Jagmohan Meena Resigns / ଭୁବନେଶ୍ଵର DCP ପଦରୁ ଜଗମୋହନ ମୀନାଙ୍କ ଇସ୍ତଫା

ଭୁବନେଶ୍ଵର: କମିନଶନରେଟ୍ ପୋଲିସରେ ବଡ଼ ହଲଚଲ୍ । ଇସ୍ତଫା ଦେଲେ ଭୁବନେଶ୍ଵର DCP ଜଗମୋହନ ମୀନା । ବ୍ୟକ୍ତିଗତ କାରଣ ଦର୍ଶାଇ ଭୁବନେଶ୍ଵର DCP ପଦରୁ ଜଗମୋହନ ମୀନା ଇସ୍ତଫା ଦେଇଥିବା ଜଣାପଡ଼ିଛି । ୨୦୧୩ ବ୍ୟାଚ୍‌ର IPS ଅଧିକାରୀ ହେଉଛନ୍ତି ଜଗମୋହନ ମୀନା ।

୨୦୨୫ ଫେବ୍ରୁଆରୀରେ ଭୁବନେଶ୍ଵର DCP ଭାବେ ଦାୟିତ୍ଵ ନେଇଥିଲେ ଜଗମୋହନ ମୀନା । ସେ ଏବେ କୌଣସି ଘରୋଇ କମ୍ପାନୀରେ ଯୋଗ ଦେବା ନେଇ ଚର୍ଚ୍ଚା ହେଉଛି । ପୂର୍ବରୁ IPS ଅଧିକାରୀ ଜଗମୋହନ ମୀନା ଅନୁଗୋଳ ଏବଂ ଗଞ୍ଜାମରେ ଏସ୍‌ପି ଭାବେ କାର୍ଯ୍ୟ କରିଛନ୍ତି ।

ଏଥିସହ ପଢ଼ନ୍ତୁ: ବର୍ଷା ପାଇଁ ବଡ଼ ନିଷ୍ପତ୍ତି; ଆଜି ୪ ଜିଲ୍ଲାରେ ସମସ୍ତ ଶିକ୍ଷାନୁଷ୍ଠାନ ଛୁଟି ଘୋଷଣା 

କଟକ ସହରାଞ୍ଚଳ ପୋଲିସ ଜିଲ୍ଲାର DCP ମଧ୍ୟ ଥିଲେ IPS ଜଗମୋହନ ମୀନା । ୨୦୨୫ ଫେବ୍ରୁଆରୀ ୨୮ରେ ଜଗମୋହନ ମୀନା ଭୁବନେଶ୍ୱର DCP ଭାବେ ଦାୟିତ୍ୱ ଗ୍ରହଣ କରିଥିଲେ । ଜଗମୋହନ ମୀନାଙ୍କ ଇସ୍ତଫାର ପ୍ରକୃତ କାରଣ ଜଣାପଡ଼ନାହିଁ ।

ଇସ୍ତଫା ପରେ IPS ଜଗମୋହନ ମୀନା ପ୍ରତିକ୍ରିୟା ରଖିଛନ୍ତି । ଜଗମୋହନ ମୀନା କହିଛନ୍ତି, "ବ୍ୟକ୍ତିଗତ କାରଣରୁ ଇସ୍ତଫା ଦେଇଛି । ଦୀର୍ଘ ବର୍ଷ ଚାକିରି କ୍ୟାରିୟରରେ ମୁଁ ଖୁସି ଥିଲି ।"

IPS ଜଗମୋହନ ମୀନାଙ୍କ ଇସ୍ତଫାକୁ ରାଜ୍ୟ ସରକାର ଗ୍ରହଣ କରିଛନ୍ତି ନା ନାହିଁ ତାହା ସ୍ପଷ୍ଟ ହୋଇ ନାହିଁ । ତେବେ ସେ ପ୍ରାୟ ୨୫ ଦିନ ତଳେ ଇସ୍ତଫା ଦେଇଥିବା କଥା ସାମ୍ନାକୁ ଆସିଛି । ୩୭ ବର୍ଷୀୟ ଜଗମୋହନ ମୀନା ରାଜସ୍ଥାନରେ ଥିବା ତାଙ୍କ ନିକଟ ସମ୍ପର୍କୀୟଙ୍କ ଏକ ଘରୋଇ କମ୍ପାନୀରେ ଯୋଗ ଦେବା ନେଇ ଚର୍ଚ୍ଚା ହେଉଛି ।

ଏଥିସହ ପଢ଼ନ୍ତୁ: ଭୋଟର ତାଲିକାରେ ବଡ଼ଧରଣର ସଂଶୋଧନ; ବାଦ୍ ପଡ଼ିଲେ ୨୦ ଲକ୍ଷ ୧୪ ହଜାର ଭୋଟର 

ତେବେ ରାଜଧାନୀ ଭୁବନେଶ୍ଵରରେ ଅପରାଧର ମାତ୍ରା ବଢ଼ିଥିବା ବେଳେ DCP ପଦରୁ ଜଗମୋହନ ମୀନା ଇସ୍ତଫା ଦେଇଛନ୍ତି । ବାଲିଅନ୍ତାରେ ଭିଡ଼ ହିଂସାରେ ସୌମ୍ୟଙ୍କ ମୃତ୍ୟୁକୁ ନେଇ କମିଶନରେଟ୍ ପୋଲିସ ଅନେକ ଅପବାଦ ମୁଣ୍ଡାଇଛି ।

ଏପରିକି ବାଲିଅନ୍ତା ଭିଡ଼ ହିଂସାକୁ ନେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ତୀବ୍ର ଅସନ୍ତୋଷ ପ୍ରକାଶ କରିଥିଲେ । ଏବେ ହଠାତ୍ ଭୁବନେଶ୍ଵର DCP ପଦରୁ ଜଗମୋହନ ମୀନାଙ୍କ ଇସ୍ତଫା ତାଙ୍କ ସହଯୋଗୀଙ୍କୁ ମଧ୍ୟ ଚକିତ କରିଛି ।