Bhadrakali Puja / ଐତିହାସିକ କାଳୀପୂଜା ପାଇଁ ଉତ୍ସବମୁଖର ଭଦ୍ରକ; ୧୦ଟି ପୂଜା ମଣ୍ଡପରେ ମା’ ଶ୍ୟାମାକାଳୀଙ୍କ ପୂଜାର୍ଚ୍ଚନା

ଭଦ୍ରକ: ଓଡ଼ିଶା ପ୍ରସିଦ୍ଧ ଐତିହାସିକ କାଳୀପୂଜା ପାଇଁ ଚଳଚଞ୍ଚଳ ହୋଇପଡ଼ିଛି ଭଦ୍ରକ। ଅଧିଷ୍ଠାତ୍ରୀ ଦେବୀ ମା’ ଭଦ୍ରକାଳୀଙ୍କ ପୀଠରେ ଜମିଲାଣି ଭକ୍ତଙ୍କ ଭିଡ଼ । ଆଜିଠାରୁ ୧୪ ତାରିଖ ପର୍ଯ୍ୟନ୍ତ ଦୀର୍ଘ ୭ ଦିନ ଧରି ମା’ ଭଦ୍ରକାଳୀ ସପ୍ତମାତୃକା ବେଶରେ ଶ୍ରଦ୍ଧାଳୁଙ୍କୁ ଦର୍ଶନ ଦେବେ । ଏହି ଦୁର୍ଲଭ ବେଶ ଦର୍ଶନ ସହ ପୀଠରେ ସପ୍ତଚଣ୍ଡୀ ପାଠ ମହାଯଜ୍ଞ ଅନୁଷ୍ଠିତ ହେବ । ଅନ୍ୟପକ୍ଷରେ, ଭଦ୍ରକ ଚରମ୍ପାରେ ମଧ୍ୟ ୧୦ଟି ପୂଜା ମଣ୍ଡପରେ ମା’ ଶ୍ୟାମାକାଳୀଙ୍କ ପୂଜାର୍ଚ୍ଚନା ପାଇଁ କାରିଗରମାନେ ମୃଣ୍ମୟୀ ମୂର୍ତ୍ତିରେ ଶେଷ ସ୍ପର୍ଶ ଦେବାରେ ନିମଗ୍ନ ଅଛନ୍ତି ।

• ଯଜ୍ଞର ରୌପ୍ୟ ଜୟନ୍ତୀ

ଚଳିତ ବର୍ଷ ଯଜ୍ଞର ରୌପ୍ୟ ଜୟନ୍ତୀ ଥିବାରୁ ସାଳନ୍ଦୀ ନଦୀରୁ ୧୦୦୧ ମହିଳା ଶ୍ରଦ୍ଧାଳୁ କଳସ ଶୋଭାଯାତ୍ରାରେ ପାଣି ଆଣି ଯଜ୍ଞ ମଣ୍ଡପରେ ସ୍ଥାପନ କରିବେ । ଏଥିସହ ରାଜ୍ୟ ସଂସ୍କୃତି ବିଭାଗ ପକ୍ଷରୁ ସନ୍ଧ୍ୟାରେ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ ହେବାକୁ ଥିବାରୁ ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି । ପୂଜାକୁ ନେଇ ସ୍ଥାନୀୟ ଅଞ୍ଚଳରେ ବେଶ ସାଜସଜ୍ଜା ହୋଇଛି, ଯାହାକି ପର୍ବକୁ ଆହୁରି ରଙ୍ଗୀନ କରୁଛି । ପୂଜା ପାଇଁ ଆକର୍ଷଣୀୟ ତୋରଣ ସହରର ଶୋଭାକୁ ଦ୍ଵିଗୁଣିତ କରୁଛି ।  ସ୍ଥାନୀୟ ଲୋକେ ପୂଜାକୁ ନେଇ ବେଶ ଉତ୍ସାହିତ ଅଛନ୍ତି ।

• ଚରମ୍ପାରେ ୧୦ଟି ପୂଜା ମଣ୍ଡପରେ ମା' ପୂଜା ପାଇବେ

ସେପଟେ ଭଦ୍ରକାଳୀ ପୀଠ ଭଳି କାଳୀପୂଜାର ଅସଲ ମାହୋଲ ଜମିଥାଏ ଭଦ୍ରକ ଚରମ୍ପା ଅଞ୍ଚଳରେ। ଏଥର ଚରମ୍ପାର ୧୦ଟି ପୂଜା ମଣ୍ଡପରେ ଦୀର୍ଘ ୯ ଦିନ ଧରି ପୂଜା ପାଇବେ ମା’ ଶ୍ୟାମାକାଳୀ । ବାହାର ରାଜ୍ୟର କାରିଗରଙ୍କ ଦ୍ୱାରା ନିର୍ମିତ ଆକର୍ଷଣୀୟ ତୋରଣ, ଟେରାକୋଟା ସଜ୍ଜା, ମୀନାବଜାର ଓ ଦୋଳି ଶ୍ରଦ୍ଧାଳୁଙ୍କ ମନ ମୋହିବ ।ବିଭିନ୍ନ ପୂଜା କମିଟି ପକ୍ଷରୁ ମଧ୍ୟ ମା'ଙ୍କ ସୁନ୍ଦର ଦର୍ଶନ ପାଇଁ ବ୍ୟବସ୍ଥା ହୋଇଛି ।  ଚରମ୍ପାରେ ପୂର୍ବତଟ ରେଳବାଇ କର୍ମଚାରୀଙ୍କ ପୂଜା ଶହେ ବର୍ଷରୁ ଊର୍ଦ୍ଧ୍ୱ ସମୟ ହେବ ଅନୁଷ୍ଠିତ ହୋଇଆସୁଛି । ଯାହାକି ଏଠାର ଏକ ବଡ଼ ଆକର୍ଷଣ । 

ପଢନ୍ତୁ ଏହି ଖବର: ଦୀପାବଳିରେ ହାଇ ଆଲର୍ଟରେ ପୋଲିସ, ବାଣ ବିକ୍ରି ଓ ଫୁଟାଇବା ଉପରେ କଟକଣା

• ଶାନ୍ତିଶୃଙ୍ଖଳା ପୂଜା ପାଇଁ ବିଶେଷ ବ୍ୟବସ୍ଥା

ପୂଜାକୁ ଶାନ୍ତିଶୃଙ୍ଖଳାର ସହ ସମ୍ପାଦନ କରିବା ପାଇଁ ଜିଲ୍ଲା ପୋଲିସ ପକ୍ଷରୁ ବିଭିନ୍ନ ସ୍ଥାନରେ ସିସିଟିଭି ସହ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ଶାନ୍ତିଶୃଙ୍ଖଳା ରକ୍ଷା, ଜନଗହଳି ନିୟନ୍ତ୍ରଣ ଏବଂ ପୂଜାର ସୁପରିଚାଳନା ପାଇଁ ପ୍ରଶାସନ ଓ ବିଭିନ୍ନ ପୂଜା କମିଟି ପକ୍ଷରୁ ସମସ୍ତ ପ୍ରସ୍ତୁତି ଶେଷ ହୋଇଛି ।