Dussehra Odisha Rain / ଲଘୁଚାପ ପ୍ରଭାବରେ ଆଗକୁ ବର୍ଷା ସମ୍ଭାବନା; ବର୍ଷା ବିଗାଡ଼ିବ ପୂଜା ବୁଲା

ଭୁବନେଶ୍ଵର: ଆସୁଛି ଆଉ ଏକ ଲଘୁଚାପ, ଏଥର ଭିଜିପାରେ ପାର୍ବଣ । ଅକ୍ଟୋବର ଦ୍ବିତୀୟ ସପ୍ତାହରେ ଆଣ୍ଡାମାନ ସାଗରରେ ସୃଷ୍ଟି ହୋଇପାରେ ଘୂର୍ଣ୍ଣିବଳୟ । ୧୩ ତାରିଖ ବେଳକୁ ଘନୀଭୂତ ହୋଇ ହେବ ଲଘୁଚାପ କ୍ଷେତ୍ର । ବର୍ଷା ପାଇଁ ବିଭିନ୍ନ ପୂଜା କମିଟି ପକ୍ଷରୁ ସ୍ବତନ୍ତ୍ର ବ୍ୟବସ୍ଥା ହୋଇଛି । ସେପଟେ ଅକ୍ଟୋବରରେ ଖରା କରୁଛି କଲବଲ । ଗତ ୨୪ ଘଣ୍ଟାରେ ନୟାଗଡ଼ରେ ସର୍ବାଧିକ ତାପମାତ୍ରା ୩୬ ଡିଗ୍ରୀ ରେକର୍ଡ ହୋଇଛି ।

ଗଭୀର ଅବପାତ ପ୍ରଭାବରେ ରାଜ୍ୟରେ ପ୍ରବଳ ବର୍ଷା ପରେ ବନ୍ୟା ଆଉ ଏବେ ଖରାର ପ୍ରକୋପ । ସକାଳୁ ସକାଳୁ ଏତେ ଖରା ଯେ ଘରୁ ବାହାରିବା ମୁସ୍କିଲ । ଗତ ୨୪ ଘଣ୍ଟାରେ ନୟାଗଡ଼ରେ ସର୍ବାଧିକ ୩୬ ଡିଗ୍ରୀ ସେଲସିୟସ୍ ତାପମାତ୍ରା ରେକର୍ଡ ହୋଇଥିବା ବେଳେ ଫୁଲବାଣୀରେ ସର୍ବନିମ୍ନ ୨୦.୦° ସେଲସିୟସ୍ ରେକର୍ଡ ହୋଇଛି । ଭୁବନେଶ୍ବରରେ ୩୫.୫ ଡିଗ୍ରୀ ଓ କଟକରେ ୩୪.୮ ଡିଗ୍ରୀ ତାପମାତ୍ରା ରେକର୍ଡ କରାଯାଇଛି ।

• ପାର୍ବଣ ପାଇଁ ଡରାଇଲାଣି ବର୍ଷା

ଅକ୍ଟୋବର ୧୩ ତାରିଖ ପାଖାପାଖି ଆଣ୍ଡାମାନ ସାଗର ଉପରେ ଲଘୁଚାପ କ୍ଷେତ୍ର ସୃଷ୍ଟି ହୋଇପାରେ । ୧୫ ଅକ୍ଟୋବର ପାଖାପାଖି ଦକ୍ଷିଣ-ମଧ୍ୟ କିମ୍ବା ତାହା ସହିତ ଲାଗିଥିବା ମଧ୍ୟ ବଙ୍ଗୋପସାଗରରେ ଦୁର୍ବଳ ଅବପାତ ସୃଷ୍ଟି ହୋଇପାରେ । ପ୍ରଭାବରେ ଦୁର୍ଗାପୂଜା ସମୟରେ ବର୍ଷା ହୋଇପାରେ ବି ଆକଳନ କରିଛନ୍ତି ପାଣିପାଗ ବିଶେଷଜ୍ଞ ସୁରେନ୍ଦ୍ର ନାଥ ପଶୁପାଳକ ।

ପଢନ୍ତୁ ଏହି ଖବର: ଏଠାରେ ପାଦ ପକାଇଲେ ଟାଣି ନେଉଛି ସମୁଦ୍ର, ୧୦୦ ମିଟର ପଛକୁ ପେଲିଦେଲା ଦୋକାନ ବଜାର

• ଚିନ୍ତାରେ ପୂଜା କମିଟି

ଦୁର୍ଗାପୂଜା ସମୟରେ ବର୍ଷା କଥା ଶୁଣି ଚିନ୍ତାରେ ପୂଜା କମିଟି । ସମସ୍ତ ପ୍ରସ୍ତୁତି ଜୋରଦାର ଚାଲିଥିବା ବେଳେ ବର୍ଷା ଖବର ମୁଣ୍ଡବ୍ୟଥାର କାରଣ ସାଜିଛି । ବର୍ଷା ହେଲେ ମା'ଙ୍କ ମୂର୍ତ୍ତି ଓ ଭକ୍ତମାନଙ୍କ ସୁରକ୍ଷା କିପରି ରହିବ, ସେନେଇ କମିଟି ପକ୍ଷରୁ ପ୍ରସ୍ତୁତି କରାଯାଇଛି । ରସୁଲଗଡ଼ ବ୍ରିଜ୍ ତଳେ ପୂଜା ଆୟୋଜନ ହୋଇଥିବାରୁ ବର୍ଷା ହେଲେ ଭକ୍ତମାନଙ୍କୁ ଯେପରି କୌଣସି ଅସୁବିଧା ନହୁଏ, ସେଥିପାଇଁ ବ୍ୟବସ୍ଥା ରହିଛି । ପୂଜାସ୍ଥଳୀ ଚାରିପାଖରେ ବିଭିନ୍ନ ଷ୍ଟଲ୍ ମଧ୍ୟ କରାଯାଇଛି। ବର୍ଷା ହେଲେ ଭକ୍ତମାନେ ସେଠାରେ ଆଶ୍ରୟ ନେଇପାରିବେ ।

ତେବେ ଆଗାମୀ ୩ ଦିନ ପାଇଁ ଓଡ଼ିଶାର କୌଣସି ଜିଲ୍ଲାରେ ବର୍ଷା କିମ୍ବା ଅନ୍ୟ କୌଣସି ପାଣିପାଗ ଚେତାବନୀ ନାହିଁ । ପାଗ ଶୁଖିଲା ରହିବ । ଏବେ ଦିନରେ ଟାଣଖରା ହେଉଥିବାବେଳେ ଆଗକୁ ୧ରୁ ୨ ଡିଗ୍ରୀ ଆହୁରି ବଢିପାରେ ଦିନ ତାପମାତ୍ରା ।