ଅର୍ଗସ ବ୍ୟୁରୋ : ଐତିହାସିକ ମହେନ୍ଦ୍ରଗିରି । ଗୋଟିଏ ଦିନରେ ୬ ଋତୁ ଅନୁଭୂତ ହେଉଥିବା ଓଡ଼ିଶାର ଆଦି ହିମାଳୟ । ସମୁଦ୍ର ପତନଠୁ ୭ ହଜାର ଫୁଟ୍ ଉପରେ ରହିଛି ଏହି ନିଆରା ସ୍ଥାନ । ଯାହାକି ଗଞ୍ଜାମ-ଗଜପତି ସୀମାନ୍ତରେ ଅବସ୍ଥିତ । ପ୍ରଧାନମନ୍ତ୍ରୀ ମୋଦି ମହେନ୍ଦ୍ରଗିରିକୁ ରାମାୟଣ ସର୍କିଟ୍‌ ସ୍ଥାନୀତ କରିବା ପରେ ମହେନ୍ଦ୍ରଗିରି ତୀର୍ଥ କ୍ଷେତ୍ରରେ ଥିବା ସବୁ ମନ୍ଦିର ରକ୍ଷଣାବେକ୍ଷଣା ଦାୟିତ୍ବ ଏଏସ୍‌ଆଇ ନେଇଛି । ରାମାୟଣ ଓ ମହାଭାରତ ସହ ଜଡିତ ଏହି ଆଧ୍ୟାତ୍ମିକ ପୀଠର ବିକାଶ କରାଯିବ । ଏଥିପାଇଁ ସ୍ବତନ୍ତ୍ର ପ୍ଲାନ୍ ପ୍ରସ୍ତୁତ ହେବ । ଏହି କ୍ଷେତ୍ରର ବିକାଶ ହେଲେ ମହେନ୍ଦ୍ରଗିରି ମହନୀୟତା ସାରାବିଶ୍ବ ଜାଣିପାରିବ । ମହେନ୍ଦ୍ରଗିରି ପରିଦର୍ଶନ କରିବାକୁ ଆସି ଏପରି କହିଛନ୍ତି ରାଜ୍ୟ ବାଣିଜ୍ୟ ଓ ପରିବହନ ମନ୍ତ୍ରୀ ବିଭୂତି ଭୂଷଣ ଜେନା ।

ଅଧିକ ପଢନ୍ତୁ ଓଡିଶା ଖବର

ମନ୍ତ୍ରୀ ବିଭୁତିଭୂଷଣ ଜେନା ମହେନ୍ଦ୍ରଗିରି ଗସ୍ତ କରି ଏହି ସ୍ଥାନର ବିକାଶ ଲାଗି ଗଜପତି ଜିଲ୍ଲା ପ୍ରଶାସନ ସହ ସମୀକ୍ଷା ବୈଠକ କରିଛନ୍ତି । ସାଙ୍ଗରେ ଥିଲେ ମୋହନା ବିଧାୟକ ଦାଶରଥୀ ଗମାଙ୍ଗ, ଚିକିଟି ବିଧାୟକ ମନୋରଞ୍ଜନ ଦ୍ୟାନ ସାମନ୍ତରାୟ, ଖଣ୍ଡପଡ଼ା ବିଧାୟକ ଦୁଷ୍ମନ୍ତ ସ୍ବାଇଁ । ମହେନ୍ଦ୍ରଗିରିକୁ ତପୋସ୍ଥଳୀ ଭାବେ ସ୍ଥାପନା କରାଗଲେ ଦେଶର କୋଣ ଅନୁକୋଣରୁ ସାଧୁସନ୍ଥ ଆସିବେ । ଏଠାରେ ଲକ୍ଷ ଲକ୍ଷ ଔଷଧୀୟ ଗଛ ରହିଛି ତାର ସୁରକ୍ଷା କରାଯିବ । ଏଥିସହ ମହେନ୍ଦ୍ରଗିରିରୁ ପୁରୀ ପର୍ଯ୍ୟନ୍ତ ବସ ଚଳାଚଳର ବ୍ୟବସ୍ଥା କରାଯିବ । ଯେପରି ଭକ୍ତମାନେ ତପ-ଜପର ସାନିଧ୍ୟ ଲାଭ କରିପାରିବେ । ସେଥିପ୍ରତି ଧ୍ୟାନ ଦିଆଯାଉଥିବା କହିଛନ୍ତି ମନ୍ତ୍ରୀ ବିଭୁତି ଭୂଷଣ ଜେନା ।ଭଗବାନ ପର୍ଶୁରାମଙ୍କ ତପସ୍ୟାସ୍ଥଳୀ ତଥା ମହାଭାରତ, ରାମାୟଣର ବିଭିନ୍ନ ଉପାଖ୍ୟାନରେ ବର୍ଣ୍ଣିତ ଏହି ପର୍ବତ । କେବଳ କିମ୍ବଦନ୍ତୀ ନୁହେଁ ପ୍ରାକୃତିକ ସୌନ୍ଦର୍ଯ୍ୟ ଓ ଔଷଧୀୟ ଗଛରେ ବି ପରିପୂର୍ଣ୍ଣ । ତଥାପି ୨୫ ବର୍ଷ ଶାସନ କରିଥିବା ତତ୍କାଳୀନ ବିଜେଡି ସରକାରରେ ଏଭଳି ଏକ ସ୍ଥାନ ଅବହେଳିତ ହୋଇ ରହିଆସିଥିଲା ।