ଭଦ୍ରକ : ମାରପିଟ ଅଭିଯୋଗରେ ଗିରଫ ବିଜେଡି ସରପଞ୍ଚ। ଭଦ୍ରକ ବ୍ଲକ ଯୁବ ବିଜେଡି ସଭାପତି ତଥା ଗୁଜିଦରଡ଼ା ପଞ୍ଚାୟତର ସରପଞ୍ଚ ଫରହତ ଆଲାମଙ୍କୁ କୋର୍ଟ ଚାଲାଣ କରିଛି ଗ୍ରାମାଞ୍ଚଳ ପୋଲିସ । ଗତ ମାସରେ ଏକ ମାରପିଟ ଘଟଣାରେ ଅଭିଯୁକ୍ତ ଥିଲେ ସରପଞ୍ଚ । ଗୁଜିଦରଡ଼ା ଗ୍ରାମରେ ଗତ ମାସ 8 ତାରିଖରେ ଏକ ନିର୍ଦ୍ଦିଷ୍ଟ ସମ୍ପ୍ରଦାୟର ଜଣେ ଟ୍ରାକ୍ଟର ଡ୍ରାଇଭର ଗୋଟିଏ ଦୋକାନକୁ ଯାଇ ଥଣ୍ଡା ମାଗିଥିଲେ । ଦୋକାନରେ ଥଣ୍ଡା ନ ଥିବାରୁ ଦୋକାନୀକୁ ଗାଳି ଗୁଲଜ କରିବା ସହ ବିଜେଡ଼ି ସରପଞ୍ଚ ଓ ତାଙ୍କ ଭାଇମାନେ ମିଳିତ ଭାବେ ଦୋକାନୀ ଉପରେ ଆକ୍ରମଣ କରିଥିଲେ ।

ଅଧିକ ପଢନ୍ତୁ ଓଡିଶା ଖବର

ଦୋକାନୀଙ୍କୁ ମାଡ଼ ମରାଯିବା ସମୟରେ ଯୁବକଙ୍କ ମାଆ ଓ ଭଉଣୀ ଆସି ଉଦ୍ଧାର କରିବାକୁ ଉଦ୍ୟମ କରୁଥିବାବେଳେ ସରପଞ୍ଚ ମୋବାଇଲ ଛଡାଇ ନେଇ ପଳାଇଥିଲେ। ଘଟଣା ପରେ ଯୁବକଙ୍କ ପରିବାର ସହ ଗ୍ରାମବାସୀ ଜିଲ୍ଲାପାଳଙ୍କୁ ଦାବିପତ୍ର ପ୍ରଦାନ କରି କାର୍ଯ୍ୟାନୁଷ୍ଠାନ ଦାବି କରିଥିଲେ । ଆଗାମୀ 12 ତାରିଖରେ ହିନ୍ଦୁ ସ୍ବାଭିମାନ ମଞ୍ଚ ପକ୍ଷରୁ ଜିଲ୍ଲାପାଳଙ୍କ କାର୍ଯ୍ୟାଳୟ ପରିସରରେ ବିକ୍ଷୋଭ କରାଯିବାକୁ ନିଷ୍ପତ୍ତି ନିଆଯାଇଥିଲା। ବିକ୍ଷୋଭ ପୂର୍ବରୁ ଶନିବାର ରାତିରେ ଗ୍ରାମାଞ୍ଚଳ ପୋଲିସ ଗୁଜିଦରଡ଼ାର ବିଜେଡ଼ି ସରପଞ୍ଚ ଫରହତ ଆଲାମକୁ ଗିରଫ କରି କୋର୍ଟ ଚାଲାଣ କରିଛି।