ରଜ ପରେ ବି କମୁନି ଖରାର ପ୍ରକୋପ। ଖରିଫ ଚାଷ ଆରମ୍ଭ କରିବାରେ ବିଳମ୍ବ ହେବା ଯୋଗୁଁ ଚାଷୀକୁଳ ଚିନ୍ତାରେ ଅଛନ୍ତି । ନୂଆପଡା ଜିଲ୍ଲା ଖଡ଼ିଆଳ, ବୋଡେ଼ନ ଏବଂ ସିନାପାଲି ବ୍ଲକରେ ମୌସୁମୀ ବର୍ଷାର ଦେଖାନାହିଁ । ଚାଷୀ ଜମିରେ ଧାନ ବୁଣିବା ପାଇଁ ପ୍ରସ୍ତୁତ ଥିବାବେଳେ ବର୍ଷାର ଅଭାବ ଦେଖାଦେଇଛି । ଜମିରେ ହଳ ଲଙ୍ଗଳ କରିବା ସହ ଗଛ ଲତା ସଫା କରି, ଧାନ ବିହନ ଆଣି ଘରେ ଚାଷୀ ରଖିଛି । କିନ୍ତୁ ମୌସୁମୀ ବର୍ଷା ବିଳମ୍ବ ଯୋଗୁଁ ଏବେ ଚାଷୀଙ୍କ ଚିନ୍ତା ବଢିଛି ।

• ବର୍ଷା ଅପେକ୍ଷାରେ ଚାଷୀ

ସେପଟେ ସୁବର୍ଣ୍ଣପୁର ଜିଲ୍ଲାରେ ମଧ୍ୟ ଚାଷୀମାନେ ବର୍ଷାକୁ ଅପେକ୍ଷା କରି ରହିଛନ୍ତି । ଯେଉଁଠି ବି ସାମାନ୍ୟ ବର୍ଷା ହୋଇଛି ତାହା କାମରେ ଆସୁନି ଫଳରେ ଅଡୁଆରେ ଚାଷୀ । ଜିଲ୍ଲାରେ ଚଳିତ ସିଜିନରେ ୨୭.୪୮ ମିଲି ବର୍ଷା ରେକର୍ଡ କରାଯାଇଛି । ଯାହା ଫଳରେ ଚାଷ କାମ ପୂରା ଠପ୍ ହୋଇଯାଇଥିବା ଚାଷୀମାନେ କହିଛନ୍ତି ।

• ଅଣ୍ଡିରା ବାହାଘର କରି ବର୍ଷାକୁ ନିମନ୍ତ୍ରଣ

ଅନ୍ୟପକ୍ଷରେ ପରମ୍ପରା ଅନୁଯାୟୀ ଅଣ୍ଡିରା ବାହାଘର କରି ବର୍ଷାକୁ ନିମନ୍ତ୍ରଣ କରିଛନ୍ତି କୋରେଇ ବ୍ଲକ ବନ୍ଦାଳର ଗମ୍ଭାରୀଆ ଗ୍ରାମବାସୀ । ବର ଯାଉଛି, ବାଜା ବାଜୁଛି, ବାଣ ଫୁଟୁଛି ଡିଜେ ବାଜୁଛି ରୋଷଣୀ କରି ଆସୁଛନ୍ତି ବର କନିଆ । ଇଏ କେଉଁ ଝିଅ କି ପୁଅ ବାହାଘର ନୁହେଁ । ଇଏ ହେଉଛି ଗୋଟେ ପୁଅର ଆଉ ଗୋଟେ ପୁଅ ସହିତ ବାହାଘର । ଲୋକ କଥା ଅନୁଯାୟୀ ଅଣ୍ଡିରା ବାହାଘର ହେଲେ ବର୍ଷା ହୁଏ । ଏଥିପାଇଁ ଏକାଠି ବର୍ଷାକୁ ନିମନ୍ତ୍ରଣ କରୁଛନ୍ତି ଗ୍ରାମବାସୀ । ହରିବୋଲ ହୁଳହୁଳିରେ କମ୍ପୁଛି ପୁରା ପରିବେଶ ।

ପଢନ୍ତୁ ଏହି ଖବର: ଏବେ ଖୋଲିବନି ସ୍କୁଲ; ପ୍ରବଳ ଖରାକୁ ନେଇ ବଢିଲା ଖରାଛୁଟି

• କେବେ ହେବ ମୌସୁମୀ ବର୍ଷା ?

ଜୁନ ୧୨ରେ ଦକ୍ଷିଣ ପଶ୍ଚିମ ମୌସୁମୀ ଓଡ଼ିଶାରେ ପହଞ୍ଚିଥିଲା । ତାପରେ ଏହା ବିଭିନ୍ନ ଅଂଚଳକୁ ଅଗ୍ରସର ହୋଇଥିଲେ ମଧ୍ୟ ବର୍ଷାର ପରିମାଣ କମ୍ ରହିଛି । ଆଉ ୪/୫ଦିନ ମଧ୍ୟରେ ମୌସୁମୀ ସାରା ଓଡିଶା ଛୁଇଁବ ବୋଲି ଆଞ୍ଚଳିକ ପାଣିପାଗ ବିଭାଗ ଆକଳନ କରିଛି । ଅନ୍ୟପଟେ ଗତ ୨୪ ଘଣ୍ଟାରେ ୮ଟି ସ୍ଥାନରେ ୪୦ ଡିଗ୍ରୀ ଉପରେ ତାପମାତ୍ରା ରେକର୍ଡ ହୋଇଥିବା ବେଳେ ବୌଦ୍ଧରେ ୪୨.୭ ସର୍ବାଧିକ ତାପମାତ୍ରା ରେକର୍ଡ ହୋଇଛି । ଏଥର ମୌସୁମୀ ବର୍ଷା ଏତେ ବେଶି ନଥିବା ବେଳେ ଅର୍ଥାତ ଆଶାତୀତ ବହୁତ କମ ବର୍ଷା ରହିଥିବା ଏବେବି ଗଂଜାମ, ଗଜପତ। ନୟାଗଡ, ଅନୁଗୁଳ, କେନ୍ଦୁଝର, ଝାରସୁଗୁଡା ଓ ବଲାଙ୍ଗୀର ଜିଲ୍ଲାରେ ନିଅଣ୍ଟିଆ ବର୍ଷା ରେକର୍ଡ ହୋଇଛି।