Bhubaneswar Waterlogging / ବର୍ଷାରେ ବେହାଲ ରାଜଧାନୀ, ଧସିଲା ରାସ୍ତା...ଘରେ ପଶିଲା ଡ୍ରେନ୍ ପାଣି

ଲଗାଣ ବର୍ଷାରେ ବେହାଲ ହେଲା ରାଜଧାନୀ । ଭୁବନେଶ୍ୱରର ଅନେକ ଅଞ୍ଚଳ ହେଲା ଜଳମଗ୍ନ । ମୌସୁମୀ ବର୍ଷାରେ ବେହାଲ ରାଜଧାନୀର ଡ୍ରେନେଜ୍‌ ଭିତ୍ତିଭୂମି ଧସିଲା ରାସ୍ତା, ଘରେ ପଶିଲା ଡ୍ରେନ୍ ପାଣି । କାମରେ ଆସିଲାନି ଭୁବନେଶ୍ବର ମହାନଗର ନିଗମର ମାଷ୍ଟର ପ୍ଲାନ୍‌ । ଏପଟେ ନିଜ ଦାୟିତ୍ୱରୁ ଖସି ଦୋଷ ଲଦିବାରେ ବ୍ୟସ୍ତ ବିଏମସି ।

ବୁଧବାର ରାତିରେ ଲଗାଣ ବର୍ଷା ଫଳରେ ଜଳମଗ୍ନ ହୋଇଛି ଶାନ୍ତିପଲ୍ଲୀ ବସ୍ତି । ଘରର ଆସବାବପତ୍ର ସହ ଖାଦ୍ୟ ସାମଗ୍ରୀ ସବୁ ପାଣିରେ ଭାସି ଯାଇଛି । ସେଭଳି ୪ ନମ୍ବର ୱାର୍ଡର ସ୍ଥିତି ନ କହିବା ଭଲ । ଏହି ୱାଡରେ ଅନେକ ଅଞ୍ଚଳ ପାଣି ଘେରରେ ରହିଛି । ସେହିପରି କଳିଙ୍ଗ ନଗର ଅଞ୍ଚଳରେ ଗତକାଲିର ଲଗାଣ ବର୍ଷାରେ ରାସ୍ତାରେ ଜମିଛି ଆଣ୍ଠୁଏ ଆଣ୍ଠୁଏ ପାଣି । ସେହିପରି ୩୨ ନମ୍ବର ୱାର୍ଡ ଦେଇ ଯାଇଥିବା କେନାଲ ରୋଡ୍‌ ମଧ୍ୟ ଧସିଯାଇଛି ।

ଅଧିକ ପଢ଼ନ୍ତୁ: କେନ୍ଦ୍ରୀୟ ବିଶ୍ୱବିଦ୍ୟାଳୟକୁ ମିଳିଲେ ନୂତନ କୂଳପତି, ଦାୟିତ୍ଵ ଗ୍ରହଣ ପୂର୍ବରୁ ଶ୍ରୀଜୀଉଙ୍କ ଦର୍ଶନ କଲେ

ମୌସୁମୀ ବର୍ଷାରେ ବେହାଲ ରାଜଧାନୀ । ବୁଧବାର ରାତିରେ ଆରମ୍ଭ ହୋଇଥିବା ବର୍ଷା ଆଜି ସକାଳ ପର୍ଯ୍ୟନ୍ତ ଜାରି ରହିଥିଲା । ଫଳରେ ରାଜଧାନୀ ହୋଇ ପଡିଥିଲା ଜଳବନ୍ଦୀ । କେଉଁଠି ବର୍ଷା ପାଣି ଘରେ ପଶିଛି ତ କେଉଁଠି ରାସ୍ତା ଧସିଛି । ଏନେଇ ମେୟରଙ୍କ କହିବା କଥା ହେଲା ଦୟା ୱେଷ୍ଟ କେନାଲ ଓ ଗଙ୍ଗୁଆ ନଦୀରେ ଥିବା ସାଇଫନଗୁଡ଼ିକ ଠିକ୍ ଭାବେ ସଫା ନ ହେବାରୁ ପାଣି ନିଷ୍କାସନରେ ବାଧା ସୃଷ୍ଟି ହେଉଛି । ଫଳରେ ଜଳବନ୍ଦୀ ସ୍ଥିତି ସୃଷ୍ଟି ହେଉଛି ।

ପ୍ରତିବର୍ଷ ମୌସୁମୀ ଆସୁଛି ଯାଉଛି, କିନ୍ତୁ ଡ୍ରେନେଜ ସମସ୍ୟାରୁ ମୁକୁଳିପାରୁନାହାନ୍ତି ରାଜଧାନୀବାସୀ । କାଗଜ କଲମରେ ସୀମିତ ରହୁଛି ବିଏମସିର ମାଷ୍ଟରପ୍ଲାନ ।