଥିବା ରିଲିଫ୍ ଓ ପୁନରୁଦ୍ଧାର କାର୍ଯ୍ୟରେ ଅଧିକ ବୈଷୟିକ ସହାୟତା ଯୋଗାଇଦେବା ସହ ତୃଣମୂଳ ସ୍ତରରେ କାର୍ଯ୍ୟକୁ ଅଧିକ ଗତିଶୀଳ କରିବା ଏହି ଅତିରିକ୍ତ ନିୟୋଜନର ଉଦ୍ଦେଶ୍ୟ ରହିଛି । ଏହି ଯନ୍ତ୍ରୀମାନଙ୍କ ସେବା ବ୍ରହ୍ମପୁର ମହାନଗର ନିଗମର କମିଶନରଙ୍କ ଅଧୀନରେ ନ୍ୟସ୍ତ କରାଯାଇଛି । ସେମାନେ ୧ ନଭେମ୍ବର ୨୦୨୬ ଅପରାହ୍ନଠାରୁ ନିଜ ନିଜର ବର୍ତ୍ତମାନର ଦାୟିତ୍ୱରୁ କେନ୍ଦ୍ରୀୟ ଭାବେ ଅବ୍ୟାହତ ହୋଇ ନୂତନ ଦାୟିତ୍ୱରେ ଯୋଗଦେବେ ।

• କିଏ ସେହି ୫ ଯନ୍ତ୍ରୀ ?

ନିୟୋଜିତ ଯନ୍ତ୍ରୀମାନେ ହେଲେ ଆଠଗଡ଼ ଏନ୍‌ଏସିର ସହକାରୀ ଯନ୍ତ୍ରୀ ଅଜୟ କୁମାର ଜାନୀ, କେଏମ୍‌ସିର କନିଷ୍ଠ ଯନ୍ତ୍ରୀ ରଶ୍ମି ରଞ୍ଜନ ବେହେରା, ଗୁଣୁପୁର ପୌରପାଳିକାର ସହକାରୀ ଯନ୍ତ୍ରୀ ଆଦିତ୍ୟ ମିଶ୍ର, ପୁରୀ ମହାନଗର ନିଗମର କନିଷ୍ଠ ଯନ୍ତ୍ରୀ ବିଶ୍ୱରଞ୍ଜନ ପରିଡ଼ା ଏବଂ ଛତ୍ରପୁର ପୌରପାଳିକାର କନିଷ୍ଠ ଯନ୍ତ୍ରୀ ଭବାନୀ ଶଙ୍କର ବେହେରା । ବାତ୍ୟା ପ୍ରଭାବିତ ବ୍ରହ୍ମପୁରରେ ଜନସାଧାରଣଙ୍କୁ ଆବଶ୍ୟକୀୟ ସହାୟତା ଯୋଗାଇଦେବା, ଜରୁରୀକାଳୀନ କାର୍ଯ୍ୟରେ ବୈଷୟିକ ସହଯୋଗ ବଢ଼ାଇବା ଏବଂ ସ୍ୱାଭାବିକ ସ୍ଥିତିର ଶୀଘ୍ର ପୁନରୁଦ୍ଧାର ସୁନିଶ୍ଚିତ କରିବା ଦିଗରେ ବିଭାଗର ଏହି ପଦକ୍ଷେପ ସହାୟକ ହେବ ।

• ଶେରଗଡ଼ରେ ବନ୍ୟା ବିଭୀଷିକାର ବିକଳ ଚିତ୍ର

ଗଞ୍ଜାମ ଜିଲ୍ଲା ଶେରଗଡ଼ ଅଞ୍ଚଳରେ ବନ୍ୟା ବିଭୀଷିକାର ବିକଳ ଚିତ୍ର ମଧ୍ୟରେ ସାମ୍ନାକୁ ଆସିଛି ରୋଚକ ଦୃଶ୍ୟ। ଶେରଗଡ ଅନ୍ଧକାର ମୁଖ୍ୟ ବଜାରରେ ଅଧା ଦାମରେ ମିଳୁଛି ଚପଲ ଓ ପୋଷାକ। ଦୋକାନରେ ପାଣି ପଶି ଏସବୁ ନଷ୍ଟ ହୋଇଯାଇଥିବାରୁ ବେପାର ନହେବା ଆଶଙ୍କା କରି ୫୦ ପ୍ରତିଶତ ରିହାତି ଦେଇ ବିକ୍ରି କରୁଛନ୍ତି ବ୍ୟବସାୟୀ। ଯାହାକୁ କିଣିବାକୁ ଦୋକାନ ସମ୍ମୁଖରେ ଦେଖିବାକୁ ମିଳୁଛି ଗ୍ରାହକଙ୍କ ଲମ୍ବା ଲାଇନ୍। ନିଜ କାମ ଧନ୍ଦା ଛାଡି ଜିନିଷ କିଣିବାକୁ ଅପେକ୍ଷା କରିଛନ୍ତି ସାଧାରଣ ଲୋକେ। ବ୍ୟବସାୟୀ କହିଛନ୍ତି, ବ୍ୟବସାୟରେ ବଡ଼ କ୍ଷତି ହେବା ଦେଖି ଏଗୁଡ଼ିକୁ ଅଧା ଦାମରେ ବିକ୍ରି କରି କିଛି ଭରଣା କରିବାକୁ ଚେଷ୍ଟା କରୁଛୁ।

• ବ୍ରହ୍ମପୁରରେ ଜଳଯୋଗାଣ ସ୍ୱାଭାବିକ କରିବାକୁ ପଦକ୍ଷେପ

ବାତ୍ୟାର ପ୍ରଭାବରେ ବ୍ରହ୍ମପୁର ସହରରେ ବ୍ୟାହତ ହୋଇଥିବା ଜଳଯୋଗାଣ ବ୍ୟବସ୍ଥାକୁ ଯଥାଶୀଘ୍ର ସ୍ୱାଭାବିକ କରିବା ଲକ୍ଷ୍ୟରେ ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ଜରୁରୀକାଳୀନ ପଦକ୍ଷେପକୁ ଅଧିକ ତ୍ୱରାନ୍ୱିତ କରାଯାଇଛି। ଜନିଭିଲି ଇନ୍‌ଟେକ୍‌ର ପୁନରୁଦ୍ଧାର କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ଚାଲିଥିବାବେଳେ ଉପଭୋକ୍ତାମାନଙ୍କ ଅସୁବିଧା ହ୍ରାସ କରିବା ପାଇଁ ବିକଳ୍ପ ଜଳଯୋଗାଣ ବ୍ୟବସ୍ଥା ମଧ୍ୟ କରାଯାଇଛି।

ପଢନ୍ତୁ ଏହି ଖବର: ଗାଁ ଧୋଇନେଲା ଭୂସ୍ଖଳନ; ପ୍ରଳୟର ମୂକ ସାକ୍ଷୀ ସାଜିଛି ଏହି ଗୋଟିଏ ଘର

ବାତ୍ୟା ପରବର୍ତ୍ତୀ ସମୟରେ ନିରାପଦ ପାନୀୟ ଜଳ ଯୋଗାଣ ସୁନିଶ୍ଚିତ କରିବାକୁ ଜଳ ବିଶୋଧନାଗାରଗୁଡ଼ିକରେ ଅଧିକ ମାତ୍ରାରେ କ୍ଲୋରିନେସନ୍ କରାଯାଉଛି। ପ୍ରି-କ୍ଲୋରିନେସନ୍ ୪ ପିପିଏମ୍ ଏବଂ ପୋଷ୍ଟ-କ୍ଲୋରିନେସନ୍ ୧୦ ପିପିଏମ୍ ମାତ୍ରାରେ କରାଯାଉଥିବାବେଳେ ବିତରଣ ବ୍ୟବସ୍ଥାର ଶେଷଭାଗରେ ୨ ପିପିଏମ୍ କ୍ଲୋରିନେସନ୍ ସୁନିଶ୍ଚିତ କରାଯାଉଛି। ଅନ୍ୟପକ୍ଷରେ, ହିଞ୍ଜିଳିକାଟୁ ଏବଂ ଗୋପାଳପୁରରେ ଜଳଯୋଗାଣ ବ୍ୟବସ୍ଥା ସ୍ୱାଭାବିକ ଭାବେ କାର୍ଯ୍ୟ କରୁଛି।