Ward Dispute / ମଣ୍ଡପକୁ ନେଇ ମୁହାଁମୁହିଁ BJDର ଦୁଇ କର୍ପୋରେଟର, ସିଲଭର ସିଟିରେ ଜୋର୍ ଚର୍ଚ୍ଚା

କଟକ: ୱାର୍ଡ ନମ୍ବର ୨୪ ନା ୨୭ ? କୁମାର ଉତ୍ସବ ମଣ୍ଡପକୁ ନେଇ କଟକରେ ତେଜିଲା ରାଜନୀତି । ୱାର୍ଡ ସୀମା ବିବାଦକୁ ନେଇ ମୁହାଁମୁହିଁ ହୋଇଛନ୍ତି ଦୁଇ ମହିଳା ବିଜେଡି କର୍ପୋରେଟର । ଜଣେ କହୁଛନ୍ତି ମଣ୍ଡପ ମୋ ୱାର୍ଡରେ, ଆଉ ଜଣେ କହୁଛନ୍ତି ମଣ୍ଡପ ମୋ ୱାର୍ଡରେ ।

ବିବାଦର କେନ୍ଦ୍ରରେ ରହିଛି ସାଆନ୍ତ ସାହିର କୁମାର ଉତ୍ସବ ମଣ୍ଡପର ନବୀକରଣ କାମ ଏବଂ ଉଦଘାଟନୀ ଫଳକ । ଏପଟେ ପୂର୍ବତନ କର୍ପୋରେଟରଙ୍କ ବି ବୟାନବାଜି । ତେବେ ପ୍ରଶ୍ନ, ବିଧାୟକ ପାଣ୍ଠିରୁ କାମ ହେଲା କେଉଁ ୱାର୍ଡ ପାଇଁ ? ତେଜିଲା ବିଜେଡି ମଧ୍ୟରେ ଗୋଷ୍ଠୀ କନ୍ଦଳ ।

ଏଥିସହ ପଢ଼ନ୍ତୁ: ଭୀଷଣ ବାତ୍ୟାରେ ପରିଣତ ହେଲା 'ଅର୍ଣ୍ଣବ'; ଘଣ୍ଟାପ୍ରତି ୧୭ କିମି ବେଗରେ ମାଡ଼ି ଆସୁଛି 

କୁମାର ଉତ୍ସବ ମଣ୍ଡପକୁ ନେଇ ରାଜନୈତିକ ଛକାପଞ୍ଝା । ଗୋଟିଏ ମଣ୍ଡପ, ଦୁଇଟି ୱାର୍ଡ ନମ୍ବର । ଆଉ ଦୁଇ ବିଜେଡି ମହିଳା କର୍ପୋରେଟରଙ୍କ ମଧ୍ୟରେ ତୁ ତୁ-ମେଁ ମେଁ । କଟକ ମହାନଗର ନିଗମ ଅଞ୍ଚଳର ସାଆନ୍ତ ସାହି କୁମାର ଉତ୍ସବ ମଣ୍ଡପକୁ ନେଇ ଏବେ ଚର୍ଚ୍ଚା ଜୋର୍ ଧରିଛି ।

ମଣ୍ଡପଟି ୨୪ ନମ୍ବର ୱାର୍ଡରେ ନା ୨୭ ନମ୍ବର ୱାର୍ଡରେ, ତାକୁ ନେଇ ଦୁଇ ବିଜେଡି କର୍ପୋରେଟରଙ୍କ ମଧ୍ୟରେ ବିବାଦ ସୃଷ୍ଟି ହୋଇଛି । ୨୦୧୮ ମସିହାରେ ମଣ୍ଡପ ନିକଟରେ ଥଣ୍ଡା ପାନୀୟ ଜଳ ପ୍ରକଳ୍ପର ଉଦଘାଟନୀ ଫଳକରେ ଲେଖା ହୋଇଛି ୨୭ ନମ୍ବର ୱାର୍ଡ ।

କିନ୍ତୁ ଏବେ କୁମାର ଉତ୍ସବ ମଣ୍ଡପର ନବୀକରଣ କାମ ପରେ ଲାଗିଥିବା ଫଳକରେ ଉଲ୍ଲେଖ ରହିଛି ୨୪ ନମ୍ବର ୱାର୍ଡ । ଏହି ଦୁଇଟି ଫଳକ ଏବେ ବିବାଦର ମୁଖ୍ୟ କାରଣ । ୨୦୧୮ ମସିହା ୨୭ ନମ୍ବର ୱାର୍ଡ, ବର୍ତ୍ତମାନ ୨୪ ନମ୍ବର ୱାର୍ଡ । ଏହି ବିବାଦକୁ ନେଇ ଖୋଲାଖୋଲି ଅସନ୍ତୋଷ ପ୍ରକାଶ କରିଛନ୍ତି କର୍ପୋରେଟର ।

ଅନ୍ୟପଟେ, ଇତିଶ୍ରୀଙ୍କ ଅଭିଯୋଗକୁ ଖଣ୍ଡନ କରିଛନ୍ତି ୨୪ ନମ୍ବର ୱାର୍ଡର କର୍ପୋରେଟର ଦୀପ୍ତିମୟୀ ମୂଳିଆ । ତାଙ୍କ କହିବା କଥା, "କୁମାର ଉତ୍ସବ ମଣ୍ଡପ ୨୪ ନମ୍ବର ୱାର୍ଡ ଅଧୀନରେ ରହିଛି । ପୂର୍ବରୁ ମଧ୍ୟ ଏଠାରେ ବିଧାୟକ ପାଣ୍ଠିରୁ ଅନେକ କାମ ହୋଇଛି । ଏବେ ମଧ୍ୟ ୨୪ ନମ୍ବର ୱାର୍ଡ ପାଇଁ ୱାର୍କ ଅର୍ଡର ମିଳିଛି ।"

ଏଥିସହ ପଢ଼ନ୍ତୁ: ବରଗଡ଼ ଧନୁଯାତ୍ରା କଂସ ଭୂମିକାରୁ ଓହରିଗଲେ ସୁଶୀଲ ମେହେର; କିଏ ହେବ ନୂଆ କଂସ ? 

ଇତିଶ୍ରୀ ଶସ୍ତା ରାଜନୀତି କରୁଛନ୍ତି ବୋଲି ପାଲଟା ଅଭିଯୋଗ କରିଛନ୍ତି ଦୀପ୍ତିମୟୀ । ସେପଟେ ଏହି ବିବାଦରେ ମୁହଁ ଖୋଲିଛନ୍ତି ପୂର୍ବତନ କର୍ପୋରେଟର ରଞ୍ଜନ ବିଶ୍ୱାଳ।

ପ୍ରଶ୍ନ ଉଠୁଛି, ଯଦି ଏହି ମଣ୍ଡପକୁ ନେଇ ୱାର୍ଡ ସୀମାରେ ଏତେ ଦ୍ଵନ୍ଦ୍ଵ ରହିଛି, ତେବେ ସରକାରୀ ରେକର୍ଡରେ ଏହା କେଉଁ ୱାର୍ଡରେ ରହିଛି ? କେଉଁ ୱାର୍ଡ ଆଧାରରେ ବିଧାୟକ ପାଣ୍ଠିରୁ ଅର୍ଥ ମଞ୍ଜୁର ହେଲା ? ଆଉ ଉଦଘାଟନୀ ଫଳକରେ ଦୁଇଟି ଭିନ୍ନ ୱାର୍ଡ ନମ୍ବର କାହିଁକି ?