ନିଶା ବେପାରୀ ରାକେଶ ମଲିଆର ଘରକୁ ମାଟିରେ ମିଶାଇ ଦେଇଛି ଲିଙ୍ଗରାଜ ଥାନା ପୋଲିସ । ଧଉଳି ଅଞ୍ଚଳରେ ସରକାରୀ ଜାଗାରେ ପାନ ଦୋକାନ କରି ବେଆଇନ ମଦ ବେପାର ଚଲାଇଥିଲା ରାକେଶ । ମଦ କିଣିବାକୁ ଆସିଥିବା କିଛି ଯୁବକ ସହ ରାକେଶର ପାଟି ତୁଣ୍ଡ ହୋଇଥିଲା । ଏହାପରେ ଉତ୍ୟକ୍ତ ହୋଇ ରାକେଶ ଖଣ୍ଡାରେ ଆକ୍ରମଣ କରି ଜଣେ ଯୁବକଙ୍କ ପାପୁଲିକୁ କାଟି ଦେଇଥିଲେ । ଏନେଇ ଅଭିଯୋଗ ପରେ ଅଭିଯୁକ୍ତ ରାକେଶ ମଲିଆ ଓ ତା'ର ବାପା ସନ୍ତୋଷ କୁମାର ମଲିଆଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ ।

ନିଶା ବେପାରୀଙ୍କ ବିରୋଧରେ ପୋଲିସର ଜିରୋ ଟଲେରାନ୍ସ । ବୁଲିଲା ବୁଲଡୋଜର, ଭାଙ୍ଗିଲା ନିଶା ବେପାରୀର ଘର । ଆଗରେ ପାନ ଦୋକାନ । ଭିତରେ ଚାଲିଥିଲା ମଦର ଆସର । ଦୀର୍ଘଦିନ ହେବ ସାମନ୍ତରାପୁରରେ ଏକ ସରକାରୀ ଜାଗାରେ ଘର କରି ବେଧଡ଼କ ବାପ ପୁଅ ଚଳାଇଥିଲେ ନିଶା କାରବାର । ଅଭିଯୁକ୍ତ ରାକେଶ କୁମାର ମଲିଆ ଓ ସନ୍ତୋଷ କୁମାର ମଲିଆ ଜଣେ ଯୁବକଙ୍କ ହାତ ପାପୁଲି କାଟି ଦେଇଥିଲେ । ପରେ ସେହି ଖଣ୍ଡିଆ ପାପୁଲିକୁ ଗଙ୍ଗୁଆ ନାଳକୁ ଫିଙ୍ଗି ଦେଇଥିଲେ । ଥାନାରେ ଅଭିଯୋଗ ହେବା ପରେ ଉଭୟ ବାପ ପୁଅଙ୍କୁ ଗିରଫ କରି କୋର୍ଟ ଚାଲାଣ କରିଛି ଲିଙ୍ଗରାଜ ଥାନା ପୋଲିସ । ସେମାନଙ୍କ ନିକଟରୁ ଘଟଣାରେ ବ୍ୟବହୃତ ଖଣ୍ଡା ମଧ୍ୟ ଜବତ ହୋଇଛି ।

ଅଧିକ ପଢ଼ନ୍ତୁ: ସୁଧୀର ପାତ୍ର ହତ୍ୟା ମାମଲାରେ ବଢୁଛି ଅଭିଯୁକ୍ତଙ୍କ ଅଡୁଆ

ରାଜେଶ ସାହୁ, ସୁରେଶ ସାହୁ ଓ ଜଣେ ସହଯୋଗୀ କପିଳେଶ୍ୱର ଗଙ୍ଗୁଆ କେନାଲ ବନ୍ଧ ନିକଟରେ ଥିବା ଅଭିଯୁକ୍ତଙ୍କ ପାନ ଦୋକାନକୁ ଆସିଥିବାବେଳେ ହୋଇଥିଲା ବଚସା । ଜୋତା ପିନ୍ଧି ଦୋକାନ ଭିତରକୁ ପ୍ରବେଶକୁ ନେଇ ଆରମ୍ଭ ହୋଇଥିଲା ଗଣ୍ଡଗୋଳ । ପରେ ବିଭୁ ପ୍ରସାଦ ସାହୁ ଓରଫ ଚୈତା ଓ ଦୀପକ ସାହୁ ପହଞ୍ଚି ସନ୍ତୋଷ ମଲିଆଙ୍କୁ ଗାଳି ଦେବା ସହ ଦୋକାନରେ ପ୍ରବେଶ କରିଥିଲେ । ରକ୍ତାକ୍ତ ଆକ୍ରମଣ ଘଟଣା ପରେ ପରିବାର ସଦସ୍ୟ ଥାନାରେ ଅଭିଯୋଗ କରିଥିଲେ । ତଦନ୍ତ ସମୟରେ ପୋଲିସ ଅଭିଯୁକ୍ତ ରାକେଶ ମଲିଆ ଓ ସନ୍ତୋଷ କୁମାର ମଲିଆଙ୍କୁ ଗିରଫ କରିବା ସହ ଅପରାଧରେ ବ୍ୟବହୃତ ଖଣ୍ଡା ଉଦ୍ଧାର କରିଥିଲା ।

ଅଭିଯୁକ୍ତମାନେ ପୂର୍ବରୁ ଏୟାରଫିଲ୍ଡ ଏବଂ ଲିଙ୍ଗରାଜ ଥାନାରେ ଗୋଟିଏ ମାମଲାରେ ଜଡିତ ଥିବା ଯାଞ୍ଚରୁ ଜଣାପଡ଼ିଛି । ଅଭିଯୁକ୍ତଙ୍କ ବିରୋଧରେ ଅପରାଧ ସ୍ପଷ୍ଟ ହେବାରୁ ଆଇନ ଅନୁଯାୟୀ ସେମାନଙ୍କୁ କୋର୍ଟକୁ ଚାଲାଣ କରାଯାଇଛି ।