ଭୁବନେଶ୍ଵର: ଅନେକ ଅକୁହା କାହାଣୀ, ଅଚିହ୍ନା ମଣିଷ । ଯେଉଁମାନଙ୍କ ଅବଦାନ ରହିଛି ଆମ ସମାଜ ପାଇଁ, ଲୋକଙ୍କ ଜୀବନକୁ ସରଳ କରି ଭରିଛି ଆନନ୍ଦର ରଙ୍ଗ । ଅର୍ଗସ୍ ନ୍ୟୁଜ୍‌ର 'ପ୍ରାଇଡ୍‌ ଅଫ୍ ଓଡ଼ିଶା' ସିଜିନ-2 ନେଇ ଆସିଛି ସେଇଭଳି କିଛି 'ସରଳ ମଣିଷର ବିରଳ କାହାଣୀ' ।

ମଣିଷ ପଶୁ ପକ୍ଷୀଙ୍କୁ ପ୍ରେମ କରେ । ଯତ୍ନ ଆଦରରେ ଘରେ କୁକୁର ପାଳେ, ବିଲେଇକୁ ପୋଷେ । ଘର ଭିତରେ ମଣିଷ ଅନେକ ପୋଷା ଜୀବଜନ୍ତୁଙ୍କୁ ରଖୁଥିବା ବେଳେ "ବିଚି ଭାଇ" ହେଉଛନ୍ତି ନିଆରା ବ୍ୟକ୍ତିତ୍ଵ । ଯିଏ ସମୁଦ୍ର କୂଳରେ ଅଲିଭ୍ ରିଡଲେ କଇଁଛଙ୍କ ସୁରକ୍ଷା ପାଇଁ ବିତାଇଲେଣି ୩୦ ବର୍ଷ ।

ପ୍ରାଇଡ୍‌ ଅଫ୍ ଓଡ଼ିଶା' ସିଜିନ-2ର ଦ୍ଵିତୀୟ ଅଧ୍ୟାୟରେ ଦେଖିବା ଖେଳିବା ବୁଲିବା ବୟସରେ ଘର ଛାଡ଼ି ସମୁଦ୍ର କୂଳରେ କୁଡ଼ିଆ କରି ବିଦେଶୀ କଇଁଛଙ୍କ ତ୍ରାଣକର୍ତ୍ତା ପାଲଟିଥିବା "ବିଚି ଭାଇ" ତଥା ବିଚିତ୍ରାନନ୍ଦ ବିଶ୍ଵାଳଙ୍କ କାହାଣୀ ।

ଏଥିସହ ପଢ଼ନ୍ତୁ: ଯେବେ ଜଳିଯାଏ ମୁହଁ ଓ ଶରୀର, ସେବେ... ପ୍ରେରଣା ସାଜନ୍ତି ପ୍ରମୋଦିନୀ

ଓଡ଼ିଶାରେ ରହିଛି ସୁଦୀର୍ଘ ବେଳାଭୂମି । ଆଉ ଓଡ଼ିଶା ହେଉଛି ଅଲିଭ୍ ରିଡଲେ କଇଁଛଙ୍କ ପାଇଁ ସ୍ଵତନ୍ତ୍ର ସ୍ଥାନ । ଯେଉଁଠିକୁ ଦୁନିଆବ୍ୟାପି କଇଁଛ ଆସନ୍ତି, ବାଲିରେ ଅଣ୍ଡାଦାନ କରି ପୋତି ଦିଅନ୍ତି । ପ୍ରତିବର୍ଷ ଓଡ଼ିଶାକୁ ଏଭଳି ଲକ୍ଷ ଲକ୍ଷ ଅଲିଭ୍ ରିଡଲେ ଆସୁଥିବା ବେଳେ ଏହି ବିଦେଶୀ ଅତିଥିଙ୍କ ରକ୍ଷା କର୍ତ୍ତା ହେଉଛନ୍ତି "ବିଚି ଭାଇ" ।

କେନ୍ଦ୍ରାପଡ଼ାର ଗହୀରମଥା ଓ ଗଞ୍ଜାମର ଋଷିକୁଲ୍ୟା ମୁହାଣରେ ଅଣ୍ଡାଦାନ କରନ୍ତି ଅଲିଭ୍ ରିଡଲେ । ପୁରୀ ନିକଟସ୍ଥ ସମୁଦ୍ର ବେଳାଭୂମିରେ ବି ଅଲିଭ୍ ରିଡଲେ ଅଣ୍ଡା ଦିଅନ୍ତି । ଅଲିଭ୍ ରିଡଲେ କେବଳ ଅଣ୍ଡା ଦିଅନ୍ତି ତା ନୁହେଁ ମାଛ ପ୍ରତି ବିପଦ ଜେଲି ଫିସ୍‌କୁ ଖାଇ ଯାଆନ୍ତି ।

ସେହି ଅଲିଭ୍ ରିଡଲେଙ୍କ ରକ୍ଷାରେ ଅଧା ଜୀବନ କାଟି ସାରିଲେଣି ବିଚି ଭାଇ । ପୁରୀ ଜିଲ୍ଲା ନିମାପଡ଼ା ଅଞ୍ଚଳର ବିଚି ଭାଇ ୧୯୯୬ରୁ ଅଲିଭ୍ ରିଡଲେଙ୍କ ଅଣ୍ଡାକୁ ସୁରକ୍ଷା ଦେଇ ଆସୁଛନ୍ତି ।

ବିଚି ଭାଇଙ୍କ ଅଲିଭ୍ ରିଡଲେ ଯାତ୍ରା ଆରମ୍ଭ ହୁଏ ଶୈଶବରୁ । ପାଠପଢ଼ା ଖେଳିବା ବୁଲିବା ବୟସରେ ବିଚି ଭାଇ ପରିବେଶ ପାଇଁ କିଛି ବଡ଼ ଚିନ୍ତା କରିଥିଲେ । ଆଉ ବିଦେଶରୁ ସମୁଦ୍ରରେ ଭାସି ଆସୁଥିବା ଲକ୍ଷ ଲକ୍ଷ ଅଲିଭ୍ ରିଡଲେଙ୍କ ସୁରକ୍ଷା ପାଇଁ ନିଜକୁ ସମର୍ପି ଦେଇଥିଲେ ।

ଏହା ଭିତରେ ୩୦ ବର୍ଷ ବିତିଗଲାଣି । ସେଦିନର ଶୈଶବ ବିଚି ଭାଇ ଏବେ ବି ସେମିତି ସମୁଦ୍ର କୂଳ କୁଡ଼ିଆରେ ରହୁଛନ୍ତି ଆଉ ଅଲିଭ୍ ରିଡଲେ କଇଁଛଙ୍କ ସୁରକ୍ଷା କରୁଛନ୍ତି । ଉଚ୍ଚ ରକ୍ତଚାପ ଯୋଗୁଁ ବିଚି ଛୋଟେଇ ଛୋଟେଇ ଚାଲୁଥିଲେ ବି ତାଙ୍କ ପାଇଁ ଦିନ କି ରାତି କିଛି ଫରକ୍ ପଡ଼େନି । କେବଳ ଅଲିଭ୍ ରିଡଲେ ଏବଂ ସେମାନଙ୍କ ଅଣ୍ଡା ଏବେ ବିଚି ଭାଇଙ୍କ ଜୀବନ ସାଥୀ ।

ଏଥିସହ ପଢ଼ନ୍ତୁ: ସ୍କୁଲ୍ ଆଗରେ କଳା ରଙ୍ଗର କାର୍... ଚାଲାଣ ହେଉଥିଲା ପିଲାଙ୍କ ମଧ୍ୟାହ୍ନଭୋଜନ ଚାଉଳ

ଅଲିଭ୍ ରିଡଲେଙ୍କ ସାଥୀ ବିଚି ଭାଇ କେବଳ କଇଁଛଙ୍କ ଅଣ୍ଡାକୁ ନିଜ ହାତରେ ସୁରକ୍ଷା ଦିଅନ୍ତି ତା' ନୁହେଁ । ଆଖପାଖ ଗାଁ ବୁଲି ସେ ଲୋକଙ୍କୁ ସଚେତନ ବି କରାନ୍ତି । ବିଚିଙ୍କ ଉଦ୍ୟମରେ ଏବେ ଆଖପାଖ ଗାଁର ମହିଳା ଏବଂ ଯୁବପିଢ଼ି ମଧ୍ୟ ଅଲିଭ୍ ରିଡଲେଙ୍କ ସୁରକ୍ଷା ସହ ପରିବେଶ ରକ୍ଷା ଦିଗରେ କାମ କରୁଛନ୍ତି ।

ବିଚି ଭାଇଙ୍କ ଭଳି ଓଡ଼ିଶାର ଅନ୍ୟ ବ୍ୟକ୍ତି ବିଶେଷଙ୍କ ସଫଳ କାହାଣୀ 'ପ୍ରାଇଡ୍‌ ଅଫ୍ ଓଡ଼ିଶା' ସିଜିନ-2 ଦେଖି ପାରିବେ ଅର୍ଗସ୍ ନ୍ୟୁଜ୍‌ରେ । ପ୍ରତି ଶନିବାର ରାତି ୮ଟା ୩୦ ଓ ରବିବାର ଦିନ ସାଢ଼େ ଗୋଟାଏ (ପୁନଃ ପ୍ରସାରଣ) ।