Bali Jatra 2026 / ବାଲିଯାତ୍ରା ପାଇଁ ଆରମ୍ଭ ହୋଇଗଲାଣି ପ୍ରସ୍ତୁତି; କୋଳାହଳରେ ଫାଟି ପଡିବ ମହାନଦୀକୂଳ

କଟକ: ଆସନ୍ତା ନଭେମ୍ବର ୨୪ ତାରିଖରୁ ଆରମ୍ଭ ହେବାକୁ ଯାଉଛି ଐତିହାସିକ କଟକ ବାଲିଯାତ୍ରା । ଏଥିପାଇଁ ଉଭୟ ତଳ ଓ ଉପର ପଡ଼ିଆରେ ଆରମ୍ଭ ହେଲାଣି ପ୍ରସ୍ତୁତି । ରାସ୍ତାଘାଟ, ବିଦ୍ୟୁତିକରଣଠାରୁ ଆରମ୍ଭ କରି 'କଟକ ଇନ୍ କଟକ' ଓ ଓରମାସ ଷ୍ଟଲର କାମ ଆରମ୍ଭ ହୋଇଗଲାଣି । ବାଲିଯାତ୍ରାର ଅନ୍ୟତମ ଆକର୍ଷଣ ହେଉଛି କଟକ ଇନ୍ କଟକ ପାଭିଲିଅନ । ତେବେ ଚଳିତ ବର୍ଷ ଉଭୟ ଜିଲ୍ଲା ପ୍ରଶାସନ ଓ ମହାନଗର ନିଗମ ପକ୍ଷରୁ ୨ଟି ଥିମକୁ ନେଇ ପ୍ରସ୍ତୁତ ହେବ ପାଭିଲିଅନ ।

କଟକ ବାଲିଯାତ୍ରା ହେଉଛି ଏସିଆ ମହାଦେଶର ସର୍ଵବୃହତ ମୁକ୍ତାକାଶ ବାଣିଜ୍ୟିକ ମହାକୁମ୍ଭ । ଆଉ କିଛି ଦିନ ପରେ ଲକ୍ଷାଧିକ ଲୋକଙ୍କ ଗହଳି ଏବଂ କୋଳାହଳରେ ଫାଟି ପଡ଼ିବ ମହାନଦୀ କୂଳ । ଏଥର ମେଳାକୁ ସୁବ୍ୟବସ୍ଥିତ କରିବାକୁ ଜିଲ୍ଲା ପ୍ରଶାସନ, କଟକ ମହାନଗର ନିଗମ (କେଏମସି) ଅନେକ ନୂଆ ଯୋଜନା କରିଥିବାବେଳେ ଉଭୟ ତଳ ଓ ଉପର ପଡ଼ିଆରେ ଆରମ୍ଭ ହୋଇଗଲାଣି ଜୋରସୋର ପ୍ରସ୍ତୁତି । ଉଭୟ ତଳ ଓ ଉପର ପଡ଼ିଆରେ ବିଦ୍ୟୁତିକରଣ କାମ ଦ୍ରୁତ ଗତିରେ ଚାଲିଛି । ଖୁଣ୍ଟଗୁଡିକରେ କେବୁଲ ଟଣା କାମ ଦ୍ରୁତ ଗତିରେ ଚାଲିଛି । ଯଥାସମୟରେ ସମସ୍ତ ପ୍ରସ୍ତୁତି କାର୍ଯ୍ୟ ସାରିବାକୁ ଲକ୍ଷ୍ୟ ରହିଛି । 

• ସୁରକ୍ଷା ବ୍ୟବସ୍ଥାକୁ ଗୁରୁତ୍ଵ

ବାଲିଯାତ୍ରାରେ ଲୋକଙ୍କ ସୁରକ୍ଷା ଓ ବିଦ୍ୟୁତ ବିଭ୍ରାଟ କିପରି ନ ହେବ ସେଥିପାଇଁ ସମସ୍ତ ବ୍ୟବସ୍ଥା ଗ୍ରହଣ କରିଛି ବିଭାଗ । ତେବେ ଆସନ୍ତା ୨୦ ତାରିଖ ସୁଦ୍ଧା ଉଭୟ ଉପର ଓ ତଳ ପଡ଼ିଆ ବିଦ୍ୟୁତିକରଣ କାମ ଶେଷ କରାଯିବାକୁ ଲକ୍ଷ୍ୟ ରଖିଛି ବିଦ୍ୟୁତ ବିଭାଗ । ବାଲିଯାତ୍ରାର ଅନ୍ୟତମ ଆକର୍ଷଣ କଟକ ଇନ୍ କଟକରେ ବି ପ୍ରସ୍ତୁତି ଆରମ୍ଭ ହୋଇଛି । ଉଭୟ ଜିଲ୍ଲା ପ୍ରଶାସନ ଓ ମହାନଗର ନିଗମ ପକ୍ଷରୁ ୨ଟି ଥିମରେ ଆକର୍ଷଣୀୟ ପାଭିଲିଅନ ସ୍ଥାନ ପାଇବ ।

ପଢନ୍ତୁ ଏହି ଖବର: ଦୀପାବଳିରେ ପାଗ କେମିତି ରହିବ ? ଖରା ହେବ ନା ବର୍ଷା ଜାଣନ୍ତୁ

• ନଭେମ୍ବର ୨ରୁ ପ୍ଲଟ ଅକ୍ସନ ପ୍ରକ୍ରିୟା ଆରମ୍ଭ ହୋଇଯାଇଛି

ଖାସ କରି KMCର ୧୫୦ ବର୍ଷ ପୂର୍ତ୍ତି ଅବସରରେ "ନିଜର ଦେଢ଼ ଶହ ବର୍ଷର ଯାତ୍ରାକୁ ବଖାଣିବା ସହ ପୁରୁଣା କଟକରୁ ଆଧୁନିକ କଟକ" ଯାଏ ପ୍ରଦର୍ଶନୀ କଟକ ଇନ୍ କଟକରେ ସ୍ଥାନ ପାଇବ ବୋଲି ମେୟର କହିଛନ୍ତି । ନଭେମ୍ବର ୨ରୁ ପ୍ଲଟ ଅକ୍ସନ ପ୍ରକ୍ରିୟା ଆରମ୍ଭ ହୋଇଥିବା ବେଳେ ମାର୍କିଂ ପାଇଁ ପଡ଼ିଆରେ ଚୂନ ପକାଇବା କାମ ବି ଜିଲ୍ଲା ପ୍ରଶାସନ ଆରମ୍ଭ କରିଦେଇଛି ।