ଭୁବନେଶ୍ଵର: ପୁଣି ବନ୍ଦ ହେବ ବାବୁଙ୍କ ଦରମା । ନିର୍ଦ୍ଦେଶ ଦେଲେ ଜିଲ୍ଲାପାଳ । ସରକାରଙ୍କ ଜନଶୁଣାଣି ପୋର୍ଟାଲରେ ଲୋକେ କରୁଥିବା ଅଭିଯୋଗ ସମୟରେ ସମାଧାନ ହୋଇପାରୁ ନାହିଁ । ଯାହାକୁ ନେଇ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠ ମଧ୍ୟ ଖପ୍ପା ହୋଇଛି ।

ଫଳରେ ଲୋକଙ୍କ ଅଭିଯୋଗକୁ ପକାଇ ଗଡ଼ାଇ ଗଡ଼ାଇ ଚାଲିଥିବା ବାବୁଙ୍କ ଦରମା ବନ୍ଦ ପାଇଁ ନିର୍ଦ୍ଦେଶ ଦେଇଛନ୍ତି କଟକ ଜିଲ୍ଲାପାଳ । ଏନେଇ ଜିଲ୍ଲାପାଳ ଜିଲ୍ଲା ଟ୍ରେଜେରୀରକୁ ଜଣାଇଛନ୍ତି । ଖିଲାପକାରୀ ଅଧିକାରୀଙ୍କ ନଭେମ୍ବର ମାସର ସ୍ଥଗିତ ରଖିବାକୁ ଜାରି ହୋଇଛି ନିର୍ଦ୍ଦେଶନାମା ।

ଏଥିସହ ପଢ଼ନ୍ତୁ: ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠର ଅଭିଯୋଗ ସମାଧାନରେ ବିଳମ୍ବ, ୪୮ ଅଧିକାରୀଙ୍କ ଦରମା ରୋକିବାକୁ ଚିଠି

୩୬ ଜଣ ସରକାରୀ ଅଫିସରଙ୍କ ଦରମା ବନ୍ଦ ପାଇଁ ନିର୍ଦ୍ଦେଶ ଦେଇଛନ୍ତି କଟକ ଜିଲ୍ଲାପାଳ । ଦରମା ବନ୍ଦ ପାଇଁ ନିର୍ଦ୍ଦେଶ ଦିଆଯାଇଥିବା ତାଲିକାରେ ଅଛନ୍ତି କଟକ ସିଡିଏମଓ, କଟକ ଓ ଆଠଗଡ଼ ଉପଜିଲ୍ଲାପାଳଙ୍କ ସହ ଜିଲ୍ଲାର ୧୧ ବିଡିଓ, ୮ ତହସିଲଦାର ଓ ଅନ୍ୟ ବିଭାଗର କର୍ମଚାରୀ ।

ତେବେ କଟକ ଜିଲ୍ଲାରେ ଏହା ପ୍ରଥମ ଘଟଣା ନୁହେଁ । ପୂର୍ବରୁ ବି ଜନଶୁଣାଣି ପୋର୍ଟାଲ ଓ ମୁଖ୍ୟମନ୍ତ୍ରୀ ଅଭିଯୋଗ ପ୍ରକୋଷ୍ଠକୁ ଆସୁଥିବା ଅଭିଯୋଗର ସମାଧାନରେ ବେଶ ପଛୁଆ ରହିଛି କଟକ । ଯେଉଁଥିପାଇଁ କଟକ ଜିଲ୍ଲାପାଳ, ଖିଲାପୀ ବାବୁଙ୍କ ଉପରେ ଚଳିତବର୍ଷ ଦୁଇ ଦୁଇଥର କାର୍ଯ୍ୟାନୁଷ୍ଠାନ ଭାବେ ଦରମା ବନ୍ଦ କରିଛନ୍ତି । କିନ୍ତୁ କାର୍ଯ୍ୟରେ କିଛି ବି ଫରକ ଆସୁନି ।

ଗତ ମାର୍ଚ୍ଚ ମାସରେ କଟକ ଜିଲ୍ଲାର ୪୮ ଜଣ ସରକାରୀ ଅଧିକାରୀଙ୍କ ଫେବ୍ରୁଆରୀ ମାସ ଦରମା ଉପରେ ରୋକ୍ ଲଗାଇଥିଲେ ଜିଲ୍ଲାପାଳ । ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠରେ ଅଭିଯୋଗ କରିଥିବା ଅଭିଯୋଗକାରୀଙ୍କ ଅଭିଯୋଗର ସମାଧାନ ହୋଇ ନଥିବାରୁ ଜିଲ୍ଲାପାଳ ଦତ୍ତାତ୍ରେୟ ଭାଉସାହେବ ଶିନ୍ଦେ ଏହି ପଦକ୍ଷେପ ଗ୍ରହଣ କରିଥିଲେ ।

ଏଥିସହ ପଢ଼ନ୍ତୁ: ଜନଶୁଣାଣି ପୋର୍ଟାଲରେ ଅଭିଯୋଗ ନଶୁଣିବାରୁ ୧୪ ଜଣ ଅଫିସରଙ୍କ ଦରମା ବନ୍ଦ

ପୁଣି ଥରେ ସେପ୍ଟେମ୍ବର ମାସରେ ଆସିଥିଲା ଦରମା ବନ୍ଦ ନିର୍ଦ୍ଦେଶନାମା । ଜନଶୁଣାଣି ପୋର୍ଟାଲରେ ଅଭିଯୋଗ ନଶୁଣିବାରୁ ୧୪ ଜଣ ଅଫିସରଙ୍କ ଦରମା ବନ୍ଦ ପାଇଁ ଚିଠି କରିଥିଲେ କଟକ ଜିଲ୍ଲାପାଳ ।

ଏବେ ପୁଣି ୩୬ ଜଣ ବାବୁଙ୍କ ନଭେମ୍ବର ମାସର ଦରମାରେ ରୋକ୍ ଲଗାଇବାକୁ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି । ଜିଲ୍ଲାପାଳଙ୍କ ପରବର୍ତ୍ତୀ ନିର୍ଦ୍ଦେଶନାମା ପର୍ଯ୍ୟନ୍ତ ଦରମା ବନ୍ଦ ପାଇଁ ନିର୍ଦ୍ଦେଶ ରହିଛି ।