Chhath Puja Odisha / ସାରାଦେଶରେ ଛଟପୂଜାର ଧୁମ୍; ଅସ୍ତଗାମୀ ସୂର୍ଯ୍ୟଦେବଙ୍କୁ ଅର୍ଘ୍ୟ ଅର୍ପଣ କଲେ ବ୍ରତଧାରୀ

ଭୁବନେଶ୍ଵର/ସମ୍ବଲପୁର: ଆଜି ସୂର୍ଯ୍ୟୋପାସନାର ମହାପର୍ବ ଛଟ୍ ପର୍ବର ତୃତୀୟ ଦିନ । ସାରାଦେଶରେ ଛଟପୂଜାର ଧୁମ୍ । ଓଡ଼ିଶାରେ ମଧ୍ୟ ଏହି ପର୍ବକୁ ଧୁମଧାମରେ ପାଳନ କରାଯାଇଛି । ଏହି ଅବସରରେ ହଜାର ହଜାର ସଂଖ୍ୟାରେ ଶ୍ରଦ୍ଧାଳୁ ନଦୀ ଘାଟରେ ଏକାଠି ହୋଇଥିଲେ । ବ୍ରତଧାରୀ ମହିଳା ଓ ପୁରୁଷମାନେ କଠୋର ଉପବାସ ରଖି ଅସ୍ତମିତ ସୂର୍ଯ୍ୟଙ୍କୁ ଉପାସନା କରିଥିଲେ । ସନ୍ଧ୍ୟା ସମୟରେ ଭକ୍ତମାନେ ନଦୀ ଜଳରେ ପ୍ରବେଶ କରି ଅସ୍ତଗାମୀ ସୂର୍ଯ୍ୟଦେବଙ୍କୁ ଅର୍ଘ୍ୟ ଅର୍ପଣ କରିଥିଲେ । ଛଠ୍ ମାତା ଓ ସୂର୍ଯ୍ୟ ଦେବଙ୍କ ଜୟକାରରେ ପ୍ରକମ୍ପିତ ହୋଇଥିଲା ନଦୀକୂଳ ।

• ସୂର୍ଯ୍ୟୋପାସନାର ମହାପର୍ବ ଛଟ୍ ପର୍ବ

ବ୍ରତଆସ୍ଥା ଓ ସୂର୍ଯ୍ୟ ଉପାସନାର ଚାରିଦିନିଆ ମହାପର୍ବ ଛଟ୍ ପୂଜାର ଆଜି ହେଉଛି ତୃତୀୟ ତଥା ସବୁଠାରୁ ଗୁରୁତ୍ୱପୂର୍ଣ୍ଣ ଦିନ । କାର୍ତ୍ତିକ ଶୁକ୍ଳ ଷଷ୍ଠୀ ତିଥି ଅବସରରେ ଆଜି ସନ୍ଧ୍ୟାରେ ବ୍ରତଧାରୀମାନେ ନଦୀ ଓ ପୋଖରୀ ଘାଟରେ ଏକାଠି ହୋଇ ଅସ୍ତଗାମୀ ସୂର୍ଯ୍ୟଦେବଙ୍କୁ ପ୍ରଥମ ଅର୍ଘ୍ୟ ବା ‘ସନ୍ଧ୍ୟା ଅର୍ଘ୍ୟ’ ଅର୍ପଣ କରିଛନ୍ତି । ଏଥିପାଇଁ ଓଡ଼ିଶାର ବିଭିନ୍ନ ସ୍ଥାନ ସମେତ ସାରା ଦେଶରେ ଥିବା ଛଟ୍ ଘାଟଗୁଡ଼ିକରେ ପ୍ରବଳ ଭିଡ଼ ଓ ଉତ୍ସବମୁଖର ପରିବେଶ ଦେଖିବାକୁ ମିଳିଛି । ଗତକାଲି ଠାରୁ ଖର୍ଣ୍ଣା ପ୍ରସାଦ ଗ୍ରହଣ କରିବା ପରଠାରୁ ବ୍ରତଧାରୀମାନଙ୍କର କଠୋର ୩୬ ଘଣ୍ଟିଆ ନିର୍ଜଳା ଉପବାସ ଆରମ୍ଭ ହୋଇଛି ।

• ରାତିସାରା ଘାଟରେ ଚାଲିବ ଭଜନ କୀର୍ତ୍ତନ

ଆଜି ଦିନସାରା ସେମାନେ ବିନା ଜଳରେ ଉପବାସ ରହି ସୂର୍ଯ୍ୟଦେବ ଓ ଛଠି ମାତାଙ୍କ ଆରାଧନା କରିଥିଲେ । ସନ୍ଧ୍ୟାରେ ବିଭିନ୍ନ ଘାଟରେ ସୂର୍ଯ୍ୟାସ୍ତ ବେଳେ ବ୍ରତଧାରୀମାନେ ଆଣ୍ଠୁଏ ପାଣିରେ ଛିଡ଼ା ହୋଇ ଅସ୍ତଗାମୀ ସୂର୍ଯ୍ୟଙ୍କୁ କଞ୍ଚା କ୍ଷୀର ଓ ଜଳରେ ଅର୍ଘ୍ୟ ଅର୍ପଣ କରିଛନ୍ତି । ବାଉଁଶ ତିଆରି କୁଲା ଓ ଡାଲାରେ ଠେକୁଆ, ଚାଉଳ ଲଡୁ, ଆଖୁ, ନଡ଼ିଆ, ଅଦା ଓ ବିଭିନ୍ନ ଋତୁକାଳୀନ ଫଳ ସଜାଇ ପୂଜା କରାଯାଇଛି । ରାତିସାରା ଘାଟ ଓ ଘରେ ଛଠି ମାତାଙ୍କ ପାରମ୍ପରିକ ଲୋକଗୀତ ଗାନ ସହ ଭଜନ କୀର୍ତ୍ତନ ଚାଲିବ ।

ପଢନ୍ତୁ ଏହି ଖବର: ଡାକିଲାଣି କୋରାପୁଟ... ପାଖେଇ ଆସୁଛି ପରବ-୨୦୨୬

• ଛଟ୍‌ ପୂଜାରେ ସାମିଲ ଧର୍ମେନ୍ଦ୍ର ପ୍ରଧାନ

ସମ୍ବଲପୁରରେ ଛଟ୍‌ ପୂଜାରେ ସାମିଲ ହେଲେ ସାଂସଦ ଧର୍ମେନ୍ଦ୍ର ପ୍ରଧାନ । ବରେଈପାଲିସ୍ଥିତ ଛଟ୍ ଘାଟରେ ପୂଜାରେ ସାମିଲ ହୋଇଥିଲେ । ବ୍ରତଧାରୀଙ୍କୁ ଅର୍ଘ୍ୟ ଅର୍ପଣ କରିଥିଲେ । ନିଷ୍ଠା, ଭକ୍ତି ଓ ପବିତ୍ରତାର ଅନନ୍ୟ ପର୍ବ ହେଉଛି ଛଟ୍ । ୩୬ ଘଣ୍ଟାର ନିର୍ଜଳା ବ୍ରତ ରଖିଥାଆନ୍ତି ମହିଳାମାନେ । ସନ୍ତାନର ମଙ୍ଗଳ ଓ ଦୀର୍ଘାୟୁ ପାଇଁ ମାଆଙ୍କର ସାଧନା । ଅସ୍ତଗାମୀ ଓ ଉଦୟଗାମୀ ସୂର୍ଯ୍ୟଙ୍କୁ ଅର୍ଘ୍ୟଦାନ କରିଛନ୍ତି । ବିହାରୀ ସଂପ୍ରଦାୟର ଲୋକଙ୍କୁ ଛଟ୍‌ ପୂଜା ଶୁଭେଚ୍ଛା ଜଣାଇଛନ୍ତି ସାଂସଦ ଧର୍ମେନ୍ଦ୍ର ପ୍ରଧାନ ।

ବୁର୍ଲା ଠାରେ ଛଠ୍ ପୂଜା ଅବସରରେ ଆୟୋଜିତ କାର୍ଯ୍ୟକ୍ରମରେ ସାମିଲ ହେଲି । ଛଠ୍ ପର୍ବର ସବୁଠୁ ବଡ଼ ବିଶେଷତ୍ୱ ହେଉଛି ଏହାର ପବିତ୍ରତା ଏବଂ ଲୋକଆସ୍ଥା । ଆମର ଏହି ଅନନ୍ୟ ପରମ୍ପରା ଆଗାମୀ ପିଢ଼ିକୁ ମଧ୍ୟ ନିଜ ସଂସ୍କୃତି ଓ ସଂସ୍କାର ସହ ଯୋଡ଼ି ରଖିବ ବୋଲି ମୋର ବିଶ୍ୱାସ । https://t.co/kNKyKbHisO

— Dharmendra Pradhan (@dpradhanbjp) November 15, 2026