ଭୁବନେଶ୍ଵର: ସୋସିଆଲ୍ ମିଡିଆ ଉପରେ ନଜର ରଖିଛି କମିଶନରେଟ୍ ପୋଲିସ । ସାମ୍ପ୍ରଦାୟିକ ସଦ୍‌ଭାବ ବିରୋଧରେ ପୋଷ୍ଟ କରୁଥିଲେ ରୁହନ୍ତୁ ସାବଧାନ । ଏଭଳି ପୋଷ୍ଟ କରୁଥିବା ଆଉ ଜଣେ ବ୍ୟକ୍ତିଙ୍କୁ ଗିରଫ କରିଛି ପୋଲିସ । ଜଗତସିଂହପୁରର ଅର୍ସଦ ଅଲ୍ଲୀଙ୍କୁ ଗିରଫ କରାଯାଇଥିବା ସୂଚନା ଦେଇଛନ୍ତି ପୋଲିସ କମିଶନର ସୁରେଶ ଦେବଦତ୍ତ ସିଂ ।

ପୋଲିସ କମିଶନରଙ୍କ ଅନୁସାରେ, "ଅର୍ସଦ ଅଲ୍ଲୀ ଇନଷ୍ଟାଗ୍ରାମରେ ଆପତ୍ତିଜନକ ପୋଷ୍ଟ କରିଥିଲେ । ଏନେଇ ୯ ତାରିଖରେ ଅଭିଯୋଗ ହେବା ପରେ ପୋଲିସ ତଦନ୍ତ କରିବା ସହ ଅର୍ସଦକୁ ଗିରଫ କରିଛି । ଯେ କେହିବି କୌଣସି ସମୁଦାୟ ବିରୋଧରେ ଏଭଳି ଘୃଣା ପୂର୍ଣ୍ଣ ମନ୍ତବ୍ୟ ରଖିବ ତା' ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ।"

ଏଥିସହ ପଢ଼ନ୍ତୁ: ଭୁବନେଶ୍ବର ଏମ୍ସ କର୍ମଚାରୀଙ୍କୁ ଗୁଳିମାଡ଼, ଡ୍ୟୁଟିକୁ ଆସିବା ବେଳେ ଗୋଡ଼ାଇ ଗୋଡ଼ାଇ ମାରିଲେ ଗୁଳି

ଆପତ୍ତିଜନକ ପୋଷ୍ଟ ପରେ ଅର୍ସଦ ଅଲ୍ଲୀ ଅନ୍ୟ ପୋଷ୍ଟ ମାଧ୍ୟମରେ କ୍ଷମା ପ୍ରାର୍ଥନା କରିଥିଲା । କିନ୍ତୁ କ୍ଷମା ମାଗିବା ପୂର୍ବରୁ ଆପତ୍ତିଜନକ ପୋଷ୍ଟ ଚାରିଆଡ଼େ ବ୍ୟାପି ଯାଇଥିଲା । ଯାହାକୁ ନେଇ ତାଙ୍କ ବିରୋଧରେ ଆଇଟି ଆକ୍ଟ ସହ ଧାର୍ମିକ ବିଦ୍ଵେଷ, ଜାତୀୟ ସୁରକ୍ଷାକୁ ବାଧା ପହଞ୍ଚାଇବା ଆଦି ଧାରାରେ ମାମଲା ହୋଇଛି ।

କେବଳ ଘୃଣାତ୍ମକ ପୋଷ୍ଟ ନୁହେଁ ବରଂ କିଛି ଲୋକ ରାଷ୍ଟ୍ର, ସମାଜ ବିରୋଧ ପୋଷ୍ଟ କରୁଛନ୍ତି । ସେ ସବୁ ଉପରେ ପୋଲିସ ନଜର ରଖିଥିବା କହିଛନ୍ତି ପୋଲିସ କମିଶନର । ଏଭଳି ହେଟ୍ ସ୍ପିଚ୍ ଯିଏ ପୋଷ୍ଟ କରିଛି ସିଏ ଦୋଷୀ, ଯିଏ ଆଗକୁ ସେୟାର୍ କରିବ, ଟ୍ୟାଗ୍ କଲେ ବି ତାକୁ ଦୋଷୀ ବୋଲି ଧରାଯିବ ବୋଲି ପୋଲିସ କମିଶନର କହିଛନ୍ତି ।

ଏଥିସହ ପଢ଼ନ୍ତୁ: ଫୁଲ ପାଇଁ ଯାଇ ଆଉ ଫେରିଲେନି..., ନଦୀରୁ ମିଳିଲା ଡେଣା ନଥିବା ମୃତଦେହ

ସେପଟେ ରବିବାର ୬ ଜଣ ଆଣ୍ଟି ସୋସିଆଲଙ୍କୁ କଟକ ସହରରୁ ଗିରଫ କରିଥିଲା କମିଶନରେଟ ପୋଲିସ । କଟକ ଲାଲବାଗ ଥାନା ପୋଲିସ ଓ ମଙ୍ଗଳାବାଗ ଥାନା ପୋଲିସ ୬ ଜଣ ଆଣ୍ଟି ସୋସିଆଲଙ୍କୁ ଗିରଫ କରିଛି । ଲାଲବାଗ ଥାନା ପୋଲିସ ୪ ଜଣଙ୍କୁ ଓ ମଙ୍ଗଳାବାଗ ଥାନା ପୋଲିସ ୨ ଜଣଙ୍କୁ ଗିରଫ କରିଛି । ଏମାନେ ସହରର ଶାନ୍ତ ମାହୋଲକୁ ଅଶାନ୍ତ କରିବା ପାଇଁ ଉଦ୍ୟମ କରୁଥିବା ଅଭିଯୋଗ ହୋଇଥିଲା । ୬ ଜଣଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଛି ।