ଦୁଇ ଦିନିଆ ଓଡ଼ିଶା ଗସ୍ତରେ ଆସୁଛନ୍ତି ବିଜେପିର ରାଷ୍ଟ୍ରୀୟ ସଭାପତି ନିତିନ ନବୀନ । ଦଳର ସର୍ବୋଚ୍ଚ ପଦବୀ ଗ୍ରହଣ କରିବା ପରେ ଏହା ହେଉଛି ତାଙ୍କର ପ୍ରଥମ ଓଡ଼ିଶା ଗସ୍ତ । ରାଷ୍ଟ୍ରୀୟ ସଭାପତି ଆସନ୍ତାକାଲି ରାତି ୧୦.୩୫ରେ ଭୁବନେଶ୍ବରରେ ପହଞ୍ଚିବେ ।

ସୋମବାର ସକାଳେ ଜଟଣୀଠାରେ ଭୁବନେଶ୍ବର ସାଂଗଠନିକ ଜିଲ୍ଲାର ପ୍ରଶିକ୍ଷଣ ଶିବିରରେ ସାମିଲ ହେବେ ନିତିନ ନବୀନ । ଜଟଣୀ ପ୍ରଶିକ୍ଷଣ ଶିବିରରେ ଯୋଗ ଦେଇ ଅଭିଭାଷଣ ରଖିବେ ରାଷ୍ଟ୍ରୀୟ ଅଧ୍ୟକ୍ଷ । ଏହା ପରେ ସେ ପୁରୀ ଯାଇ ମହାପ୍ରଭୁଙ୍କ ଦର୍ଶନ କରିବା ସହ ମହାପ୍ରସାଦ ସେବନ କରିବେ । ପୁରୀରୁ ଫେରିବା ପରେ ରାଜ୍ୟ କାର୍ଯ୍ୟାଳୟରେ ରାଜ୍ୟ କର୍ମକର୍ତ୍ତା, ମନ୍ତ୍ରୀଙ୍କ ସହ ବୈଠକ କରିବେ । ସେହିପରି କୋର୍ କମିଟି ସହ ସଂଗଠନ ସମ୍ପର୍କରେ ମଧ୍ୟ ରାଷ୍ଟ୍ରୀୟ ସଭାପତି ନିତିନ ନବୀନ ଆଲୋଚନା କରିବେ । ସରକାରଙ୍କ ସହ ସଙ୍ଗଠନର ତାଳମେଳ କେମିତି ରହିଛି, ଡବଲ ଇଞ୍ଜିନ ସରକାରଙ୍କ ଉପଲବ୍ଧି ଲୋକଙ୍କ ପାଖରେ କେତେ ଦୂର ପହଞ୍ଚିଛି, ପ୍ରଶିକ୍ଷିଣ ଶିବିରର ଷ୍ଟାଟସ କ'ଣ, ଆଗକୁ କ'ଣ କ'ଣ କାର୍ଯ୍ୟକ୍ରମ ହାତକୁ ନିଆଯିବ ସେ ନେଇ କରିବେ ଆଲୋଚନା ।

ଅଧିକ ପଢ଼ନ୍ତୁ: ୧୮ରେ ଓଡ଼ିଶା ଆସୁଛନ୍ତି ନୀତିନ ନବୀନ, ରାଜ୍ୟ ବିଜେପିକୁ ଦେବେ ନୂଆ ମନ୍ତ୍ର

ରାଷ୍ଟ୍ରୀୟ ଅଧ୍ୟକ୍ଷଙ୍କ ଗସ୍ତକୁ ନେଇ ବେଶ ଚଳଚଞ୍ଚଳ ବିଜେପି କ୍ୟାମ୍ପ । ରାଜ୍ୟ ଟିମ୍‌କୁ ନିତୀନ ନବୀନ କ'ଣ ନୂଆ ଟାସ୍କ ଦେଉଛନ୍ତି ନୂଆ ତା'ଉପରେ ସମସ୍ତଙ୍କ ନଜର ।