CureBay Funding / ଗାଁ ଗାଁରେ ଉନ୍ନତ ସ୍ୱାସ୍ଥ୍ୟସେବା ଯୋଗାଇବ କ୍ୟୁରବେ; ଜୁଟାଇଲାଣି ୧୦୦ କୋଟି ପାଣ୍ଠି

ଭୁବନେଶ୍ୱର: ଗ୍ରାମାଞ୍ଚଳର ଲୋକଙ୍କୁ ଭଲ ସ୍ୱାସ୍ଥ୍ୟସେବା ଯୋଗାଇବା ପାଇଁ ଭୁବନେଶ୍ୱରର ସ୍ୱାସ୍ଥ୍ୟ ପ୍ରଯୁକ୍ତିବିଦ୍ୟା ଷ୍ଟାର୍ଟଅପ୍ କମ୍ପାନୀ କ୍ୟୁରବେ (CureBay) ପ୍ରାୟ ୧୦୦ କୋଟି ଟଙ୍କାର ପାଣ୍ଠି ସଂଗ୍ରହ କରିଛି । ନିବେଶକଙ୍କଠାରୁ ସଂଗ୍ରହ କରିଥିବା ଏହି ଅର୍ଥକୁ କମ୍ପାନୀ ନିଜର ସ୍ୱାସ୍ଥ୍ୟସେବା ନେଟୱର୍କକୁ ବଢ଼ାଇବା ଏବଂ ଆଧୁନିକ ଜ୍ଞାନକୌଶଳ ମାଧ୍ୟମରେ ଚିକିତ୍ସାସେବାର ଉନ୍ନତି ପାଇଁ ବ୍ୟବହାର କରିବ ।

୨୦୨୧ରେ ଭୁବନେଶ୍ୱରରେ ଆରମ୍ଭ ହୋଇଥିବା ସ୍ୱାସ୍ଥ୍ୟ ପ୍ରଯୁକ୍ତିବିଦ୍ୟା (healthtech) କମ୍ପାନୀ କ୍ୟୁରବେର ମୁଖ୍ୟ ଲକ୍ଷ୍ୟ ହେଉଛି ଗ୍ରାମାଞ୍ଚଳର ଲୋକଙ୍କୁ ସହଜରେ ଡାକ୍ତରୀ ସେବା ଯୋଗାଇଦେବା । ଅନେକ ଗାଁରେ ଭଲ ଡାକ୍ତର ଓ ହସ୍ପିଟାଲ୍ ନଥିବାରୁ ଲୋକମାନେ ଚିକିତ୍ସା ପାଇଁ ଦୂର ସ୍ଥାନକୁ ଯିବାକୁ ପଡ଼ିଥାଏ । ଏହି ସମସ୍ୟାର ସମାଧାନ ପାଇଁ କମ୍ପାନୀ ଡିଜିଟାଲ୍ ପ୍ରଯୁକ୍ତିବିଦ୍ୟାର ସାହାଯ୍ୟ ନେଉଛି ।

• କେଉଁ ସୁବିଧା ଯୋଗାଉଛି କ୍ୟୁରବେ ?

କ୍ୟୁରବେ ମାଧ୍ୟମରେ ରୋଗୀମାନେ ଭିଡିଓ କଲ୍‌ରେ ଡାକ୍ତରଙ୍କ ସହ ପରାମର୍ଶ କରିପାରୁଛନ୍ତି । ଏହା ସହିତ କମ୍ପାନୀ କୃତ୍ରିମ ବୁଦ୍ଧିମତ୍ତା ବା ଏଆଇର ସାହାଯ୍ୟରେ ରୋଗର ଲକ୍ଷଣ ଚିହ୍ନଟ ଏବଂ ସ୍ୱାସ୍ଥ୍ୟ ସମସ୍ୟାର ଆକଳନ କରିବା ଉପରେ କାମ କରୁଛି । ଏହାଦ୍ୱାରା ରୋଗୀମାନେ ଠିକ୍ ସମୟରେ ଚିକିତ୍ସା ପାଇବାରେ ସହାୟତା ମିଳିପାରିବ ।

• କେଉଁଠୁ ପାଣ୍ଠି ସଂଗ୍ରହ କଲା କମ୍ପାନୀ ?

ସଂଗ୍ରହ ହୋଇଥିବା ପାଣ୍ଠିରେ ପ୍ରାୟ ୬୯ କୋଟି ଟଙ୍କା ଇକ୍ୱିଟି ନିବେଶ ଥିବାବେଳେ ୩୦ କୋଟିରୁ ଅଧିକ ଟଙ୍କା ଋଣ ଆକାରରେ ମିଳିଛି । ଇଭିକ୍ୟାପ୍ ଭେଞ୍ଚର୍ସ ସମେତ ଅନ୍ୟ ନିବେଶକ ଓ ଆର୍ଥିକ ସଂସ୍ଥା ଏଥିରେ ସହଯୋଗ କରିଛନ୍ତି । ଏହି ଟଙ୍କାକୁ ଗ୍ରାମାଞ୍ଚଳରେ କ୍ଲିନିକ୍ ସଂଖ୍ୟା ବୃଦ୍ଧି , AI-ଆଧାରିତ ସ୍ୱାସ୍ଥ୍ୟ ଯାଞ୍ଚ ଏବଂ ସ୍ୱାସ୍ଥ୍ୟ ସେବାର ବିକାଶ ପାଇଁ ବ୍ୟବହାର କରାଯିବ ।

• ରାଜ୍ୟ ବାହାରେ ବି ଯୋଗାଇବ ଉନ୍ନତ ସ୍ଵାସ୍ଥ୍ୟସେବା

ନୂଆ ପାଣ୍ଠିକୁ ବ୍ୟବହାର କରି କମ୍ପାନୀ ଆନ୍ଧ୍ରପ୍ରଦେଶ ସମେତ ଅନ୍ୟ ରାଜ୍ୟରେ ମଧ୍ୟ ନିଜର ସେବା ବଢ଼ାଇବାକୁ ଯୋଜନା କରିଛି । ଏଥିସହ ଏଆଇ ପ୍ରଯୁକ୍ତିର ଉନ୍ନତି ଓ ନୂଆ ସ୍ୱାସ୍ଥ୍ୟସେବା କେନ୍ଦ୍ର ସ୍ଥାପନ ଉପରେ ଗୁରୁତ୍ୱ ଦିଆଯିବ । କମ୍ପାନୀର ପ୍ରତିଷ୍ଠାତା ତଥା ସିଇଓ ପ୍ରିୟଦର୍ଶୀ ମହାପାତ୍ରଙ୍କ କହିଛନ୍ତି, "ଗ୍ରାମାଞ୍ଚଳର ଲୋକଙ୍କୁ ଘର ପାଖରେ ଭଲ ଚିକିତ୍ସା ସୁବିଧା ଯୋଗାଇଦେବା ହେଉଛି କମ୍ପାନୀର ଲକ୍ଷ୍ୟ । ଏହି ପାଣ୍ଠି ଅନ୍ୟ ରାଜ୍ୟରେ କମ୍ପାନୀର ବିସ୍ତାର ଓ ସଠିକ୍ ସମୟରେ AIର ବ୍ୟବହାର କରି ଉନ୍ନତ ସ୍ଵାସ୍ଥ୍ୟସେବା ଯୋଗାଇ ଦିଆଯିବ ।" ଏହି କମ୍ପାନୀ ପ୍ରତି ମାସରେ ୧୭ ଲକ୍ଷ ରୋଗୀଙ୍କ ଚିକିତ୍ସା କରୁଥିବାବେଳେ ୪୦୦ ହେଲ୍‌ଥ କ୍ୟାମ୍ପ କରୁଛି ।

ପଢନ୍ତୁ ଏହି ଖବର: ରାଜ୍ୟରେ ପଞ୍ଜୀକୃତ ଦାନ୍ତ ଡାକ୍ତରଙ୍କ ପାଇଁ କଠୋର କଟକଣା

ଓଡ଼ିଶାରୁ ଆରମ୍ଭ ହୋଇଥିବା ଏହି କମ୍ପାନୀର ସମ୍ପ୍ରସାରଣ ଯୋଜନା ରାଜ୍ୟର ଷ୍ଟାର୍ଟଅପ୍ ଜଗତ ପାଇଁ ନିହାତି ଏକ ଭଲ ଖବର । ଏହାର ସେବା ଅଧିକ ଅଞ୍ଚଳରେ ପହଞ୍ଚିଲେ ଗ୍ରାମାଞ୍ଚଳର ଲୋକମାନେ କମ୍ ଖର୍ଚ୍ଚରେ ଓ ସହଜରେ ଡାକ୍ତରୀ ପରାମର୍ଶ ପାଇପାରିବେ ।