CUO Koraput / ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟରେ ୮୦ତମ ସ୍ୱାଧୀନତା ଦିବସ ପାଳିତ

ସୁନାବେଡ଼ା/କୋରାପୁଟ: ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟରେ ୮୦ତମ ସ୍ୱାଧୀନତା ଦିବସ ଅତ୍ୟନ୍ତ ଉତ୍ସାହ ଓ ଆଡ଼ମ୍ବର ସହିତ ପାଳିତ ହୋଇଯାଇଛି । କୂଳପତି ପ୍ରଫେସର ଅଜିତ କୁମାର ଶାସନୀଙ୍କୁ ରେଜିଷ୍ଟ୍ରାର ଡ. ସଞ୍ଜୟ କୁମାର ପ୍ରଧାନ ଏବଂ ଛାତ୍ର କଲ୍ୟାଣ ଅଧ୍ୟକ୍ଷା (DSW) ଡ. ମିନତୀ ସାହୁ ସ୍ୱାଗତ ଜଣାଇଥିଲେ। ଏହାପରେ NCC କ୍ୟାଡେଟ୍‌ ଏବଂ ସୁରକ୍ଷା କର୍ମୀଙ୍କ ଦ୍ୱାରା କୁଳପତିଙ୍କୁ 'ଗାର୍ଡ ଅଫ୍ ଅନର' ପ୍ରଦାନ କରାଯାଇଥିଲା । ପ୍ରଫେସର ଶାସନୀ ପତାକା ଉତ୍ତୋଳନ କରିଥିଲେ ।

• 'ଦେଶ ପ୍ରତି ନିଜର ଦାୟିତ୍ଵ ବୁଝନ୍ତୁ'

ସମାବେଶକୁ ସମ୍ବୋଧିତ କରି କୁଳପତି ପ୍ରଫେସର ଶାସନୀ ଏକତା, ଜାତୀୟ ବିକାଶ ଏବଂ ଦେଶର ଭବିଷ୍ୟତ ଗଢ଼ିବାରେ ଯୁବସମାଜର ଗୁରୁତ୍ୱପୂର୍ଣ୍ଣ ଭୂମିକା ଉପରେ ଆଲୋକପାତ କରିଥିଲେ । ସେ ଛାତ୍ରଛାତ୍ରୀମାନଙ୍କୁ ସମାଜ ଓ ଦେଶ ପ୍ରତି ସେମାନଙ୍କର ଦାୟିତ୍ୱ ବୁଝିବା ସହ ସାମାଜିକ ବିବିଧତା, ଅଖଣ୍ଡତା ଏବଂ ଶୃଙ୍ଖଳା ରକ୍ଷା କରିବାକୁ ଉତ୍ସାହିତ କରିଥିଲେ । ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟକୁ ଜାତୀୟ ବିକାଶରେ ପ୍ରମୁଖ ଯୋଗଦାନ ଦେଉଥିବା ଏକ ଅନୁଷ୍ଠାନ ଭାବେ ଗଢ଼ିତୋଳିବା ସହ ଛାତ୍ରଛାତ୍ରୀ ଓ ଗବେଷକମାନଙ୍କୁ ଆବଶ୍ୟକ ସହଯୋଗ ଓ ଉତ୍ତମ ସୁଯୋଗ ସୃଷ୍ଟି କରିବା ପାଇଁ ସେ ନିଜର ଲକ୍ଷ୍ୟ ପ୍ରକାଶ କରିଥିଲେ ।

• 'ବିଶ୍ୱବିଦ୍ୟାଳୟ କ୍ୟାମ୍ପସରୁ ଦେଶର ବିକାଶ ଆରମ୍ଭ ହେବା ଦରକାର'

ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆର୍ଟିଫିସିଆଲ ଇଣ୍ଟେଲିଜେନ୍ସ (AI), ଗ୍ରୀନ୍ ହାଇଡ୍ରୋଜେନ୍‌ ଏବଂ ବ୍ଲୁ ଇକୋନୋମି ଭଳି ଦୂରଦୃଷ୍ଟିସମ୍ପନ୍ନ ଚିନ୍ତାଧାରାକୁ ବିଶ୍ୱବିଦ୍ୟାଳୟ ସହ ଯୋଡ଼ି ସେ କହିଥିଲେ, "ଦେଶର ବିକାଶ ବିଶ୍ୱବିଦ୍ୟାଳୟ କ୍ୟାମ୍ପସରୁ ହିଁ ଆରମ୍ଭ ହେବା ଆବଶ୍ୟକ । ଆଜିର ଯୁବପିଢ଼ି ଅତୀତର ସଂଘର୍ଷ ଦେଖିନଥିବାରୁ ସେମାନଙ୍କୁ ସଠିକ୍‌ ମାର୍ଗଦର୍ଶନର ଆବଶ୍ୟକତା ରହିଛି । ଅଧିକ ସୁବିଧା ମିଳୁଥିବା ବେଳେ ମତଭେଦ ସୃଷ୍ଟି ନକରି ଦେଶର ବିକାଶ ପାଇଁ ଏକାଠି କାର୍ଯ୍ୟ କରିବା ଦରକାର ।"

ପ୍ରଫେସର ଶାସନୀ ଅନ୍ତର-ବିଷୟକ (Inter-disciplinary) ଗବେଷଣା ଏବଂ ବିଭିନ୍ନ ବିଭାଗ ମଧ୍ୟରେ ସହଯୋଗ ଉପରେ ଗୁରୁତ୍ୱ ଦେଇଥିଲେ । ସାମାଜିକ ଉପଯୋଗୀ ପେଟେଣ୍ଟ ଓ ସାମଗ୍ରୀ ପ୍ରସ୍ତୁତ କରିବା ପାଇଁ ଉଦ୍ଭିଦ ବିଜ୍ଞାନ ଏବଂ ସମାଜଶାସ୍ତ୍ର ଭଳି ବିଭିନ୍ନ ବିଷୟ ମିଳିମିଶି କାର୍ଯ୍ୟ କରିବା ଉଚିତ । ଏହି ସନ୍ଦର୍ଭରେ ସେ ଏନ.ବି.ଆର.ଆଇ (NBRI), ଭୋପାଳର ହେରିଟେଜ୍ ବୋଟାନିକାଲ ଗାର୍ଡେନର ଉଦାହରଣ ଦେଇଥିଲେ, ଯେଉଁଠାରେ ସେଲୁଲାର ଜେଲ୍‌ ଓ ଜାଲିଆନାୱାଲାବାଗର ଐତିହାସିକ ବୃକ୍ଷଗୁଡ଼ିକର ସଂରକ୍ଷଣ କରାଯାଇଛି। ବିଶ୍ୱବିଦ୍ୟାଳୟର ଜୈବ ବିବିଧତା ବିଭାଗ ଦ୍ୱାରା ମନ୍ଦିରଗୁଡ଼ିକରେ ଥିବା ଉଦ୍ଭିଦଗୁଡ଼ିକର ଏକ 'ଲାଇଟ୍‌ ଆଣ୍ଡ ସାଉଣ୍ଡ' ପ୍ରଦର୍ଶନୀ ଆୟୋଜନ କରିବାକୁ ସେ ପ୍ରସ୍ତାବ ଦେଇଥିଲେ।

ପଢନ୍ତୁ ଏହି ଖବର: ମଧୁବାବୁ ପେନସନ ଯୋଜନାରେ ସାମିଲ୍ ହେବେ ଆଉ ୭ ଲକ୍ଷ ହିତାଧିକାରୀ: ମୁଖ୍ୟମନ୍ତ୍ରୀ

ଖବରକାଗଜ ଓ ସାମ୍ବାଦିକତାର ଗୁରୁତ୍ୱ ଏବଂ ସମାଜରେ ଛାତ୍ରଛାତ୍ରୀଙ୍କ ଭୂମିକା ଉପରେ ବକ୍ତବ୍ୟ ରଖି ସେ ଜ୍ଞାନ ଓ କୌଶଳର ସଠିକ୍‌ ଉପଯୋଗ କରିବାକୁ ପରାମର୍ଶ ଦେଇଥିଲେ । ସ୍ୱାଧୀନତା ସଂଗ୍ରାମୀମାନଙ୍କ ସ୍ୱପ୍ନକୁ ସାକାର କରିବା ପାଇଁ ପ୍ରତ୍ୟେକ ନାଗରିକ ନିଜର ମୌଳିକ କର୍ତ୍ତବ୍ୟ ନିଷ୍ଠାର ସହ ପାଳନ କରିବା ଆବଶ୍ୟକ ବୋଲି ସେ ଦୃଢ଼ୋକ୍ତି ପ୍ରକାଶ କରିଥିଲେ । DSW ଡ. ମିନତୀ ସାହୁଙ୍କ ସଂଯୋଜନାରେ ଆୟୋଜିତ ଏହି ଉତ୍ସବରେ ବିଶ୍ୱବିଦ୍ୟାଳୟର ଛାତ୍ରଛାତ୍ରୀ, ଗବେଷକ, ଅଧ୍ୟାପକ, ଅଧିକାରୀ ଓ କର୍ମଚାରୀବୃନ୍ଦ ବହୁ ସଂଖ୍ୟାରେ ଯୋଗଦେଇଥିଲେ ।