ଅର୍ଗସ ବ୍ୟୁରୋ : କାର୍ଯ୍ୟରତ ସଫେଇ କର୍ମଚାରୀଙ୍କ ମୃତ୍ୟୁକୁ ନେଇ ପ୍ରତିବାଦ । ବିଏମସି କାର୍ଯ୍ୟାଳୟ ସମ୍ମୁଖରେ ସଫେଇ କର୍ମଚାରୀଙ୍କ ହଲ୍ଲାବୋଲ । ମୃତକଙ୍କ ପରିବାରକୁ କ୍ଷତିପୂରଣ ପାଇଁ ଉଠିଲା ଦାବି । କାର୍ଯ୍ୟରତ ମହିଳା ସଫେଇ କର୍ମଚାରୀ ଗୋଲାପ ମାହାରଙ୍କ ମୃତ୍ୟୁକୁ ନେଇ ବିଏମସି କାର୍ଯ୍ୟାଳୟ ସମ୍ମୁଖରେ ଏକାଠି ହୋଇଛନ୍ତି ଭୁବନେଶ୍ଵର ମୁନିସିପାଲଟି ସଫେଇ ମଜଦୂର ସଂଘର ଶହ ଶହ ସଫେଇ କର୍ମଚାରୀ । ଗତ ଶୁକ୍ରବାର ସଫେଇ କର୍ମଚାରୀ ଗୋଲାପ ମାହାର ସଫେଇ କାମରେ ନିୟୋଜିତ ଥିବା ବେଳେ ଅସୁସ୍ଥତା ଅନୁଭବ କରିଥିଲେ । ପାଣି ମାଗିବା ସହିତ କାମରୁ ବିରତି ନେବା ପାଇଁ ଅନୁରୋଧ କରିଥିଲେ ମଧ୍ୟ ଶୁଣିନଥିଲେ ସାନିଟାରୀ ଇନ୍ସପେକ୍ଟର, ପରେ ସେ ଅଚେତ ହୋଇପଡିବା ପରେ ସାଥି ସଫେଇ କର୍ମଚାରୀ ମେଡିକାଲ ନେଇଥିବା ବେଳେ ଡ଼ାକ୍ତର ତାଙ୍କୁ ମୃତ ଘୋଷଣା କରିଥିଲେ ।

ଏହି ଘଟଣାରେ ପ୍ରଶାସନ ଗୋଲାପ ମାହାରଙ୍କ ପରିବାରକୁ କ୍ଷତିପୂରଣ ଦେବା ସହିତ ଭରଣପୋଷଣର ଦାୟିତ୍ଵ ନେଉ ବୋଲି ଦାବି କରିଛି ସଫେଇ ମଜଦୂର ସଂଘ । ପ୍ରଚଣ୍ଡ ରୌଦ୍ରତାପକୁ ନଜରରେ ରଖି ରାଜ୍ୟ ଶ୍ରମ ବିଭାଗ ଶ୍ରମିକ ମାନଙ୍କ ପାଇଁ ମାର୍ଗଦର୍ଶିକା ଜାରି କରାଯାଇଛି । ସେପଟେ ରାଜ୍ୟ ସରକାରଙ୍କ ପକ୍ଷରୁ ସ୍କୁଲ କଲେଜ ଗୁଡିକୁ ମଧ୍ୟ ଛୁଟି ଘୋଷଣା କଲେଣି । ଏଭଳି ସ୍ଥିତିରେ ଭୁବନେଶ୍ଵର ମହାନଗର ନିଗମ କାହିଁକି ସଫେଇ କର୍ମଚାରୀଙ୍କ ପାଇଁ କୈାଣସି ଗାଇଡ ଲାଇନ ଆଣୁନାହିଁ, ଏମିତି କି ସଫେଇ କର୍ମଚାରୀଙ୍କୁ ସୁରକ୍ଷା କିଟ୍ ମଧ୍ୟ ଦିଆଯାଉନାହିଁ ବୋଲି ଅଭିଯୋଗ କରାଯାଇଛି ।

ଅଧିକ ପଢନ୍ତୁ ଓଡିଶା ଖବର

ଗ୍ରୀଷ୍ମପ୍ରବାହକୁ ଦୃଷ୍ଟିରେ ରଖି ଝାଡ଼ୁଦାର ଏବଂ ଟ୍ରଲି ଚାଳକ ମାନଙ୍କ ପାଇଁ ସମସ୍ତ ସୁବ୍ୟବସ୍ଥା କରାଯାଉ, ଏଥି ସହିତ ସଫେଇ ସମୟସୀମା ସକାଳ ୮ଟା ପର୍ଯ୍ୟନ୍ତ ରହୁ ବୋଲି ଦାବି କରାଯାଇଛି । ଗୋଲାପଙ୍କ ଭଳି ଅନ୍ୟ ସଫେଇ କର୍ମଚାରୀ ମାନେ ମଧ୍ୟ ଅନେକ ସମୟରେ ଅସୁସ୍ଥ ହୋଇପଡୁଥିବା ଦେଖିବାକୁ ମିଳିଛି । ବର୍ଷକ ବାରମାସ ସଫେଇ କର୍ମଚାରୀ ମାନେ ନାନା ସମସ୍ୟାର ସମ୍ମୁଖିନ ହେଉଥିବା ବେଳେ ଏଥିପ୍ରତି ବିଏମସି ଏବଂ ଠିକା ସଂସ୍ଥା ଦୃଷ୍ଟି ଦେଉନଥିବା ଦେଉନି। ଏହାର ସମାଧାନ ପାଇଁ ବାରମ୍ବାର ଦାବି ହେଉଥିବା ବେଳେ ମିଳିଛିତ ଖାଲି ପ୍ରତିଶ୍ରୁତି ।

Argus News | argus news | Odisha Latest News, Breaking News, Trending News, Live TV