ଭୁବନେଶ୍ଵର: ଅଶାନ୍ତ ହେଉଛି ରାଜଧାନୀ, ରାତି ବଢ଼ିବା ସହ ବଢ଼ୁଛି ଅପରାଧିଙ୍କ କାର୍ଯ୍ୟକଳାପ । କେଉଁଠି ଛୁରିରେ ଆକ୍ରମଣ ହେଉଛି ତ, ପୁଣି କେଉଁଠି ବୁଲୁଛି ଖଣ୍ଡା । ଅପରାଧୀଙ୍କୁ କାବୁ କରିବାରେ ପୋଲିସ ଏକପ୍ରକାର ବିଫଳ ହୋଇଛି ।

ରାତିରେ ଉତ୍ପାତ କରୁଛନ୍ତି ଅପରାଧୀ । ରାଜଧାନୀର ବିଭିନ୍ନ ଥାନା ଅଞ୍ଚଳରେ ଘଟୁଛି ଛୁରାମାଡ଼ ପରି ଘଟଣା । ଆଉ କେଉଁଠି କାହାକୁ ଗୋଡ଼ାଇ ଗୋଡ଼ାଇ ବିଚ୍ ରାସ୍ତା ଉପରେ, ସର୍ବ ସମ୍ମୁଖରେ ହାଣୁଛନ୍ତି ଅପରାଧୀ ।

ଏଥିସହ ପଢ଼ନ୍ତୁ: ଡାକ୍ତରଙ୍କ ଅଜବ କାରନାମା; ଲାଞ୍ଚ ନ ମିଳିବାରୁ ଯୋଡ଼ିଥିବା ଗୋଡ଼କୁ ଭାଙ୍ଗିଦେଲେ 

ଲକ୍ଷ୍ମୀସାଗରରେ ଛୁରାମାଡ଼

ଟିକେ ଟିକେ କଥାରେ ବୁଲୁଛି ଖଣ୍ଡା । ଶୁକ୍ରବାର ରାତିରେ ପୂର୍ବ ଶତ୍ରୁତାକୁ କେନ୍ଦ୍ର କରି ଛୁରାମାଡ଼ ହୋଇଛି । ଲକ୍ଷ୍ମୀସାଗର ଅଞ୍ଚଳରେ ଛୁରାମାଡ଼ରେ ଦୁଇ ଯୁବକ ଆହତ ହୋଇଛନ୍ତି । ପୂର୍ବ ଶତ୍ରୁତାଙ୍କୁ କେନ୍ଦ୍ର କରି ହଳଦୀପଡି଼ଆ ବସ୍ତିର କିଛି ଯୁବକ ବାଇକ୍‌ରେ ଆସି ଏଭଳି କାଣ୍ଡ ଘଟାଇଥିବା ଅଭିଯୋଗ ହୋଇଛି ।

ଟାର୍ଗେଟ୍‌ରେ ଡେଲିଭରୀ ବୟ

ଦୁଇ ଦିନ ତଳେ ଖଣ୍ଡଗିରି ଥାନା ଅନ୍ତର୍ଗତ ଜାଗମରା-ଗଣ୍ଡମୁଣ୍ଡା ରାସ୍ତାରେ ଡେଲିଭରୀ ବୟଙ୍କ ଉପରେ ମରଣାନ୍ତକ ଓ ସଂଘବଦ୍ଧ ଆକ୍ରମଣ କରିଥିଲେ ଦୁର୍ବୃତ୍ତ । ଡେଲିଭରୀ ସାରି ଷ୍ଟୋରକୁ ଫେରୁଥିବା ବେଳେ ତାଙ୍କ ଉପରେ ଆକ୍ରମଣ ହୋଇଥିଲା । ଖଣ୍ଡା ଚୋଟରେ ଦେହର ବିଭିନ୍ନ ସ୍ଥାନରେ ଗୁରୁତର କ୍ଷତ ହୋଇଥିଲା । ଦୁର୍ବୃତ୍ତମାନେ ତାଙ୍କ ମୋବାଇଲ ଫୋନ୍ ଓ ନଗଦ ଟଙ୍କା ଛଡ଼ାଇ ନେଇଥିବା ଖଣ୍ଡଗିରି ଥାନାରେ ଅଭିଯୋଗ ହୋଇଛି ।

ଗୋଡ଼ାଇ ଗୋଡ଼ାଇ ହାଣିଲେ

ତିନିଦିନ ତଳେ ରାଜଧାନୀରେ ଦିନ ଦ୍ୱିପହରରେ ଗୋଡ଼ାଇ ଗୋଡ଼ାଇ ହାଣିଥିଲେ ଦୁର୍ବୃତ୍ତ । କ୍ୟାପିଟାଲ ଥାନା ଅନ୍ତର୍ଗତ ଫାଳିକିଆ ବସ୍ତିରେ ପୂର୍ବ ଶତ୍ରୁତାକୁ କେନ୍ଦ୍ର କରି ଜଣେ ଯୁବକକୁ ଗୋଡ଼ାଇ ଗୋଡ଼ାଇ ଖଣ୍ଡାରେ ହାଣିଥିଲେ । ଆକ୍ରମଣରେ ଗୁରୁତର ହୋଇ ଏବେବି ହସ୍ପିଟାଲରେ ଚିକିତ୍ସିତ ହେଉଛନ୍ତି ଡି ହାରି କ୍ରିଷ୍ଣା । ଅଭିଯୁକ୍ତ ରାଜରାସ୍ତାରେ ଖଣ୍ଡା ଧରି ବାଇକରେ ଘୁରି ବୁଲୁଥିବାର ଭିଡିଓ ଭାଇରାଲ୍ ହୋଇଥିଲା ।

ଏଥିସହ ପଢ଼ନ୍ତୁ: କନଷ୍ଟେବଲଙ୍କ ନିଆଁରେ ପୋଡ଼ି ଗୁରୁତର ହେବା ଘଟଣାରେ ନୂଆମୋଡ଼ 

ଦିନକୁ ଦିନ ରାଜଧାନୀର ବିଭିନ୍ନ ଗଳିକନ୍ଦିରେ ବଢୁଛି କ୍ରାଇମ୍ ଏହି ତିନି ଘଟଣା ତିନି ଦିନରେ ଘଟିଥିବା ବେଳେ ସମସ୍ତ ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି ହେଉଛି । ଦୃଷ୍ଟାନ୍ତ ମୂଳକ କାର୍ଯ୍ୟାନୁଷ୍ଠାନ ହେଲେ ପରବର୍ତ୍ତୀ ସମୟରେ ଅପରାଧ ଘଟାଇବା ପୂର୍ବରୁ ଭୟ କରିବେ ଅପରାଧୀ । ରାଜଧାନୀରେ ଅପରାଧ ବଢ଼ି ଚାଲିଥିବା ବେଳେ କମିଶନରେଟ ପୋଲିସର ଇନଫରମେସନ ଓ ଆକ୍ସନ ଫେଲ୍ ମାରିଥିବା କୁହାଯାଉଛି ।