Durga Puja Gates / ଦଶହରା ପାଇଁ ସଜେଇ ହେଲାଣି ସହରର ଗଳିକନ୍ଦି; ଏଥର ରାଜଧାନୀରେ ନୂଆ ଥିମର ତୋରଣ

ଭୁବନେଶ୍ଵର: ଶରତର ନିର୍ମଳ ଆକାଶ, କାଶତଣ୍ଡର ଲାଜକୁଳି ହସ ଏବଂ ଧରାପୃଷ୍ଠରେ ମାଆଙ୍କ ପାଦପୂଜା ପାଇଁ ଏବେଠାରୁ ଚଳଚଞ୍ଚଳ ହୋଇଉଠିଛି ରାଜଧାନୀ ଭୁବନେଶ୍ୱର। ଆଉ ଦିନ କେଇଟା ପରେ ଜଗତଜନନୀ ଦୁର୍ଗାଙ୍କର ଆଗମନ। ଶ୍ରଦ୍ଧାଳୁଙ୍କୁ ଆକୃଷ୍ଟ କରିବା ପାଇଁ ରାଜଧାନୀରେ ନିର୍ମାଣ ହେଉଛି ବିଶାଳ ତୋରଣ । ନୂଆ ଥିମ୍ ସହ ତୋରଣକୁ ଆକର୍ଷଣୀୟ କରିବାକୁ ଲାଗିପଡିଛନ୍ତି ନୟାପଲ୍ଲୀ, ବରମୁଣ୍ଡା ଓ ବମିଖାଲ ପୂଜା କମିଟି।

• ରାଜଧାନୀରେ କେଉଁଠି କେଉଁ ଥିମର ତୋରଣ ?

ବରମୁଣ୍ଡା ଦୁର୍ଗାପୂଜା କମିଟି ପକ୍ଷରୁ ନୂତନ ଶୈଳୀରେ ନିର୍ମାଣ ହେଉଛି 'କାମ୍ପିଲ୍ୟ ରାଜପ୍ରସାଦ'। ଚଳିତବର୍ଷ ଏହି ରାଜପ୍ରସାଦରେ ପୂଜା ପାଇବେ ମାଆ ଜଗତଜନନୀ । ୭୫ ଫୁଟ୍ ଉଚ୍ଚତା ବିଶିଷ୍ଟ ଏହି ତୋରଣ ନିର୍ମାଣ ପାଇଁ ପଶ୍ଚିମବଙ୍ଗର ୪୨ ଜଣିଆ କାରୀଗର ଟିମ୍ ଲାଗିଛନ୍ତି। ଦୀର୍ଘ ଦୁଇମାସ ହେଲା ଏହାର ନିର୍ମାଣ ଚାଲିଛି।

ପ୍ରତିବର୍ଷ ଭଳି ଚଳିତବର୍ଷ ନୟାପଲ୍ଲୀ ଦୁର୍ଗାପୂଜା କମିଟି ପକ୍ଷରୁ ନିଆରା ଶୈଳୀରେ ନିର୍ମାଣ ହେଉଛି ଇଟାଲିର 'ଭାଟିକାନ ସିଟି'। ଏହି ଭାଟିକାନ ସିଟିରେ ପୂଜା ପାଇବେ ମାଆ ଜଗତଜନନୀ। କଲିକତାର ୫୦ ଜଣ କାରୀଗର ଏହି ତୋରଣ ନିର୍ମାଣରେ ଲାଗିଛନ୍ତି। ସେପଟେ ବମିଖାଲ ଦୁର୍ଗାପୂଜା ମଣ୍ଡପରେ ନିର୍ମାଣ କରାଯାଇଛି 'ରେପ୍ଲିକା ଅଫ୍ ଦୁବାଇ'। ୬୫ ଫୁଟ୍ ଉଚ୍ଚତା ବିଶିଷ୍ଟ ଏହି ଆକର୍ଷଣୀୟ ତୋରଣକୁ କଲିକତାର ୪୦ ରୁ ଉର୍ଦ୍ଧ୍ୱ କାରୀଗର ନିର୍ମାଣ କରୁଛନ୍ତି। ପ୍ରାୟ ୩ ମାସ ହେଲା ଏହାର କାମ ଚାଲିଥିବାବେଳେ ପ୍ରାୟ ୬୩ ଲକ୍ଷ ଟଙ୍କା ବ୍ୟୟ ଅଟକଳରେ ଏହା ପ୍ରସ୍ତୁତ କରାଯାଇଛି।

ପଢନ୍ତୁ ଏହି ଖବର: କେବେ ପାଳିବେ ଦଶହରା ? ପଞ୍ଜିକା ଓ ତିଥିକୁ ନେଇ ଦ୍ୱନ୍ଦ୍ୱ ଭିତରେ ଜ୍ୟୋତିର୍ବିଦ୍ ରଖିଲେ ସ୍ପଷ୍ଟ ମତ

• ଏଇଠି ସବୁଠୁ ଉଚ୍ଚ ତୋରଣ

କଟକର ସଗଡ଼ିଆ ସାହି-ପ୍ରଫେସରପଡ଼ା ପୂଜା କମିଟି ସହରର ସବୁଠାରୁ ଉଚ୍ଚ ମୂର୍ତ୍ତି ନିର୍ମାଣ କରିବାର ପରମ୍ପରା ପାଇଁ ବେଶ୍ ଚର୍ଚ୍ଚାରେ ରହିଛି । ବିଗତ କିଛି ବର୍ଷ ହେବ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିବା ଏବଂ ପୁରୁଣା ପରମ୍ପରାକୁ ବଜାୟ ରଖିବା ପାଇଁ ଏହି କମିଟି ୧୭ରୁ ୧୮ ଫୁଟ ଉଚ୍ଚତାର ବିଶାଳ ମୂର୍ତ୍ତି ନିର୍ମାଣ କରିଆସୁଛି । ୧୯୫୩ ମସିହାରୁ ଏଠାରେ ହର ଗୌରୀ ମୂର୍ତ୍ତି ଆରମ୍ଭ ହୋଇଥିଲା । ସହରର ଅନ୍ୟ ପୂଜା ମଣ୍ଡପଗୁଡ଼ିକଠାରୁ ନିଜକୁ ସ୍ୱତନ୍ତ୍ର ରଖିବା ପାଇଁ ଏହି ବଡ଼ ମୂର୍ତ୍ତି ଗଢ଼ିବାର ଶୈଳୀ ଆପଣାଯାଇଛି । ମାଆଙ୍କ ଆଗମନ ପାଇଁ ଟ୍ଵିନସିଟିର ସବୁ ପୂଜା ମଣ୍ଡପରେ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି । ଏବେ କେବଳ ମହିଷାମର୍ଦ୍ଦିନୀ ମା' ଦୁର୍ଗାଙ୍କ ଆଗମନକୁ ଅପେକ୍ଷା ।