Odisha Politics / ୨୪ ବର୍ଷ ସରକାରରେ ଥିଲେ, କ୍ଷମତାରୁ ଯିବା ପରେ ଆଉ ମିଳୁନି ଚାନ୍ଦା

ଭୁବନେଶ୍ଵର: କ୍ଷମତା ଯିବା ପରେ ଚାନ୍ଦା ବି ଗଲା । ତଥାପି ବଢିଛି ବିଜେଡି ପାଣ୍ଠି । ୨୦୨୫-୨୬ ବର୍ଷରେ ବିଜେଡିର ପାଣ୍ଠି ୭୩୬ କୋଟି ୫୦ ଲକ୍ଷ ଟଙ୍କାକୁ ବୃଦ୍ଧି ପାଇଛି । କିନ୍ତୁ ଚିନ୍ତାର ବିଷୟ ହେଲା ଦଳ ଗତ ବର୍ଷ ସଦସ୍ୟତା ଅଭିଯାନରେ ସଂଗ୍ରହ କରିଛି ମାତ୍ର ୬୩୦ ଟଙ୍କା । ଯାହା ଦଳର ସାଙ୍ଗଠନିକ ଦୁର୍ବଳତାକୁ ପଦାରେ ପକାଇଛି । ବିଜେଡି ସହ ଯୋଡ଼ି ହେବାକୁ ଚାହୁଁ ନାହାନ୍ତି କି ନୂଆ ଏବଂ ଯୁବ ଭୋଟର ?

୨୦୨୫-୨୬ ପାଇଁ ବିଜେଡି ଦାଖଲ କରିଥିବା ବାଲାନ୍ସ ସିଟ୍‌ରୁ ସାମ୍ନାକୁ ଆସିଛି ରୋଚକ ତଥ୍ୟ । ୨୦୨୬ ମାର୍ଚ୍ଚ ୩ ତାରିଖ ସୁଦ୍ଧା ବିଜେଡିର ମୋଟ ସମ୍ପତ୍ତିର ପରିମାଣ ୭୩୬ କୋଟି ୫୦ ଲକ୍ଷ ୩୧ ହଜାର ୬୦୦ ଟଙ୍କା ରହିଛି । ଦଳର ବକେୟା ଦେୟ ୨.୩୧କୋଟି ଟଙ୍କାକୁ ବାଦ୍ ଦେଲେ ବିଜେଡି ପାଖରେ ମୋଟ ୭୩୪.୧୮କୋଟି ଟଙ୍କାର ସମ୍ପତ୍ତି ରହିଛି ।

ଏଥିସହ ପଢ଼ନ୍ତୁ: ସୃଷ୍ଟି ହେଲା ଅବପାତ; ବାତ୍ୟା ସ୍ଥଳଭାଗ ଛୁଇଁବା ବେଳେ ୧୧୫ରୁ ୧୨୫ କିମି ବେଗରେ ପବନ 

ଯେଉଁଥିରେ ୪୩.୯୧କୋଟି ଟଙ୍କାର ସ୍ଥାବର ଓ ୬୮୯.୫୪କୋଟି ଟଙ୍କା ଅସ୍ଥାବର ସମ୍ପତ୍ତି ଅଛି । ସେଥିରୁ ୬୪୨ କୋଟି ୪୫ ଲକ୍ଷ ଟଙ୍କାର ଫିକ୍ସଡ୍ ଡିପୋଜିଟ୍ ରହିଛି ବୋଲି ଅଡିଟ୍ ରିପୋର୍ଟରେ ଦର୍ଶାଯାଇଛି । ଯେଉଁଥିରୁ ମାସିକ ପ୍ରାୟ ୪କୋଟି ଟଙ୍କା ସୁଧ ଆକାରରେ ମିଳୁଛି ।

କିନ୍ତୁ, ଚିନ୍ତା ଜନକ କଥା ହେଲା ୨୦୨୫-୨୬ ଆର୍ଥିକ ବର୍ଷରେ ସଦସ୍ୟତା ରସିଦରୁ ମାତ୍ର ୬୩୦ଟଙ୍କା ପାଇଛି ଦଳ । ପରାଜୟ ପରେ ନିଜକୁ ଶକ୍ତିଶାଳୀ କହୁଥିବା ଦଳ ସଦସ୍ୟତା ଅଭିଯାନରେ ଏତେ କମ୍ ଟଙ୍କା ଆୟ କରିବାକୁ ନେଇ କଟାକ୍ଷ କରିଛନ୍ତି ବିରୋଧୀ ।

ବିଜେଡି ଦାଖଲ କରିଥିବା ବାଲାନ୍ସ ସିଟ୍ ଅନୁସାରେ, ୨୦୨୪-୨୫ରେ ଦଳ ଇଲେକ୍ଟୋରାଲ୍ ଟ୍ରଷ୍ଟରୁ ୩୫ କୋଟି ଓ ଅନ୍ୟାନ୍ୟ ଦାତାଙ୍କଠାରୁ ୨୫ କୋଟି ଟଙ୍କା ମିଶାଇ ମୋଟ ୬୦ କୋଟିର ଚାନ୍ଦା ପାଇଥିବାବେଳେ ଚଳିତ ବର୍ଷ ଚାନ୍ଦା ସମ୍ପୂର୍ଣ୍ଣ ଶୂନ ହୋଇଯାଇଛି ।

୨୦୨୫-୨୬ ଆର୍ଥକ ବର୍ଷରେ ଦଳର ମୋଟ ଆୟ ୪୭ କୋଟି ୪ ଲକ୍ଷ ୩୨ ହଜାର ୯୫୯ ଟଙ୍କା । ବର୍ଷ ତମାମ୍ ଦଳ ମୋଟ ୩୨ କୋଟି ୪୮ ଲକ୍ଷ ୫୦ ହଜାର ୭୩୩ ଟଙ୍କା ଖର୍ଚ୍ଚ କରିଥିବା ବେଳେ ୧୪ କୋଟି ୫୫ ଲକ୍ଷ ୮୨ ହଜାର ୨୨୬ ଟଙ୍କାର ସଞ୍ଚୟ କରିଛି । ୨୦୨୫-୨୬ ଆର୍ଥିକ ବର୍ଷରେ ଦଳ କେବଳ ପ୍ରଚାର ପ୍ରସାରରେ ୧୭ କୋଟି ଟଙ୍କା ବ୍ୟୟ କରିଛି ।

ଏଥିସହ ପଢ଼ନ୍ତୁ: ଫାରୁକ୍ ଅବଦୁଲ୍ଲାଙ୍କ ପାକିସ୍ତାନ ପ୍ରେମ; କହିଲେ 'ପାକିସ୍ତାନ ପାଇଁ ବଞ୍ଚିଛି କାଶ୍ମୀର' 

ସେହିପରି ଦଳୀୟ ଅଫିସ୍ ଓ ଦୈନନ୍ଦିନ ପରିଚାଳନା ଖର୍ଚ୍ଚ ମଧ୍ୟ ପୂର୍ବବର୍ଷ ତୁଳନାରେ ଯଥେଷ୍ଟ ବୃଦ୍ଧି ପାଇଛି । ପ୍ରଶାସନିକ ଖର୍ଚ୍ଚ ପୂର୍ବ ବର୍ଷର ୩.୩୬କୋଟି ଟଙ୍କାରୁ ବୃଦ୍ଧି ପାଇ ୮.୮୧କୋଟି ଟଙ୍କାରେ ପହଞ୍ଚିଛି । ଏସବୁ ବ୍ୟତୀତ ନୂଆପଡ଼ା ଉପନିର୍ବାଚନରେ ଦଳ ୨ କୋଟି ୭୯ ଲକ୍ଷ ଟଙ୍କା ଖର୍ଚ୍ଚ କରିଛି । ରାଜନୈତିକ ସମୀକ୍ଷକଙ୍କ ମତରେ ଯୁବ ଭୋଟର ବିଜେଡି ସହ ଯୋଡି ହେବାକୁ ଚାହୁଁ ନଥିବାରୁ କମିଛି ସଦସ୍ୟତା ଅଭିଯାନ ଆୟ ।

ପୂର୍ବରୁ ଦଳର ପାଣ୍ଠିକୁ ନେଇ ବିବାଦ ରହି ଆସିଛି । ଏମିତିକି ପାଣ୍ଠି ପାଇଁ ପାଣ୍ଡିଆନ ବିଜେଡିକୁ ଏବେ ବି ନିଜ କବ୍‌ଜାରେ ରଖିଥିବା କୁହାଯାଉଛି । ସଭ୍ୟ ସଂଗ୍ରହ ବାବଦକୁ ମାତ୍ର ୬୩୦ ଟଙ୍କା ଆଦାୟ ହେବା ସାଙ୍ଗଠନିକ ଦୁର୍ବଳତାକୁ ସ୍ପଷ୍ଟ କରୁଥିବା ବେଳେ ଦଳୀୟ କାର୍ଯ୍ୟକ୍ରମ ପାଇଁ ନେତାଙ୍କୁ ପାଣ୍ଠି ନଦେବା ଚର୍ଚ୍ଚାର ବିଷୟ ପାଲଟିଛି ।