Cyclone Arnab Alert / ମହାନଦୀ ଓ କାଠଯୋଡ଼ି ନଦୀ କୂଳିଆ ଅଞ୍ଚଳ ଉପରେ ସ୍ଵତନ୍ତ୍ର ନଜର; ୫୩୬ ବାତ୍ୟା ଆଶ୍ରୟସ୍ଥଳୀ ପ୍ରସ୍ତୁତ

କଟକ: ବାତ୍ୟା ଆସିବା ପୂର୍ବରୁ ଆକ୍ସନ ମୋଡ୍‌ରେ କଟକ ଜିଲ୍ଲା ପ୍ରଶାସନ। ସମ୍ଭାବ୍ୟ ବାତ୍ୟାକୁ ନେଇ କଟକ ଜିଲ୍ଲାରେ ଜୋରଦାର ପ୍ରସ୍ତୁତି । ଏନେଇ ଅତିରିକ୍ତ ଜିଲ୍ଲାପାଳ ଦିବ୍ୟାଲୋଚନ ମହନ୍ତଙ୍କ ସାମ୍ବାଦିକ ସମ୍ମିଳନୀ । ଜରୁରୀକାଳୀନ ସ୍ଥିତିରେ କିଭଳି ତୁରନ୍ତ ପଦକ୍ଷେପ ନିଆଯିବ, ତାକୁ ନେଇ ପ୍ରସ୍ତୁତ ହୋଇଛି ରଣନୀତି । ପ୍ରଶାସନର ମୁଖ୍ୟ ଲକ୍ଷ୍ୟ ହେଉଛି ଜିରୋ କାଜୁଆଲିଟି । ଅର୍ଥାତ୍ ବାତ୍ୟା ସମୟରେ ଯେପରି କୌଣସି ଜୀବନହାନି ନ ହୁଏ, ତାହାକୁ ଦିଆଯାଉଛି ସର୍ବାଧିକ ଗୁରୁତ୍ୱ ।

କଟକ ଜିଲ୍ଲାକୁ ୨୬ ତାରିଖରେ ୟେଲୋ ଆଲର୍ଟ, ୨୭ ଓ ୨୮ ତାରିଖରେ ଅରେଞ୍ଜ ଆଲର୍ଟ ଜାରି କରାଯାଇଛି । ପବନ ସହ ପ୍ରବଳ ବର୍ଷାର ଆଶଙ୍କା ଥିବାରୁ ସମସ୍ତ ବିଭାଗକୁ ଆଲର୍ଟ କରାଯାଇଛି । ଜିରୋ କାଜୁଆଲିଟି ବା ଶୂନ୍ୟ ଜୀବନହାନି ଲକ୍ଷ୍ୟରେ ଚାଲିଛି ପ୍ରସ୍ତୁତି । ନଦୀ କୂଳିଆ ଗାଁଠୁ ଆରମ୍ଭ କରି ସହରର ଜଳବନ୍ଦୀ ସମସ୍ୟା ପର୍ଯ୍ୟନ୍ତ, ସବୁ ଦିଗ ଉପରେ ରହିବ ପ୍ରଶାସନର ନଜର ।

• ନଦୀ କୂଳିଆ ଅଞ୍ଚଳ ଉପରେ ନଜର

ମହାନଦୀ ଓ କାଠଯୋଡ଼ି ନଦୀର ଜଳସ୍ତର ଏବଂ ନଦୀ କୂଳିଆ ଅଞ୍ଚଳ ଉପରେ ରହିବ ସ୍ୱତନ୍ତ୍ର ନଜର । ମହାନଦୀ ଅବବାହିକାର ୪୭୪ଟି ଏବଂ କାଠଯୋଡ଼ି ଅବବାହିକାର ୨୩ଟି ଗାଁ ପ୍ରତି ବିଶେଷ ଧ୍ୟାନ ଦିଆଯିବ । ଆବଶ୍ୟକ ପଡ଼ିଲେ ୨୬ ତାରିଖରୁ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯିବ । ଏଥିପାଇଁ ୫୩୬ଟି ବାତ୍ୟା ଆଶ୍ରୟସ୍ଥଳୀ ପ୍ରସ୍ତୁତ ରଖିବା ସହ ସେଠାରେ ଶୁଖିଲା ଖାଦ୍ୟ, ରନ୍ଧା ଖାଦ୍ୟ, ପାନୀୟ ଜଳ, ବିଦ୍ୟୁତ୍‌ ଓ ସ୍ୱାସ୍ଥ୍ୟସେବା ଯୋଗାଇବାକୁ ଯୋଜନା ହୋଇଛି । ପ୍ରତ୍ୟେକ ସ୍ଥାନରେ ନିୟୋଜିତ ହେବେ ନୋଡାଲ ଅଫିସର ।

• ଦମ୍ଭ ତୋରଣ ଲଗାଇବାକୁ ନିର୍ଦ୍ଦେଶ

ବାତ୍ୟା ପବନରେ ବଡ଼ ବଡ଼ ତୋରଣ, ଗେଟ୍‌, ଲାଇଟ୍‌ ଗେଟ୍‌ ଓ ହୋର୍ଡିଂ ଭାଙ୍ଗି ଦୁର୍ଘଟଣା ଘଟିବାର ଆଶଙ୍କା ଥିବାରୁ ଏଗୁଡ଼ିକୁ ହଟାଇବା ପାଇଁ ଦିଆଯାଇଛି ନିର୍ଦ୍ଦେଶ । ଏଥିପାଇଁ ୪୮ ଘଣ୍ଟାର ଅଲ୍ଟିମେଟମ୍‌ ଦିଆଯାଇଛି । ନିର୍ଦ୍ଦେଶ ପାଳନ ନକଲେ ପ୍ରଶାସନ ପକ୍ଷରୁ ଉଚ୍ଛେଦ କରାଯିବ । ବିଶେଷକରି ଗଜଲକ୍ଷ୍ମୀ ପୂଜା ପାଇଁ ତୋରଣ କିମ୍ବା ଗେଟ୍‌ ନିର୍ମାଣ କରୁଥିବା କମିଟି ଗୁଡ଼ିକୁ ଏଥିରୁ ନିବୃତ୍ତ ରହିବାକୁ ଅନୁରୋଧ କରାଯାଇଛି । ଯଦି ନିର୍ମାଣ ଅତ୍ୟାବଶ୍ୟକ ହୁଏ, ତେବେ ପ୍ରବଳ ପବନର ବେଗ ସହ୍ୟ କରିପାରୁଥିବା ସୁରକ୍ଷିତ ତୋରଣ ଓ ଗେଟ୍‌ ନିର୍ମାଣ କରିବାକୁ କୁହାଯାଇଛି ।

• ନିୟୋଜିତ ରହିବେ ସ୍ୱତନ୍ତ୍ର ମ୍ୟାନପାୱାର

ବର୍ଷା ହେଲେ ସହରରେ ଯେପରି ଜଳବନ୍ଦୀ ସମସ୍ୟା ନ ଉପୁଜେ, ସେଥିପାଇଁ ପ୍ରସ୍ତୁତି ଚାଲିଛି । KMC ଅଞ୍ଚଳରେ ୩୦୦ରୁ ଊର୍ଦ୍ଧ୍ୱ ମୋଟର ପମ୍ପ ସହ ନିୟୋଜିତ ରହିବେ ସ୍ୱତନ୍ତ୍ର ମ୍ୟାନପାୱାର । ନାଳନର୍ଦ୍ଦମା ସଫା କରିବା ସହ ଜଳ ନିଷ୍କାସନ ବ୍ୟବସ୍ଥାକୁ ସଜାଗ ରଖିବାକୁ ନିର୍ଦ୍ଦେଶ ଦିଆଯାଇଛି । ଅନ୍ୟପଟେ, ନଦୀବନ୍ଧ ଓ କେନାଲ ବନ୍ଧର ମରାମତି ପାଇଁ ଜଳସମ୍ପଦ ବିଭାଗକୁ କୁହାଯାଇଛି । ବାତ୍ୟା ପରେ ରାସ୍ତାରେ ଗଛ ଉପୁଡ଼ିବା କିମ୍ବା ବିଦ୍ୟୁତ୍‌ ଖୁଣ୍ଟ ଭାଙ୍ଗିବା ଭଳି ପରିସ୍ଥିତିର ମୁକାବିଲା ପାଇଁ TPCODL ଓ ଅଗ୍ନିଶମ ବିଭାଗ ପକ୍ଷରୁ ସ୍ୱତନ୍ତ୍ର ଟିମ୍‌ ନିୟୋଜିତ ରହିବେ । ବାତ୍ୟା ମୁକାବିଲା ପାଇଁ ଉଦ୍ଧାରକାରୀ ଟିମ୍‌କୁ ମଧ୍ୟ ସଜାଗ ରଖାଯାଇଛି । SRCଙ୍କ ପକ୍ଷରୁ ୨୫ଟି ବୋଟ୍‌ ବ୍ୟବସ୍ଥା ରହିଥିବାବେଳେ ୩ଟି ଓଡ୍ରାଫ୍‌ ଟିମ୍‌ ନିୟୋଜିତ ରହିବେ । ଆଠଗଡ଼, KMC ଏବଂ ଅନ୍ୟ ଏକ ରିଜର୍ଭ ଟିମ୍‌କୁ ନେଇ ମଧ୍ୟ ପ୍ରସ୍ତୁତି ରହିଛି । ଏହା ସହ ଜିଲ୍ଲା ପ୍ରଶାସନ ନିକଟରେ ରହିଛନ୍ତି ୩୦୦ ଆପଦା ମିତ୍ର ।

ପଢନ୍ତୁ ଏହି ଖବର: ମାଡ଼ି ଆସୁଛି ବାତ୍ୟା "ଅର୍ଣ୍ଣବ"; "ଜିରୋ କାଜୁଏଲଟି ଲକ୍ଷ୍ୟ, ସଜାଗ ଅଗ୍ନିଶମ ବିଭାଗ

• CDMOଙ୍କୁ ୨୪ ଘଣ୍ଟା ଆଲର୍ଟ ରହିବାକୁ ନିର୍ଦ୍ଦେଶ

ବାତ୍ୟା ସମୟରେ ସ୍ୱାସ୍ଥ୍ୟସେବା ଯେପରି ବାଧାପ୍ରାପ୍ତ ନହୁଏ, ସେଥିପାଇଁ CDMOଙ୍କୁ ୨୪ ଘଣ୍ଟା ଆଲର୍ଟ ରହିବାକୁ ନିର୍ଦ୍ଦେଶ ରହିଛି । ଗର୍ଭବତୀ ମହିଳାଙ୍କୁ ୨୫ ତାରିଖ ସୁଦ୍ଧା ଡାକ୍ତରଖାନାରେ ଭର୍ତ୍ତି କରାଇବାକୁ କୁହାଯାଇଛି, ଯାହାଦ୍ୱାରା ଜରୁରୀ ସମୟରେ ପ୍ରସବ ସମ୍ବନ୍ଧୀୟ ସମସ୍ୟାର ତୁରନ୍ତ ମୁକାବିଲା କରାଯାଇପାରିବ । ସେହିପରି ପଶୁ ସମ୍ପଦର ସୁରକ୍ଷା ପାଇଁ CDVOଙ୍କୁ ପଶୁପାଳକଙ୍କୁ ଆବଶ୍ୟକ ପରାମର୍ଶ ଦେବାକୁ କୁହାଯାଇଛି ।

• ଟୋଲ୍ ଫ୍ରି ନମ୍ବର ଜାରି

ଅନ୍ୟପଟେ ସରକାରୀ ଅଧିକାରୀ ଓ କର୍ମଚାରୀଙ୍କ ଛୁଟି ବାତିଲ କରାଯାଇଛି। ମୁଖ୍ୟାଳୟ ନଛାଡ଼ିବାକୁ ନିର୍ଦ୍ଦେଶ ରହିଛି। ଯେକୌଣସି ଜରୁରୀ ପରିସ୍ଥିତିରେ ସହାୟତା ପାଇଁ ୧୦୭୭ ଟୋଲ୍‌ ଫ୍ରି ନମ୍ବର ଜାରି କରାଯାଇଛି । ବାତ୍ୟାର ମୁକାବିଲା ପାଇଁ ପ୍ରଶାସନ ପକ୍ଷରୁ ଏକାଧିକ ପଦକ୍ଷେପ ନିଆଯାଇଛି । ତେବେ ଆଗାମୀ ୭୨ ଘଣ୍ଟା କଟକ ଜିଲ୍ଲା ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଲୋକଙ୍କ ସୁରକ୍ଷା, ଜୀବନହାନି ରୋକିବା ଓ ଜରୁରୀ ସେବାକୁ ସ୍ୱାଭାବିକ ରଖିବା ପ୍ରଶାସନ ପାଇଁ ରହିବ ସବୁଠୁ ବଡ଼ ଆହ୍ୱାନ ।