ଅର୍ଗସ ବ୍ୟୁରୋ : ରାଜ୍ୟବ୍ୟାପୀ ଧାରଣାରେ ପଶୁ ଚିକିତ୍ସକ । ନିଜର ଗୃହପାଳିତ ପଶୁଙ୍କୁ ଧରି କଟକ ଜିଲ୍ଲାପାଳଙ୍କ ଅଫିସ ଆଗରେ ରୁଣ୍ଡ ହେଲେ ଲୋକେ । କଟକ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ପଶୁପକ୍ଷୀଙ୍କୁ ଧରି ପଶୁପ୍ରେମୀଙ୍କ ପ୍ରତିବାଦ । ଚିକିତ୍ସା ନପାଇ ଏବେ ଯନ୍ତ୍ରଣାରେ ଛଟପଟ ହେଉଛନ୍ତି ନିରୀହ ପଶୁପକ୍ଷୀ । ସମଗ୍ର ରାଜ୍ୟରେ ପ୍ରାଣୀ ଚିକିତ୍ସକ ସାମୁହିକ ଛୁଟିରେ ଥିବା ଯୋଗୁଁ ଏବେ ଚିକିତ୍ସା ନପାଇ ବିଭିନ୍ନ ରୋଗରେ ଆକ୍ରାନ୍ତ ହୋଇ ଯନ୍ତ୍ରଣା ଭୋଗୁଛନ୍ତି ନିରୀହ ପଶୁପକ୍ଷୀ । ରାଜ୍ୟ ସରକାର ତୁରନ୍ତ ନିରୀହ ପଶୁପକ୍ଷୀଙ୍କ ଉପରେ ଦୃଷ୍ଟି ଦିଅନ୍ତୁ ବୋଲି ଦାବି କରିଛନ୍ତି ପଶୁପ୍ରେମୀ ଓ ନିଜେ ପ୍ରାଣୀ ଚିକିତ୍ସକ । 

କିଏ ଅଟୋ ରିକ୍ସାରେ ନିଜ ରୋଗିଣା କୁକୁର ନେଇ ଆସିଛି ତ କିଏ ସ୍କୁଟିରେ । କିଏ ନିଜ ଝୋଲାରେ ରୋଗିଣା କୁକୁଡ଼ା ନେଇ ଆସିଛି ତ କିଏ ଜରି ବ୍ୟାଗରେ ପକ୍ଷୀ । ଯଦି ସଠିକ୍ ସମୟରେ ଏମାନଙ୍କ ଚିକିତ୍ସା ନକରାଯାଏ ତା ହେଲେ ଏମାନଙ୍କ ଜୀବନ ଚାଲିଯିବ ବୋଲି ଗୁହାରି କରୁଛନ୍ତି ସବୁ କଟକ ସହରର ପଶୁପ୍ରେମୀ ମାନେ । ନିଜର ନ୍ୟାର୍ଯ୍ୟ ଦାବି ନେଇ ଜାନୁଆରୀ ୧୮ ତାରିଖରୁ ପ୍ରାଣୀ ଚିକିତ୍ସକ ସାମୁହିକ ଛୁଟିରେ ଥିବା ଯୋଗୁଁ ବର୍ତ୍ତମାନ ଗୃହପାଳିତ ପଶୁପକ୍ଷୀ ଚିକିତ୍ସା ନପାଇ ଯନ୍ତ୍ରଣାରେ ଛଟପଟ ହେଉଛନ୍ତି । 

ଅଧିକ ପଢନ୍ତୁ ଓଡ଼ିଶା ଖବର

ନିଜର ନାର୍ଯ୍ୟ ଦାବି ନେଇ ଗତ ଜାନୁଆରୀ ୧୮ ତାରିଖରୁ ସମଗ୍ର ରାଜ୍ୟରେ ସାମୁହିକ ଛୁଟିରେ ଅଛନ୍ତି ପ୍ରାଣୀ ଚିକିତ୍ସକ । ପାଖାପାଖି ୧୩୦୦ ରୁ ଉର୍ଦ୍ଧ୍ବ ପ୍ରାଣୀ ଚିକିତ୍ସକ ଏହି ସାମୁହିକ ଛୁଟିରେ ଅଛନ୍ତି । ପଶୁପକ୍ଷୀଙ୍କୁ ଉତ୍ତମ ମାନର ସ୍ବାସ୍ଥ୍ୟ ସେବା ଯୋଗାଇବା, ୨୪ ଘଣ୍ଟିଆ ସ୍ବାସ୍ଥ୍ୟ ସେବା, ମାଗଣା ଔଷଧ, ସ୍ଥାୟୀ ନିଯୁକ୍ତି, ବେତନ ବୃଦ୍ଧି ଭଳି ଅନେକ ନ୍ୟାର୍ଯ୍ୟ ଦାବି ନେଇ ସାମୁହିକ ଛୁଟିରେ ଅଛନ୍ତି ପ୍ରାଣୀ ଚିକିତ୍ସକ । ଯାହାଫଳରେ ଏବେ ପ୍ରାଣୀ ଚିକିତ୍ସା କୋମାରେ ଚାଲି ଯାଇଛି । ତେବେ ଏପରି ସମୟରେ ପଶୁପକ୍ଷୀ ଚିକିତ୍ସା ନପାଇ କିଏ ଯନ୍ତ୍ରଣା ଭୋଗୁଛି ତ କାହାର ଜୀବନ ଚାଲି ଯାଉଛି।  ଅନ୍ୟପଟେ କଟକ ଜିଲ୍ଲାପାଳଙ୍କ ନିକଟରେ ଆସିଥିବା ପଶୁପ୍ରେମୀଙ୍କ ସମସ୍ୟାର ସମାଧାନ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି ଜିଲ୍ଲାପାଳ ।