Train Accident / ଟ୍ରାକ୍‌ ରକ୍ଷଣାବେକ୍ଷଣ ଯାଞ୍ଚ ବେଳେ ଟ୍ରେନ୍‌ ଧକ୍କାରେ ଚାଲିଗଲା ଟ୍ରାକ୍‌ମ୍ୟାନ୍‌ଙ୍କ ଜୀବନ

ଛତ୍ରପୁର: ଟ୍ରାକ୍ ଯାଞ୍ଚ ବେଳେ ଟ୍ରେନ୍ ଧକ୍କାରେ ଚାଲିଗଲା ଜୀବନ । ଟ୍ରେନ୍ ଟ୍ରାକ୍‌ରେ ପ୍ରାଣ ହରାଇଲେ ଟ୍ରାକମ୍ୟାନ୍ । ଟ୍ରାକ୍‌ ରକ୍ଷଣାବେକ୍ଷଣ ଯାଞ୍ଚ ବେଳେ ଟ୍ରେନ୍‌ ଧକ୍କାରେ ଟ୍ରାକ୍‌ମ୍ୟାନ୍‌ଙ୍କ ମୃତ୍ୟୁ ଘଟିଛି । ମୃତକ ହେଉଛନ୍ତି ଖଲ୍ଲିକୋଟ ଅଞ୍ଚଳର କେ. ଗୋବିନ୍ଦ ପାତ୍ର ।

ସୂଚନା ଅନୁସାରେ, ଶୁକ୍ରବାର ଦିନ ପ୍ରାୟ ୧୦ଟା ସମୟରେ ଛତ୍ରପୁର ନିକଟସ୍ଥ ପୋଡାପଦର ରେଳ ଲାଇନ୍‌ରେ କିଛି ଟ୍ରାକ୍‌ମ୍ୟାନ୍‌ ରେଳ ଟ୍ରାକ୍ ରକ୍ଷଣାବେକ୍ଷଣ ଯାଞ୍ଚ କରୁଥିଲେ । ସେହି ସମୟରେ କେ. ଗୋବିନ୍ଦଙ୍କୁ ଧକ୍କା ଦେଇଥିଲା ଇଣ୍ଟରସିଟି ଏକ୍ସପ୍ରେସ୍ ।

ଏଥିସହ ପଢ଼ନ୍ତୁ: ଭିତ୍ତିଭୂମି ପାଇଁ ପାଣି ଭଳି ଖର୍ଚ୍ଚ ହେଲା ଟଙ୍କା…କିନ୍ତୁ ଭିତରେ ଚାଲିଥିଲା ଖୋଳ କରିବାର ଖେଳ 

ଘଟଣା ସ୍ଥଳରେ ହିଁ କେ. ଗୋବିନ୍ଦ ପାତ୍ରଙ୍କ ମୃତ୍ୟୁ ହୋଇଛି । ରେଳ ଟ୍ରାକ୍‌ ରକ୍ଷଣାବେକ୍ଷଣ କାମ ଚାଲିଥିବା ସମୟରେ ଦ୍ରୁତଗତିରେ ଆସୁଥିବା ଇଣ୍ଟରସିଟି ଏକ୍ସପ୍ରେସ୍ କେ. ଗୋବିନ୍ଦଙ୍କୁ ଧକ୍କା ଦେଇଥିଲା । ଦୁର୍ଘଟଣା ପରେ ସ୍ଥାନୀୟ ପୋଲିସ କର୍ମଚାରୀ ଓ ରେଳ ପୋଲିସ (GRP/RPF) ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିବା ସହ ବ୍ୟବଚ୍ଛେଦ ପାଇଁ ବ୍ରହ୍ମପୁର ପଠାଇଛନ୍ତି ।

IED ବିସ୍ଫୋରଣରେ ଟ୍ରାକମ୍ୟାନଙ୍କ ମୃତ୍ୟୁ

ଏହା ପୂର୍ବରୁ ୨୦୨୫ ଅଗଷ୍ଟ ୩ ତାରିଖରେ ରାଉରକେଲାରେ ଜଣେ ରେଲୱେ ଟ୍ରାକମ୍ୟାନ ପ୍ରାଣ ହରାଇଥିଲେ । କେ. ବଲାଙ୍ଗ ଥାନା ଅଞ୍ଚଳ ଦେଇ ଯାଇଥିବା ରେଲୱେ ଟ୍ରାକ୍‌ରେ ମାଓବାଦୀ ଖଞ୍ଜିଥିବା IED ବିସ୍ଫୋରଣରେ ଅତୁଆ ଓରାମ (୩୭)ଙ୍କ ମୃତ୍ୟୁ ହୋଇଥିଲା ।

ମାଓବାଦୀଙ୍କ ସହିଦ ସପ୍ତାହ ପାଳନର ଶେଷ ଦିନରେ ଏହି ଅଘଟଣ ଘଟିଥିଲା । କେ.ବଲାଙ୍ଗ ଥାନା ଅନ୍ତର୍ଗତ ରେଞ୍ଜଡ଼ା ଷ୍ଟେସନ ନିକଟରେ ଟ୍ରାକ୍ ଯାଞ୍ଚ ସମୟରେ ଏହି ଅଘଟଣ ଘଟିଥିଲା । ଆଇଡି ବିସ୍ଫୋରଣରେ ଅତୁଆଙ୍କ ସହ ଅନ୍ୟ ଜଣେ ଗୁରୁତର ଆହତ ହୋଇଥିଲେ ।

ଏଥିସହ ପଢ଼ନ୍ତୁ: ଲଘୁଚାପ ପ୍ରଭାବରେ ଆଗକୁ ବର୍ଷା ସମ୍ଭାବନା; ବର୍ଷା ବିଗାଡ଼ିବ ପୂଜା ବୁଲା 

ଉଭୟଙ୍କୁ ଗୁରୁତର ଅବସ୍ଥାରେ ଘରୋଇ ହସ୍ପିଟାଲ୍‌ରେ ଭର୍ତ୍ତି କରାଯାଇଥିବା ବେଳେ ଅତୁଆଙ୍କ ମୃତ୍ୟୁ ହୋଇଥିଲା । ସେତେବେଳେ ମାଓବାଦୀ ରେଲୱେ ଟ୍ରାକ୍ ନିକଟରେ ପୋଷ୍ଟର ମାରିଥିଲେ । ପୋଲିସ ଯାଞ୍ଚ ବେଳେ ସେଠାରୁ କିଛି ବିସ୍ଫୋରକ ମିଳିନଥିଲା । କିନ୍ତୁ ୧ କିଲୋମିଟର ଦୂରରେ ଟ୍ରାକ୍ ଯାଞ୍ଚ ବେଳେ ବିସ୍ଫୋରଣ ହୋଇଥିଲା ।