ଗୁପ୍‌ଚୁପ୍‌ ପ୍ରେମୀଙ୍କ ପାଇଁ ଖୁସି ଖବର । ଆପଣଙ୍କୁ ବିଭିନ୍ନ ପ୍ରକାର ଟେଷ୍ଟର ଗୁପ୍‌ଚୁପ୍‌ ଖାଇବାକୁ ପସନ୍ଦ କି ? ତେବେ ଆପଣଙ୍କ ପାଇଁ ଖୁସି ଖବର । ଏଣିକି ଗୋଟିଏ ସ୍ଥାନରେ ମିଳିବ ଭଳି କି ଭଳି ଗୁପ୍‌ଚୁପ୍‌ । ରାଜଧାନୀ ଭୁବନେଶ୍ବରରେ ବିଏମ୍‌ସି ଖୋଲିବ ଗୁପ୍‌ଚୁପ୍‌ କର୍ଣ୍ଣର । ରାସ୍ତା କଡ଼ରେ ଠିଆ ହୋଇ ଆଉ ଗୁପଚୁପ ଖାଇବାକୁ ପଡିବନି । ଏଣିକି ଗୋଟିଏ ଜାଗାରେ ମିଳିବ ଭଳି କି ଭଳି ଗୁପଚୁପ । ପାଇଲଟ ପ୍ରୋଜେକ୍ଟ ଭାବରେ ରିଜିଓନାଲ ଇନଷ୍ଟିଚ୍ୟୁଟ୍ ଅଫ୍ ଏଜୁକେସନ ସମ୍ମୁଖରେରେ ବିଏମ୍‌ସି ଜାଗା ଚିହ୍ନଟ କରି ସାରିଛି । ଗୁପ୍‌ଚୁପ୍‌ କର୍ଣ୍ଣର ପାଇଁ ଚିହ୍ନଟ ହୋଇଥିବା ନିର୍ଦ୍ଦିଷ୍ଟ ସ୍ଥାନକୁ ବୁଲି ଦେଖିଛନ୍ତି ଭୁବନେଶ୍ବର ମେୟର ସୁଲୋଚନା ଦାସ ।

ତେବେ ଏହି ଗୁପ୍‌ଚୁପ୍‌ କର୍ଣ୍ଣର ପାଇଁ ସହିଦନଦର ଛକ ଠାରୁ ନିକୋ ପାର୍କ ପର୍ଯ୍ୟନ୍ତ ଯେଉଁମାନେ ଗୁପ୍‌ଚୁପ୍‌ ବିକ୍ରି କରୁଛନ୍ତି ସେ ସମସ୍ତ ବ୍ୟବସାୟୀଙ୍କୁ ଚିହ୍ନଟ କରାଯିବ । ଦୋକାନୀ ମାନଙ୍କୁ ବିଏମସି ପକ୍ଷରୁ ମାଗଣାରେ ଗୋଟିଏ ପ୍ରକାରର ସ୍ବତନ୍ତ୍ର ଟ୍ରଲି ଦିଆଯିବ । ଦୋକାନୀମାନେ ସ୍ଥାୟୀ ଭାବରେ ନୁହେଁ ବରଂ ବ୍ୟବସାୟୀ ମାନଙ୍କୁ ଗୁପ୍‌ଚୁପ୍‌ ବିକ୍ରି ପାଇଁ ଗୋଟିଏ ନିର୍ଦ୍ଦିଷ୍ଟ ସମୟ ଦିଆଯିବ । ଓପନ ଭେଣ୍ଡିଂ ଜୋନ୍ ଢାଞ୍ଚାରେ ନିର୍ମାଣ ହୋଇଥିବା ଏହି ଗୁପ୍‌ଚୁପ୍‌ ବଜାରରେ ୩୦ରୁ ୪୦ ଦୋକାନ ଖୋଲିପାରିବ । ଏହି ଭେଣ୍ଡିଂ ଜୋନକୁ ଲାଗି ପାର୍କିଂ ଏବଂ ଅନ୍ୟ ଆନୁସାଙ୍ଗିକ ବ୍ୟବସ୍ଥା କରାଯାଇଛି । ଲୋକଙ୍କ ମନ ପସନ୍ଦର ଗୁପ୍‌ଚୁପ୍‌ ଗୋଟିଏ ମାର୍କେଟରେ ଉପଲବ୍ଧ କରାଇବାକୁ ବିଏମ୍‌ସି ପକ୍ଷରୁ ଅଭିନବ ପ୍ରୟାସ ଆରମ୍ଭ କରାଯାଇଛି ।

ଅଧିକ ପଢ଼ନ୍ତୁ: କଟକରେ ବଡ଼ ଅଘଟଣ, ଭୁଶୁଡ଼ିଲା ପୁରୁଣା କୋଠା; ଚାଲିଗଲା ୩ ଜୀବନ

ତେବେ ଏହି ଗୁପ୍‌ଚୁପ୍‌ କର୍ଣ୍ଣରରେ ଭଳିକି ଭଳି ଗୁପ୍‌ଚୁପ୍‌ ମିଳିବ । ଦହି ଗୁପ୍‌ଚୁପ୍‌ରୁ ଆରମ୍ଭ କରି ପୁଦିନା ଓ ସ୍ପେଶାଲ ଗୁପ୍‌ଚୁପ୍‌ ମିଳିବ । ଲୋକଙ୍କ ମନ ପସନ୍ଦର ଗୁପ୍‌ଚୁପ୍‌ ଗୋଟିଏ ମାର୍କେଟରେ ଉପଲବ୍ଧ କରାଇବାକୁ ବିଏମ୍‌ସି ପକ୍ଷରୁ ଏଭଳି ଅଭିନବ ପ୍ରୟାସ ଆରମ୍ଭ କରାଯାଇଛି ।

ତେବେ ବର୍ତ୍ତମାନ ସମୟରେ ଭୁବନେଶ୍ବରର ବିଭିନ୍ନ ସ୍ଥାନରେ ମନଇଚ୍ଛା ଗୁପ୍‌ଚୁପ୍‌ ଦୋକାନ ଖୋଲୁଛି । ରାସ୍ତା କଡ଼ରେ ଏପରି ଅଘୋଷିତ ଗୁପ୍‌ଚୁପ୍‌ ଦୋକାନ ଖୋଲୁଥିବା ବେଳେ ରାସ୍ତାରେ ଭିଡ଼ ଜମୁଛି । ଗାଡ଼ି ପାର୍କିଂ ଯୋଗୁଁ ଦିନକୁ ଦିନ ଟ୍ରାଫିକ୍‌ ସମସ୍ୟା ମଧ୍ୟ ବଢ଼ିବାରେ ଲାଗୁଛି । ଏ ସବୁକୁ ଦୃଷ୍ଟିରେ ରଖି ବିଏମ୍‌ସି ଏପରି ଅଭିନବ ଉପାୟ ଆପଣାଇଛି ।

ଏହି ଗୁପ୍‌ଚୁପ୍‌ ଦୋକାନ ଖୋଲିବା ନେଇ ସମସ୍ତ ମହଲରୁ ସ୍ୱାଗତ କରାଯାଇଛି । ଓପନ ଭେଣ୍ଡିଂ ଜୋନ୍‌କୁ ସଫା ସୁତୁରା କରିବାକୁ ବିଏମ୍‌ସି ପକ୍ଷରୁ ଗାଇଡ୍‌ଲାଇନ୍‌ ଜାରି କରାଯିବ । ରାମମନ୍ଦିର ଖାଓ ଗଳି ଭଳି ପରିବେଶକୁ ପରିଷ୍କାର ରଖିବାକୁ ନିର୍ଦ୍ଦେଶ ଦିଆଯାଇଛି । ଦୋକାନୀମାନେ ହୁଇଲ ଅନ୍‌ ସପ୍‌ ଖୋଲିବେ ।