ଭୁବନେଶ୍ବର କ୍ଲବ ନିର୍ବାଚନ । ସଭାପତି ହେଲେ ପ୍ରଦୀପ ଜେନା । ଅସିତ୍ ତ୍ରିପାଠୀଙ୍କୁ ହରାଇ ବାଜି ମାରିଲେ ପ୍ରଦୀପ ଜେନା । ଅସିତଙ୍କୁ ୧୮ ଖଣ୍ଡ ଭୋଟରେ ହରାଇ ଭୁବନେଶ୍ବର କ୍ଲବ ସଭାପତି ହେଲେ ପ୍ରଦୀପ ଜେନା । ଦୁହେଁ ପୂର୍ବତନ IAS ଅଧିକାରୀ ତଥା ଓଡ଼ିଶାର ମୁଖ୍ୟ ଶାସନ ସଚିବ ରହିଥିଲେ । ସେହିପରି ଭୁବନେଶ୍ବର କ୍ଲବର ପ୍ରଗତି କୁମାର ମହାନ୍ତି ଉପସଭାପତି, ସଂପାଦକ ଭାବେ ଲଳିତ ଦାସ ଓ ଯୁଗ୍ମ ସଂପାଦକ ଭାବେ ସମ୍ବିତ ମହାନ୍ତି ନିର୍ବାଚିତ ହୋଇଛନ୍ତି ।

ଅଧିକ ପଢ଼ନ୍ତୁ: ବିଷାକ୍ତ ପାଲଟୁଛି ବିନ୍ଦୁ ସାଗର, ମୁଣ୍ଡରେ ପାଣି ଛିଞ୍ଚିବାକୁ ଡରିଲେଣି ତୀର୍ଥଯାତ୍ରୀ

ସୂଚନା ଅନୁସାରେ, ଚଳିତ ଥର ଭୁବନେଶ୍ବର କ୍ଲବ ନିର୍ବାଚନରେ ଦୁଇ ପୂର୍ବତନ ମୁଖ୍ୟ ଶାସନ ସଚିବଙ୍କ ମହାଲଢ଼େଇ ଦେଖିବାକୁ ମିଳିଥିଲା । ଏଥର ଅସିତ୍ ତ୍ରିପାଠୀ ତୃତୀୟ ଥର ପାଇଁ ନିର୍ବାଚନ ଲଢ଼ୁଥିଲେ । ପୂର୍ବରୁ ସେ ଲଗାତର ଦୁଇ ଥର ଭୁବନେଶ୍ବର କ୍ଲବ ସଭାପତି ରହିଥିଲେ । ଅନ୍ୟପଟେ ଅବସର ପରେ ଓଡ଼ିଶା ବିଦ୍ୟୁତ ନିୟାମକ ଆୟୋଗର ଅଧ୍ୟକ୍ଷ ପଦ ସମ୍ଭାଳିଥିବା ପ୍ରଦୀପ ଜେନା ପ୍ରଥମ ଥର କ୍ଲବ ନିର୍ବାଚନକୁ ଓହ୍ଲାଇଥିଲେ ।
ଶନିବାର ନିର୍ବାଚନ ପାଇଁ ଇ-ଭୋଟିଂ ଅନୁଷ୍ଠିତ ହୋଇଥିଲା । ଯେଉଁ କ୍ଲବ ମେମ୍ବରମାନେ ଭୋଟ ଦାନ ପାଇଁ କ୍ଲବକୁ ଆସିପାରିନାହାନ୍ତି , ସେମାନେ ଇ - ଭୋଟିଂ ମାଧ୍ୟମରେ ଭୋଟ ଦେଇଥିଲେ । ତେବେ ରବିବାର ସକାଳ ୧୧ଟାରୁ ସନ୍ଧ୍ୟା ୫ଟା ପର୍ଯ୍ୟନ୍ତ ବାଲାଟ୍ ମାଧ୍ୟମରେ ଭୋଟ ଗ୍ରହଣ ହୋଇଥିଲା । ତେବେ ଏହି ନିର୍ବାଚନରେ ଅସିତ ତ୍ରିପାଠୀଙ୍କୁ ୧୮ ଖଣ୍ଡ ଭୋଟରେ ପରାସ୍ତ କରି ପ୍ରଥମ ଥର ପାଇଁ ପ୍ରଦୀପ ଜେନା ସଭାପତି ହୋଇଛନ୍ତି ।