BMC Paid Parking / ବିଏମସିର ବଡ଼ ନିଷ୍ପତ୍ତି, ଆବାସିକ ଅଞ୍ଚଳରେ 'ପେଡ୍' ପାର୍କିଂ ଯୋଜନା

ରାଜଧାନୀ ଭୁବନେଶ୍ୱରର ଗଳିକନ୍ଦିରେ ବଢ଼ୁଥିବା ଅନଧିକୃତ ଓ ବିଶୃଙ୍ଖଳିତ ପାର୍କିଂ ଯାତାୟାତକୁ କରୁଛି ଠପ୍ । ଭୁବନେଶ୍ୱର ମହାନଗର ନିଗମ ତରଫରୁ ଆବାସିକ ଅଞ୍ଚଳରେ ଲାଗୁ ହେବ 'ପେଡ୍ ପାର୍କିଂ' ଯୋଜନା । ଏହି ଯୋଜନାରେ ପ୍ରତି ୱାର୍ଡର ଖାଲି ଜାଗା ଓ ସରକାରୀ ପଡ଼ିଆକୁ କରାଯିବ ଚିହ୍ନଟ । ଦୈନିକ, ମାସିକ ଏବଂ ବାର୍ଷିକ ପାସ୍ ବ୍ୟବସ୍ଥା ଉପଲବ୍ଧ ।

ରାଜଧାନୀ ଭୁବନେଶ୍ୱରର ବଦଳୁଛି ନକ୍ସା । କିନ୍ତୁ ଗଳି କନ୍ଦିରେ ବଢ଼ୁଛି ଗାଡ଼ି ପାର୍କିଂର ଭିଡ଼ । ନିଜ ଘର ଆଗରେ ଗାଡ଼ି ରଖିବା ପାଇଁ ଜାଗା ନାହିଁ, ଆଉ ରାସ୍ତା ଉପରେ କାର୍‌ଗୁଡ଼ିକ ଧାଡ଼ି ହୋଇ ରହିବାରୁ ସାଧାରଣ ଯାତାୟାତ ସମ୍ପୂର୍ଣ୍ଣ ଠପ୍ ହୋଇ ପଡ଼ୁଛି । ଏଭଳି ସମସ୍ୟାର ସ୍ଥାୟୀ ସମାଧାନ ପାଇଁ ବିଏମସି ଆଣିବ ନୂଆ ନିୟମ ।
ଏବେ ଆବାସିକ ଅଞ୍ଚଳ ବା ରେସିଡେନ୍ସିଆଲ୍ ଜୋନ୍‌ରେ ଲାଗୁ ହେବାକୁ ଯାଉଛି 'ପେଡ୍ ପାର୍କିଂ' ସିଷ୍ଟମ୍ । ପ୍ରତିଟି ୱାର୍ଡରେ ଥିବା ସରକାରୀ ପଡ଼ିଆ ବା ଖାଲି ଜାଗାଗୁଡ଼ିକୁ ଚିହ୍ନଟ କରାଯିବ । ସେଗୁଡ଼ିକୁ ସ୍ୱତନ୍ତ୍ର ପାର୍କିଂ ସ୍ଥଳ ଭାବେ ବିକଶିତ କରାଯିବ । ଯେଉଁମାନଙ୍କର ନିଜସ୍ୱ ଗ୍ୟାରେଜ୍ ବା ପାର୍କିଂ ସ୍ପେସ୍ ନାହିଁ, ସେମାନେ ସେହି ନିର୍ଦ୍ଦିଷ୍ଟ ସ୍ଥାନରେ ସ୍ୱଳ୍ପ ଶୁଳ୍କ ଦେଇ ନିଜ ଗାଡ଼ି ରଖିପାରିବେ ।

ଅଧିକ ପଢ଼ନ୍ତୁ: ୫ ଦିନ ଯାଏଁ ସାରା ଓଡ଼ିଶାରେ ହାଇଆଲର୍ଟ, ବୁଡ଼ାଇବ ଲଘୁଚାପ ବର୍ଷା...ପୁଣି ଭସାଇବ ବନ୍ୟା

ଲୋକଙ୍କ ସୁବିଧା ପାଇଁ ଦୈନିକ ଶୁଳ୍କ ବ୍ୟତୀତ ମାସିକ ଏବଂ ବାର୍ଷିକ ପାସ୍ ବ୍ୟବସ୍ଥା ମଧ୍ୟ କରାଯିବ । ଏହି ନୂଆ ବ୍ୟବସ୍ଥା ଦ୍ୱାରା କେବଳ ଯେ ଟ୍ରାଫିକ୍ ସମସ୍ୟା ଦୂର ହେବ ତାହା ନୁହେଁ, ବରଂ ବିଏମସି ପାଇଁ ଅତିରିକ୍ତ ରାଜସ୍ୱ ମଧ୍ୟ ଆଦାୟ ହୋଇପାରିବ । ସେହିପରି ବ୍ୟବସାୟିକ ପ୍ରତିଷ୍ଠାନ ଗୁଡ଼ିକ ପାଇଁ ସରକାରୀ ଜମି ବ୍ୟବହାର ହେଉଥିଲେ ସେମାନଙ୍କଠାରୁ ମଧ୍ୟ ଶୁଳ୍କ ନିଆଯିବ । ଘରୋଇ ଜମିକୁ ମଧ୍ୟ ଭଡ଼ାରେ ନେଇ ପାର୍କିଂ ଲଟ୍ ଭାବେ ବ୍ୟବହାର କରିବାକୁ ଯୋଜନା କରୁଛି ଭୁବନେଶ୍ଵର ମହାନଗର ନିଗମ ।
ସହର ବଢ଼ୁଛି, ସହର ସହ ଗାଡ଼ି ସଂଖ୍ୟା ମଧ୍ୟ ବଢ଼ୁଛି । କିନ୍ତୁ ଆବାସିକ ଅଞ୍ଚଳରେ ବିଶୃଙ୍ଖଳିତ ପାର୍କିଂ ଏବେ ସାଧାରଣ ଲୋକଙ୍କୁ ନାକେଦମ୍ କଲାଣି । ବିଏମସିର ଏହି ନୂଆ 'ପେଡ୍ ପାର୍କିଂ' ଯୋଜନା ସଫଳତାର ସହ ଲାଗୁ ହେଲେ ଏହି ସମସ୍ୟାର ହୁଏତ ସମାଧାନ ହୋଇ ପାରିବ ।