Gupchup Vendors Raid / ବାଲିଯାତ୍ରା ପୂର୍ବରୁ ବଡ଼ ଆକ୍ସନ; ୨୦ରୁ ଅଧିକ ଗୁପଚୁପ ବ୍ୟବସାୟୀଙ୍କ ଉପରେ ଚଢ଼ାଉ

କଟକ: ଐତିହାସିକ ବାଲିଯାତ୍ରା ପୂର୍ବରୁ କଟକ ମହାନଗର ନିଗମ ସ୍ୱାସ୍ଥ୍ୟ ବିଭାଗ ପକ୍ଷରୁ ସହରର ଗୁପଚୁପ ବ୍ୟବସାୟୀଙ୍କ ଉପରେ ବଡ଼ ଧରଣର ଚଢ଼ାଉ କରାଯାଇଛି । ଅସ୍ୱାସ୍ଥ୍ୟକର ପରିବେଶରେ ଗୁପଚୁପ ଓ ଅନ୍ୟାନ୍ୟ ଖାଦ୍ୟ ସାମଗ୍ରୀ ପ୍ରସ୍ତୁତ ହେଉଥିବା ଅଭିଯୋଗରେ ସ୍ୱାସ୍ଥ୍ୟ ବିଭାଗ ଟିମ୍ ପକ୍ଷରୁ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ସହରର ୩ଟି ପ୍ରମୁଖ ସ୍ଥାନରେ ଥିବା ୨୦ରୁ ଅଧିକ ଗୁପଚୁପ ବ୍ୟବସାୟୀଙ୍କ ଠେଲା ଓ ଗୋଦାମ ଉପରେ ଚଢ଼ାଉ କରାଯାଇ ବିପୁଳ ପରିମାଣର ଅସ୍ୱାସ୍ଥ୍ୟକର ଗୁପଚୁପ ଓ ପାଣିକୁ ନଷ୍ଟ କରିଦିଆଯାଇଛି ।

ଅନ୍ୟପଟେ, ଗୁପଚୁପ ଜବତ ଓ ନଷ୍ଟ କରାଯିବାକୁ ନେଇ ଘଟଣାସ୍ଥଳରେ ଉତ୍ତେଜନା ଦେଖିବାକୁ ମିଳିଥିଲା । ଜବତ ସାମଗ୍ରୀକୁ ନେଇ ବ୍ୟବସାୟୀମାନେ ସ୍ୱାସ୍ଥ୍ୟ ବିଭାଗ ଟିମ୍ ସହ ଦୀର୍ଘ ସମୟ ଧରି ଯୁକ୍ତିତର୍କ କରିଥିବା ଦେଖିବାକୁ ମିଳିଛି । ବାଲିଯାତ୍ରା ସମୟରେ ଲୋକଙ୍କ ସ୍ୱାସ୍ଥ୍ୟ ସୁରକ୍ଷାକୁ ଦୃଷ୍ଟିରେ ରଖି ଆଗକୁ ମଧ୍ୟ ଏଭଳି ଚଢ଼ାଉ ଜାରି ରହିବ ବୋଲି ବିଭାଗ ପକ୍ଷରୁ ଚେତାବନୀ ଦିଆଯାଇଛି ।

• ଗୁପଚୁପ୍ ତିଆରି ସ୍ଥାନରେ ଚଢାଉ

କଟକ ଐତିହାସିକ ବାଲିଯାତ୍ରା ପାଖେଇ ଆସୁଥିବାରୁ କଟକ ମହାନଗର ନିଗମର ସ୍ଵାସ୍ଥ୍ୟ ବିଭାଗ ପକ୍ଷରୁ ଚଢାଉ କରାଯାଇଥିଲା । ଗୁପଚୁପ୍ ବ୍ୟବସାୟୀମାନେ ଅସ୍ଵାସ୍ଥ୍ୟକର ପରିବେଶରେ ଗୁପଚୁପ୍ ତିଆରି କରୁଥିବାବେଳେ ନିମ୍ନମାନର ତେଲ ମଧ୍ୟ ବ୍ୟବହାର କରୁଛନ୍ତି । ଏହାସହିତ ଖାଦ୍ୟରେ କଲର୍ ମିଶାଉଥିବା ଦେଖିବାକୁ ମିଳିଛି । ଚଢାଉ ସମୟରେ କେଏମସି ସ୍ଵାସ୍ଥ୍ୟ ବିଭାଗର ଅଧିକାରୀମାନେ ଗୁପଚୁପ୍ ନଷ୍ଟ କରିଥିଲେ । ଆଗକୁ ସ୍ଵଚ୍ଛ ପରିବେଶରେ ଖାଦ୍ୟ ତିଆରି କରିବାକୁ ବ୍ୟବସାୟୀମାନଙ୍କୁ ୱାର୍ଣ୍ଣିଂ ଦିଆଯାଇଛି । ନଚେତ୍ ମୋଟା ଅଙ୍କର ଫାଇନ୍ ଦେବାକୁ ପଡ଼ିବ ବୋଲି ଚେତାବନୀ ଦିଆଯାଇଛି । ବାଲିଯାତ୍ରା ବୁଲିବାକୁ ଆସୁଥିବା ପର୍ଯ୍ୟଟକମାନେ ଯେପରି ସ୍ଵାସ୍ଥ୍ୟକର ଖାଦ୍ୟ ଖାଇବେ ଓ ଭଲ ଅନୁଭବ ନେଇ ଘରକୁ ଯିବେ, ସେନେଇ ରେଡ୍ କରାଯାଉଛି ବୋଲି କହିଛନ୍ତି ସ୍ଵାସ୍ଥ୍ୟ ବିଭାଗର ଅଧିକାରୀ । 

ପଢନ୍ତୁ ଏହି ଖବର: କଟକ ଐତିହାସିକ ବାଲିଯାତ୍ରାର ଉଦ୍‌ଘାଟନ କରିବେ ରାଷ୍ଟ୍ରପତି ଦ୍ରୌପଦୀ ମୁର୍ମୁ

• ନଭେମ୍ବର ୨୪ରୁ ଐତିହାସିକ ବାଲିଯାତ୍ରା

କାର୍ତ୍ତିକ ପୂର୍ଣ୍ଣିମାରୁ ପ୍ରତିବର୍ଷ ଆରମ୍ଭ ହୁଏ ଐତିହାସିକ କଟକ ବାଲିଯାତ୍ରା । କଟକ ବାଲିଯାତ୍ରା ହେଉଛି ଓଡ଼ିଶାର ସର୍ବବୃହତ ତଥା ଦକ୍ଷିଣପୂର୍ବ ଏସିଆର ବୃହତ ବାଣିଜ୍ୟ ମେଳା । ଚଳିତ ବର୍ଷ ନଭେମ୍ବର ୨୪ରୁ ଡିସେମ୍ବର ୧ ତାରିଖ ପର୍ଯ୍ୟନ୍ତ ଆଠ ଦିନ ଧରି ଚାଲିବ କଟକର ଐତିହାସିକ ବାଲିଯାତ୍ରା । ଚଳିତବର୍ଷ ମହାନଦୀ ପଠାର ଉପର ଓ ତଳ ପଡ଼ିଆରେ ଆୟୋଜିତ ହେବ ବାଲିଯାତ୍ରା । ଉଦଘାଟନୀ ଉତ୍ସବରେ ରାଷ୍ଟ୍ରପତିଙ୍କ ସହ ରାଜ୍ୟପାଳ ଓ ମୁଖ୍ୟମନ୍ତ୍ରୀ ମଧ୍ୟ ଉପସ୍ଥିତ ରହିବାର କାର୍ଯ୍ୟକ୍ରମ ରହିଛି ।