Argus News - କୋଚି ୱାଟର ମେଟ୍ରୋ ପରିଦର୍ଶନ କଲେ ଭୁବନେଶ୍ୱର ଗଣମାଧ୍ୟମ ପ୍ରତିନିଧି

ଭୁବନେଶ୍ଵର: ପତ୍ର ସୂଚନା କାର୍ଯ୍ୟାଳୟ (PIB) ଭୁବନେଶ୍ୱର ନେତୃତ୍ୱରେ କେରଳ ଗସ୍ତରେ ଥିବା ଓଡ଼ିଶାର ଏକ ଗଣମାଧ୍ୟମ ପ୍ରତିନିଧି ଦଳ ସୋମବାର କୋଚି ୱାଟର ମେଟ୍ରୋ ପରିଦର୍ଶନ କରିଛନ୍ତି । କୋଚି ମେଟ୍ରୋ ରେଳ ଲିମିଟେଡ୍ (KMRL) ଅଧୀନରେ ଏହି ମେଟ୍ରୋ ଏକ ଅଗ୍ରଣୀ ଏବଂ ପରିବେଶ ଅନୁକୂଳ ସହରୀ ଜଳ ପରିବହନ ସେବା ପାଲଟିଛି । ଗସ୍ତ ସମୟରେ, ପ୍ରତିନିଧି ଦଳ କୋଚି ଜଳ ମେଟ୍ରୋର ଯୋଜନା, କାର୍ଯ୍ୟକାରୀତା ଏବଂ କାର୍ଯ୍ୟକ୍ଷମ ଢାଞ୍ଚା ବିଷୟରେ କେଏମଆରଏଲର ବରିଷ୍ଠ ଅଧିକାରୀଙ୍କ ସହିତ ଆଲୋଚନା କରି ପ୍ରତ୍ୟକ୍ଷ ଅଭିଜ୍ଞତା ହାସଲ କରିଥିଲେ । ପ୍ରତିନିଧି ଦଳକୁ କେଏମଆରଏଲର ମୁଖ୍ୟ ମହାପ୍ରବନ୍ଧକ (ଜଳ ପରିବହନ) ଏବଂ କୋଚି ୱାଟର ମେଟ୍ରୋର ମୁଖ୍ୟ ଶାଜି ପି. ଜନାର୍ଦ୍ଦନନ, କେଏମଆରଏଲର ନିର୍ଦ୍ଦେଶକ (ପ୍ରକଳ୍ପ) ଡକ୍ଟର ଏମ.ପି. ରାମନାଭାସ ଏବଂ କେଏମଆରଏଲର ମୁଖ୍ୟ ଲୋକସମ୍ପର୍କ ଏବଂ ସାମାଜିକ ଗଣମାଧ୍ୟମ ଅଧିକାରୀ କେ.କେ. ଜୟକୁମାର ସବିଶେଷ ସୂଚନା ଦେଇଥିଲେ ।

ଅଧିକାରୀମାନେ କହିଥିଲେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦ୍ୱାରା ୨୫ ଏପ୍ରିଲ୍ ୨୦୨୩ରେ ଉଦଘାଟନ ହେବା ପରଠାରୁ, କୋଚି ଜଳ ମେଟ୍ରୋ ୬୦ ଲକ୍ଷରୁ ଅଧିକ ଯାତ୍ରୀଙ୍କୁ ସେବା ଯୋଗାଇଛି । ଏଥିରେ ଦୈନିକ ହାରାହାରି ୬,୦୦୦ ରୁ ଅଧିକ ଯାତ୍ରୀ ଯାତ୍ରା କରନ୍ତି । ଏହି ପ୍ରକଳ୍ପ ପରିବେଶ-ଅନୁକୂଳ ଏବଂ ସମାବେଶୀ ପରିବହନ ସୁବିଧା ରୂପେ କାର୍ଯ୍ୟ କରୁଛି । ବ୍ୟାଟେରୀ ଚାଳିତ ବୈଦ୍ୟୁତିକ ନୌକା ଏବଂ ଆଧୁନିକ ଟର୍ମିନାଲ ଯୋଗୁଁ ଅଙ୍ଗାରକାମ୍ଳ ନିର୍ଗମନ ହ୍ରାସ ପାଇଥାଏ । ଏହା ମଧ୍ୟ ଦ୍ୱୀପାଞ୍ଚଳରେ ରହୁଥିବା ଲୋକଙ୍କ ପାଇଁ ଉନ୍ନତ ପରିବହନ ସେବା ଯୋଗାଇ ଦିଏ ।

କୋଚି ୱାଟର ମେଟ୍ରୋ ସ୍ଥାନୀୟ ଦ୍ୱୀପାଞ୍ଚଳ ବାସିନ୍ଦାଙ୍କ ପାଇଁ ଉନ୍ନତ ପରିବହନ ସେବା ଯୋଗାଇ ଦେଇଛି ଯାହା ସୁରକ୍ଷିତ, ସୁଲଭ ଏବଂ ନିର୍ଭରଯୋଗ୍ୟ । ଏହା ମଧ୍ୟ ଯାତ୍ରା ସମୟ ହ୍ରାସ କରିଛି ଏବଂ ଶେଷ ମାଇଲ ସଂଯୋଗକୁ ସୁଦୃଢ଼ କରିଛି । ଏଥିସହିତ କମ୍ ଅଙ୍ଗାରକାମ୍ଳ ନିର୍ଗମନ କରୁଥିବା ସର୍ବସାଧାରଣ ପରିବହନ ପାଇଁ ଏକ ଜାତୀୟ ମଡେଲ ଭାବରେ ଉଭା ହୋଇଛି ।

ଏଥିସହ ପଢ଼ନ୍ତୁ: ଭାରତ ବନ୍ଦରେ: କଣ ଖୋଲା ରହିବ, କ'ଣ ବନ୍ଦ ରହିବ ?

ଏହି ଜଳପଥକୁ ସାଂସ୍କୃତିକ ସଂଯୋଗୀକରଣ, ଦୀର୍ଘସ୍ଥାୟୀ ପରିବହନ ଏବଂ ଆର୍ଥିକ ଅଭିବୃଦ୍ଧିର ଇଞ୍ଜିନ ଭାବରେ ବ୍ୟବହାର କରିବା ଲାଗି ଭାରତର ସମନ୍ୱିତ ଦୃଷ୍ଟିକୋଣ ଉପରେ ମେଟ୍ରୋ ଅଧିକାରୀମାନେ ସୂଚନା ଦେଇଥିଲେ । ସେମାନେ କଟକର ମହାନଦୀ କୂଳରେ କୋଚି ଜଳ ମେଟ୍ରୋ ଦ୍ୱାରା ଏଭଳି ଜଳମାର୍ଗ ପାଇଁ ହୋଇଥିବା ସମ୍ଭାବ୍ୟ ଅଧ୍ୟୟନ ବିଷୟରେ ମଧ୍ୟ ସୂଚନା ଦେଇଥିଲେ । ଏହି ଜଳମାର୍ଗ ପ୍ରକଳ୍ପରେ କଟକର ସିଲଭର ସିଟି ବୋଟ୍ କ୍ଲବ୍, ବାଲିଯାତ୍ରା ପଡ଼ିଆ, ବାରବାଟୀ ଅଞ୍ଚଳ, ହରିଣ ପାର୍କ, ଚହଟା, ଧବଳେଶ୍ୱର ମନ୍ଦିର, ମୁଣ୍ଡଳୀ ସେତୁ, ଓଡ଼ିଶା ସାମୁଦ୍ରିକ ସଂଗ୍ରହାଳୟ ଏବଂ ମଣ୍ଡାପଡା ଭିୟୁ ପଏଣ୍ଟ ସାମିଲ ରହିଛି । କାର୍ଯ୍ୟକାରୀ ହେଲେ ଏହି ପ୍ରକଳ୍ପ ସ୍ଥାନୀୟ ଅଞ୍ଚଳର ସମୃଦ୍ଧ ଐତିହାସିକ ଏବଂ ପ୍ରାକୃତିକ ମହତ୍ୱକୁ ଲୋକଲୋଚନକୁ ଆଣିପାରିବ ।

ଆଲୋଚନାରେ ଭାରତର ଅନ୍ତର୍ଦେଶୀୟ ଜଳପଥ ଏବଂ ଉପକୂଳ ପରିବହନ ନେଟୱାର୍କର ରଣନୀତିକ ବିସ୍ତାର ପାଇଁ ସାମ୍ପ୍ରତିକ ବଜେଟ୍ ପଦକ୍ଷେପଗୁଡ଼ିକର ମଧ୍ୟ ଆଲୋଚନା କରାଯାଇଥିଲା । ଏଥିରେ ଅନ୍ତର୍ଦେଶୀୟ ଜଳପଥ-୫ ଉପରେ ବିଶେଷ ଗୁରୁତ୍ୱ ଦିଆଯାଇଥିଲା । କୋଚି ଜଳ ପରିବହନ ପ୍ରକଳ୍ପକୁ ସମାବେଶୀ ଏବଂ ଦୀର୍ଘସ୍ଥାୟୀ ସହରାଞ୍ଚଳ ପରିବହନ ପାଇଁ ଏକ ମାନଦଣ୍ଡ ରୂପେ ଆଲୋଚନାରେ ଆଲୋକପାତ କରାଯାଇଥିଲା । ଏହା ବାଧାମୁକ୍ତ ବହୁମୁଖୀ ସଂଯୋଗ, ସାର୍ବଜନୀନ ସୁଗମତା ଏବଂ ବିଶ୍ୱର ଦୀର୍ଘସ୍ଥାୟୀ ଲକ୍ଷ୍ୟ ସହ ସମନ୍ଵିତ ।

କୋଚି ୱାଟର ମେଟ୍ରୋ ପ୍ରକଳ୍ପରେ ୧୫ଟି ଚିହ୍ନଟ ମାର୍ଗର ବିକାଶ ପାଇଁ କଳ୍ପନା କରାଯାଇଛି । ଏହା ୧୦ଟି ଦ୍ୱୀପକୁ ୭୮ କିଲୋମିଟର ଦୀର୍ଘ ଏକ ନେଟୱାର୍କ ଜରିଆରେ ସଂଯୋଗ କରିବ । ଏଥିରେ ୭୮ଟି ଦ୍ରୁତ ଏବଂ ବୈଦ୍ୟୁତିକ ଭାବରେ ଚାଳିତ ହାଇବ୍ରିଡ୍ ଫେରି ବା ନୌକା ୩୮ଟି ଜେଟିକୁ ଚଳାଚଳ କରିବାର ବ୍ୟବସ୍ଥା କରାଯାଇଛି । ଏହାଦ୍ୱାରା ୩୩ ହଜାରରୁ ଅଧିକ ଦ୍ୱୀପପୁଞ୍ଜବାସୀ ଉପକୃତ ହେବେ ବୋଲି ଆଶା କରାଯାଉଛି ।

ଏଥିସହ ପଢ଼ନ୍ତୁ: “ଖେଳିବା ବୟସରେ ଜୀବନ ଯୁଦ୍ଧ! ୬ ବର୍ଷର ଝିଅ ନିଜେ ନିଜକୁ ଇଞ୍ଜେକ୍ସନ ଦେଉଥିବା ଭିଡିଓ ଭାଇରାଲ”

ଓଡ଼ିଶାରୁ ଯାଇଥିବା ଗଣମାଧ୍ୟମ ପ୍ରତିନିଧି ଦଳ ଆଦି ଶଙ୍କର ଜନ୍ମସ୍ଥାନମ୍, କାଲାଡିର କୀର୍ତି ସ୍ତମ୍ଭମ୍, କୋଡାନାଡ (କପ୍ରିକଡ଼) ହାତୀ ତାଲିମ କେନ୍ଦ୍ର, କେରଳ ଲୋକକଥା ସଂଗ୍ରହାଳୟ, ଐତିହାସିକ ମଟ୍ଟାନଚେରୀ ପ୍ରାସାଦ ଏବଂ ଫୋର୍ଟ କୋଚି ଅଞ୍ଚଳ ମଧ୍ୟ ପରିଦର୍ଶନ କରିଥିଲେ । ପ୍ରତିନିଧି ଦଳରେ ପିଆଇବି ଭୁବନେଶ୍ୱରର ଉପନିର୍ଦ୍ଦେଶକ ମନୋଜ କୁମାର କାଲି, ଗଣମାଧ୍ୟମ ଏବଂ ଯୋଗାଯୋଗ ଅଧିକାରୀ ସ୍ୱାଧୀନ ଶକ୍ତି ପ୍ରସାଦ, ପିଆଇବି କୋଚିର ଗଣମାଧ୍ୟମ ଓ ଯୋଗାଯୋଗ ଅଧିକାରୀ ଶମିଳା କେ.ୱାଇ. ସାମିଲ ଥିଲେ ।

ପିଆଇବି ଗଣମାଧ୍ୟମ ଗସ୍ତର ଲକ୍ଷ୍ୟ ହେଉଛି ସାମ୍ବାଦିକମାନଙ୍କୁ ଅଭିନବ ଭିତ୍ତିଭୂମି ପ୍ରକଳ୍ପ, ବିକାଶମୂଳକ ପଦକ୍ଷେପ ଏବଂ ଜାତୀୟ ଗୁରୁତ୍ୱ ବହନ କରୁଥିବା ସାଂସ୍କୃତିକ ଐତିହ୍ୟ ସ୍ଥାନଗୁଡ଼ିକର ସିଧାସଳଖ ସୂଚନା ପ୍ରଦାନ କରିବା ଏବଂ ଏହା ଜରିଆରେ ସଚେତନ ତଥା କ୍ଷେତ୍ର-ଆଧାରିତ ରିପୋର୍ଟିଂକୁ ପ୍ରୋତ୍ସାହିତ କରିବା ।