ଅର୍ଗସ ବ୍ୟୁରୋ : ଓଡ଼ିଶାରେ ବିଶେଷତଃ ସତ୍ୟବାଦୀରେ ଓଡିଆ ବିଶ୍ୱବିଦ୍ୟାଳୟର ସୌଧ ଉଦ୍‌ଘାଟିତ ହେବା ଆନନ୍ଦର ବିଷୟ ଓ ସ୍ୱାଗତଯୋଗ୍ୟ । ଓଡିଆ ଭାଷା, ସଂସ୍କୃତି, ଐତିହ୍ୟ ଅତ୍ୟନ୍ତ ପୁରାତନ । ନୂଆପଡା ଯୋଗୀମଠ ଓଡିଆ ଶୀଳାଲିପି ପ୍ରାୟ ୧୦ହଜାର ବର୍ଷ ତଳର ବୋଲି ଅନୁମାନ କରାଯାଏ । ସେହିପରି ବଲାଙ୍ଗୀର ଜିଲ୍ଲାର ବିକ୍ରମଖୋଲ ଶୀଳାଲିପି ପ୍ରାୟ ୩୬ଶହ ବର୍ଷ ପୂର୍ବର ବୋଲି ବିଚାର କରାଯାଏ । ଭରତମୁନୀ ନାଟ୍ୟଶାସ୍ତ୍ର ଗବେଷଣାରେ ଓଡିଆ ଭାଷା ବି ବହୁ ପୁରାତନ ତାହା ପ୍ରମାଣିତ ହୁଏ । ବ୍ୟାସକବି ଫକୀର ମୋହନ ଓଡିଆ ଭାଷା ଆନ୍ଦୋଳନ ପାଇଁ ନିଜକୁ ଉତ୍ସର୍ଗ କରିଥିଲେ । ବିଗତ ଦଶନ୍ଧି ଧରି ଓଡିଆ ଭାଷା ଆନ୍ଦୋଳନ ପାଇଁ ୮୭୮ଦିନ ଆନ୍ଦୋଳନ ହେବା ଉଲ୍ଲେଖଯୋଗ୍ୟ । ବେସରକାରୀ ନଥିପତ୍ରକୁ ଆଧାର କରି ଓଡିଆ ଭାଷା ଶାସ୍ତ୍ରୀୟ ମାନ୍ୟତା ପାଇବା ଉଲ୍ଲେଖଯୋଗ୍ୟ । ପୂର୍ବଘୋଷିତ ସରକାରୀ ନଥିପତ୍ରରେ ଓଡିଆ ଭାଷାକୁ ସରକାରୀ ଭାଷା କରିବା ଏପର୍ଯ୍ୟନ୍ତ କାର୍ଯ୍ୟକାରୀ ହୋଇନାହିଁ । ଅପରପକ୍ଷରେ ଓଡିଆ ବା ଓଡିଶା ପରିବର୍ତେ ‘ନୂଆ- ଓ’ ଓଡିଆ ଭାଷାର ଅପପ୍ରୟୋଗ ବା ଅପଭ୍ରଂଶ ହୋଇଅଛି । ତୃଣମୂଳସ୍ତର ଠାରୁ ଆରମ୍ଭ କରି ବିଦ୍ୟାଳୟ, ବିଶ୍ୱବିଦ୍ୟାଳୟ ଓ ସରକାରୀସ୍ତର ପର୍ଯ୍ୟନ୍ତ ଓଡିଆ ଭାଷାର ପ୍ରଚଳନ ଉନ୍ନୟନ ଗୁରୁତ୍ୱକୁ ଅଦ୍ୟାବଧି ଅଣଦେଖା କରାଯାଇଛି । ବିଜେଡି ସରକାରର ଓଡିଆ ଭାଷା ପ୍ରୀତି ଅତ୍ୟନ୍ତ ହାତ୍ସ୍ୟାସ୍ପଦ ବୋଲି ରାଜ୍ୟ ମୁଖପାତ୍ର ଶ୍ରୀ ରମାରଞ୍ଜନ ବଳିୟାରସିଂହ କହିଛନ୍ତି ।

ଆଜି ଓଡିଆ ବିଶ୍ୱବିଦ୍ୟାଳୟ ସୌଧ ଉଦ୍‌ଘାଟନ ମାନ୍ୟବର ମୁଖ୍ୟମନ୍ତ୍ରୀଙ୍କ ଦ୍ୱାରା ଭର୍ଚୁଆଲ ମୋଡ୍‌ରେ ଉଦ୍‌ଘାଟନ ହେବା; ‘ଅ’ ଠାରୁ ‘କ୍ଷ’ ପର୍ଯ୍ୟନ୍ତ ସଳଖ କରି କହିନପାରୁଥିବା ଓଡିଆ ବ୍ୟଙ୍ଗ କାର୍ଯ୍ୟକ୍ରମରେ ସମାଲୋଚିତ ହେଉଥିବା; ସ୍ଥାନୀୟ ପ୍ରତିନିଧିଙ୍କ ମଂଚ ମଣ୍ଡନରେ ହେଉଥିବା ସରକାରଙ୍କ ଓଡିଆ ଭାଷା ପ୍ରତି କେତେ ଦୂର ଆନ୍ତରିକତା ତାହା ସ୍ପଷ୍ଟ କରୁଛି । ଓଡିଆ ଭାଷା, ସାହିତ୍ୟ, ସଂସ୍କୃତି ସହ ସଂପୃକ୍ତ ପ୍ରତିଷ୍ଠିତା ବ୍ୟକ୍ତିବିଶେଷ ପ୍ରାଧ୍ୟାପକ, ଗବେଷକ, ସାହିତ୍ୟିକ, ଗାଳ୍ପିକ, ଓଡିଆ ଭାଷା ଆନ୍ଦୋଳନ ସହ ସଂପୃକ୍ତ ବିଶିଷ୍ଠ ଏବଂ ଅନୁଷ୍ଠାନ, ରାଜ୍ୟ ଓ କେନ୍ଦ୍ର ସାହିତ୍ୟ ଏକାଡେମୀ ଦ୍ୱାରା ପୁରଷ୍କୃତ ବ୍ୟକ୍ତିବିଶେଷଙ୍କ ଅନୁପସ୍ଥିତିରେ ଆଜିର ଉଦ୍‌ଘାଟନ ହେବା ଦୁଃଖଦାୟକ ଓ ଦୁର୍ଭାଗ୍ୟଜନକ । ସେହିପରି ସମ୍ବଲପୁରୀ, ଆଦିବାସୀ, ସାନ୍ତାଳୀ ବିଭିନ୍ନ ଭାଷା ପୋଥି ପୁରାଣ, ଶୀଳାଲିପି, ଗ୍ରନ୍ଥାକାର ସହ ସଂପୃକ୍ତ କୌଣସି ବ୍ୟକ୍ତିବିଶେଷଙ୍କୁ ଡକାନଯାଇ ସ୍ଥାନୀୟ ବିଦ୍ୟାଳୟ, ମହାବିଦ୍ୟାଳୟ ଓ କିଛି ଲୋକଙ୍କୁ ନେଇ ଉକ୍ତ ଉଦ୍‌ଘାଟନ ସରକାରଙ୍କ ଆନ୍ତରିକତା ପ୍ରତି ପ୍ରଶ୍ନ ଉଠୁଛି ବୋଲି ଶ୍ରୀ ବଳିୟାରସିଂହ କହିଛନ୍ତି ।

ଗତ ୨୭ନଭେମ୍ବର ୨୦୧୭ରୁ ଓଡିଆ ବିଶ୍ୱବିଦ୍ୟାଳୟ ଆଇନ ପ୍ରଣୟନ ହୋଇଥିଲେ ମଧ୍ୟ ୬ରୁ ୭ବର୍ଷ ବିତିଲା ପରେ ବି ଓଡିଆ ବିଶ୍ୱବିଦ୍ୟାଳୟର କାର୍ଯ୍ୟ ପୂର୍ଣ୍ଣାଙ୍ଗ ନହୋଇ ଅଧାପନ୍ତରିଆ ଉଦ୍‌ଘାଟନ ହେବା ଦୁର୍ଭାଗ୍ୟଜନକ । ଓଡିଆ ବିଶ୍ୱବିଦ୍ୟାଳୟ ମାତ୍ର ୯ଏକର ଜାଗାରେ ଗତ ଗୁରୁଦିବସରୁ ୭୨ଜଣ ପିଲାଙ୍କ ନାମଲେଖା ହୋଇ ଚଳିତ ଶିକ୍ଷାବର୍ଷରେ ଓଡିଆ ଭାଷା ସାହିତ୍ୟ, ଆଦିବାସୀ ଭାଷା ଓ ଐତିହ୍ୟ ମାତ୍ର ତିନୋଟି ବିଷୟକୁ ନେଇ ଆରମ୍ଭ ହେଲାବେଳେ ଦେଶରେ ପୋଟି ଶ୍ରୀରାମୁଲୁ ବିଶ୍ୱବିଦ୍ୟାଳୟ ହାଇଦ୍ରାବାଦ ଓ ହାମ୍ପି କନ୍ନଡ ବିଶ୍ୱବିଦ୍ୟାଳୟ ସମ୍ପର୍କରେ ଶ୍ରୀ ବଳିୟାରସିଂହ ଉଲ୍ଲେଖ କରିଥିଲେ । ପୋଟି ତେଲୁଗୁ ବିଶ୍ୱବିଦ୍ୟାଳୟ ୧୦୦ଏକର ଜମି ୪ହଜାର ଛାତ୍ରଛାତ୍ରୀ, ୫ଟି କ୍ୟାମ୍ପସ୍ ଓ ୪୦ରୁ ଉର୍ଦ୍ଧ୍ୱ ଅଧ୍ୟାପକ ମାନଙ୍କୁ ନେଇ କାର୍ଯ୍ୟରତ ଥିଲାବେଳେ କନ୍ନଡ ବିଶ୍ୱବିଦ୍ୟାଳୟ ୬୮୦ଏକର ଜମି ୫୧ଟି କୋର୍ସ ଏବଂ ସଂଖ୍ୟାଧିକ କ୍ୟାମ୍ପସ୍‌, ୨ଟି ସେଟ୍‌ଲାଇଟ୍ କ୍ୟାମ୍ପସ୍‌, ୪୫ହଜାରରୁ ଉର୍ଦ୍ଧ୍ୱ ପୁସ୍ତକ ସହ ପାଠ୍ୟାଗାର ଓ ନିଜସ୍ୱ ହେଲିପାଡ୍ ଥିଲାବେଳେ ୟୁଜିସି ନାକ୍ କେନ୍ଦ୍ର ରାଜ୍ୟ ସାହିତ୍ୟ ଏକାଡେମୀ ଓ ଶତାଧିକ ଏନ୍‌ଆର୍‌ଆଇ ସହଯୋଗରେ କାର୍ଯ୍ୟରତ । ଘରୋଇ ଶିକ୍ଷାନୁଷ୍ଠାନ ପାଇଁ ଶହ ଶହ ଏକର; କିନ୍ତୁ ଓଡିଆ ବିଶ୍ୱବିଦ୍ୟାଳୟ ପାଇଁ ମାତ୍ର ୯ ଏକର ଜମି ! ମାତ୍ର ୯ଏକର ଜମି ଏବଂ ୭୨ ଛାତ୍ରଛାତ୍ରୀ ଓ ତିନୋଟି ବିଷୟ ନେଇ ଓଡିଆ ବିଶ୍ୱବିଦ୍ୟାଳୟ ଆରମ୍ଭ ହେବା କେତେଦୂର ଯୁକ୍ତିଯୁକ୍ତ ବୋଲି ପ୍ରଶ୍ନ କରିବା ସହିତ ଶିକ୍ଷାର ବ୍ୟବସାୟୀକରଣକୁ ବିଜେଡି ସରକାର ପ୍ରୋତ୍ସାହିତ କରୁଛି ବୋଲି ଶ୍ରୀ ବଳିୟାରସିଂହ କହିଛନ୍ତି ।

୧୯୩୬ମସିହାରୁ ପ୍ରଥମ ଭାଷାଭିତିକ ରାଜ୍ୟ ଭାବେ ଓଡିଶା ପ୍ରଦେଶ ଗଠିତ ହୋଇଛି । ଓଡିଆର ଅସ୍ମିତାକୁ ନେଇ ଆମେ ଗର୍ବ କରୁଛେ । ଦେଶର ରାଷ୍ଟ୍ରପତି ଓଡିଆ, ଜଣେ ରାଜ୍ୟପାଳ ଓଡିଆ, ଦେଶର ସର୍ବୋଚ୍ଚ ପ୍ରଶାସନିକ ପଦରେ ଅନେକ ଓଡିଆ, ପଦ୍ମଶ୍ରୀ ପଦ୍ମବିଭୂଷଣ ଆଦି ସମ୍ମାନରେ ଅନେକ ବ୍ୟକ୍ତିବିଶେଷ ସମ୍ମାନିତ ହୋଇଛନ୍ତି । ଏପରିସ୍ଥଳେ ଓଡିଆ ଅସ୍ମିତାକୁ ସର୍ବାଧିକ ଗୁରୁତ୍ୱ ଦେବା କଥା । ନିର୍ବାଚନକୁ ଲକ୍ଷ୍ୟ ରଖି ବିଶ୍ୱ ଓଡିଆ ସମ୍ମିଳନୀ ପୂର୍ବରୁ ତରବରିଆ ଭାବେ ଓଡିଆ ବିଶ୍ୱବିଦ୍ୟାଳୟ ଉଦ୍‌ଘାଟନ କରିବା ପ୍ରଚାର ସର୍ବସ୍ୱ ରାଜନୀତି ନୁହେଁ କି ବୋଲି ଶ୍ରୀ ବଳିୟାରସିଂହ ପ୍ରଶ୍ନ କରିଛନ୍ତି ।

ଅଧିକ ପଢନ୍ତୁ ଓଡ଼ିଶା ଖବର

ଓଡିଆ ବିଶ୍ୱବିଦ୍ୟାଳକୁ ସତ୍ୟବାଦୀ ସମେତ ସାରା ରାଜ୍ୟବାସୀ ସ୍ୱାଗତ କରୁଛନ୍ତି । କିନ୍ତୁ ଏହା ରାଜ୍ୟର ହିତ ତଥା ଓଡିଆ ଅସ୍ମିତା ଦୃଷ୍ଟିକୋଣରୁ ପ୍ରଚାର ସର୍ବସ୍ୱ ନହୋଇ ଓଡିଆ ଭାଷା ସହ ସମସ୍ତ ବର୍ଗଙ୍କୁ ସଂପୃକ୍ତ କରିବା ସହ ଅନ୍ୟାନ୍ୟ ଭାଷାଭିତିକ ବିଶ୍ୱବିଦ୍ୟାଳୟ ଠାରୁ ଶିକ୍ଷାଦାନ, ଗବେଷଣା, ସୁଖ୍ୟାତି, ଭିତିଭୂମି ସବୁଦୃଷ୍ଟିରୁ ଉନ୍ନତ ଓ କୋଟି କୋଟି ଓଡିଆଙ୍କର ଆଶା ଆକାଂକ୍ଷା ପୂର୍ଣ୍ଣ କରିବାରେ ସମର୍ଥ ହେଉ ବୋଲି ଶ୍ରୀ ବଳିୟାରସିଂହ କହିଛନ୍ତି ।ଏହି ଅବସରରେ ରାଜ୍ୟ ଗଣମାଧ୍ୟମ ମୁଖ୍ୟ ଦିଲୀପ ମଲ୍ଲିକ ଓ ସାମାଜିକ ଗଣମାଧ୍ୟମ ମୁଖ୍ୟ ଉମାକାନ୍ତ ପଟ୍ଟନାୟକ ପ୍ରମୁଖ ଉପସ୍ଥିତ ଥିଲେ ।

Argus News | argus news | Odisha Latest News, Breaking News, Trending News, Live TV