Diwali Weather Odisha / ଦୀପାବଳିରେ ପାଗ କେମିତି ରହିବ ? ଖରା ହେବ ନା ବର୍ଷା ଜାଣନ୍ତୁ

ଭୁବନେଶ୍ଵର: ଆସୁଛି ଆଲୋକର ପର୍ବ ଦୀପାବଳି । ରଙ୍ଗୀନ ଝଲମଲ ଆଲୋକରେ ଆଲୋକିତ ହେବ ଚତୁର୍ଦ୍ଦିଗ । ଏଥର ରବିବାର ଦୀପାବଳି ପାଳନ ହେବ । ତେବେ ଦୀପାବଳିରେ ରାଜ୍ୟରେ କେମିତି ରହିବ ପାଗ ? ଖରା ହେବ ନା ବର୍ଷା ତାକୁ ନେଇ ଲୋକଙ୍କ ମନରେ ପ୍ରଶ୍ନ ଉଠିଛି । ତେବେ ରାଜ୍ୟରେ ଦୀପାବଳିରେ ଅଧିକାଂଶ ସ୍ଥାନରେ ଶୁଖିଲା ପାଗ ରହିବ । କିଛି ଜିଲ୍ଲାରେ ବର୍ଷା ହେବାର ସମ୍ଭାବନା ଥିବା ପାଣିପାଗ ବିଭାଗ ପକ୍ଷରୁ ସୂଚନା ମିଳିଛି ।

ଦୀପାବଳି ଦିନ ରାଜ୍ୟରେ କୌଣସି ବଡ଼ ପାଣିପାଗ ସିଷ୍ଟମର ପ୍ରଭାବ ନାହିଁ । ଆଗାମୀ ୨୪ ଘଣ୍ଟାରେ ମାଲକାନଗିରି, କୋରାପୁଟ, ଗଞ୍ଜାମ, ଗଜପତି ଓ ରାୟଗଡ଼ା ଜିଲ୍ଲାର କିଛି ସ୍ଥାନରେ ବିଜୁଳି ଘଡ଼ଘଡ଼ି ବର୍ଷା ହୋଇପାରେ । ଘଣ୍ଟା ପ୍ରତି ୩୦ରୁ ୪୦ କିଲୋମିଟର ବେଗରେ ପବନ ବହିପାରେ । ଅନ୍ୟ ଅଞ୍ଚଳରେ ପାଗ ଶୁଖିଲା ଓ ଅନୁକୂଳ ରହିବା ଆକଳନ କରାଯାଇଛି । ନଭେମ୍ବର ୮ ଓ ୯ ତାରିଖରେ ସମଗ୍ର ରାଜ୍ୟରେ ପାଗ ଶୁଖିଲା ରହିବ । ୧୦ ଓ ୧୧ ତାରିଖରେ କେନ୍ଦ୍ରାପଡ଼ା, କେନ୍ଦୁଝର ଓ ବାଲେଶ୍ୱର ସମେତ କେତେକ ଜିଲ୍ଲାରେ ହାଲୁକାରୁ ମଧ୍ୟମ ଧରଣର ବର୍ଷା ସମ୍ଭାବନା ରହିଛି ।

• ଏଣିକି ଖସିବ ରାତି ତାପମାତ୍ରା

ଏହାସହ ଆଗାମୀ ୪ରୁ ୫ ଦିନ ମଧ୍ୟରେ ରାତିର ତାପମାତ୍ରା ୨ରୁ ୪ ଡିଗ୍ରୀ ସେଲ୍‌ସିୟସ୍ ହ୍ରାସ ପାଇପାରେ । ଆକାଶ ମେଘମୁକ୍ତ ରହିବା ଯୋଗୁଁ ରାତିରେ ତାପମାତ୍ରା କମିବା ସହ ରାଜ୍ୟରେ ଧୀରେ ଧୀରେ ଶୀତର ଅନୁଭୂତି ବଢ଼ିବା ସମ୍ଭାବନା ରହିଛି ବୋଲି ଭୁବନେଶ୍ଵର ଆଞ୍ଚଳିକ ପାଣିପାଗ କେନ୍ଦ୍ରର ବୈଜ୍ଞାନିକ ସଞ୍ଜୀବ ଦ୍ଵିବେଦୀ ସୂଚନା ଦେଇଛନ୍ତି । ବର୍ତ୍ତମାନ ପର୍ଯ୍ୟନ୍ତ ରାଜ୍ୟରେ ସେତେଟା ଶୀତ ହେଉନାହିଁ । କାର୍ତ୍ତିକ ମାସ ଚାଲିଥିବାବେଳେ ରାଜ୍ୟବାସୀ ଏଯାବତ ଶୀତ ଅନୁଭବ କରିନାହାନ୍ତି । 

ପଢନ୍ତୁ ଏହି ଖବର: ବଙ୍ଗୋପସାଗରରେ ପୁଣି ଲଘୁଚାପ ସମ୍ଭାବନା, ୧୩ରେ ନେଇପାରେ ଘୂର୍ଣ୍ଣିବଳୟର ରୂପ!

• ଗତ ୨୪ଘଣ୍ଟାରେ ଧାରାକୋଟରେ ସର୍ବାଧିକ ବର୍ଷା ରେକର୍ଡ

ଏପଟେ ଗତ ୨୪ ଘଣ୍ଟା ମଧ୍ୟରେ ରାଜ୍ୟରେ ବର୍ଷାର ପରିମାଣ ସୀମିତ ରହିଛି । ଗଞ୍ଜାମ ଜିଲ୍ଲାର ଧାରାକୋଟରେ ସର୍ବାଧିକ ୪୬ ମିଲିମିଟର ବର୍ଷା ରେକର୍ଡ ହୋଇଛି । ନୟାଗଡ଼ରେ ସର୍ବାଧିକ ୩୩ ଡିଗ୍ରୀ ସେଲ୍‌ସିୟସ୍ ରେକର୍ଡ ହୋଇଥିବା ବେଳେ ପାରଳାଖେମୁଣ୍ଡି ଓ ଦେବଗଡ଼ରେ ସର୍ବନିମ୍ନ ୧୭.୮ ଡିଗ୍ରୀ ଏବଂ ସିମିଳିଗୁଡ଼ାରେ ୧୭.୫ ଡିଗ୍ରୀ ସେଲ୍‌ସିୟସ୍ ରହିଛି । ରାଜଧାନୀ ଭୁବନେଶ୍ୱରରେ ସର୍ବୋଚ୍ଚ ତାପମାତ୍ରା ୩୨ ଡିଗ୍ରୀ ଓ କଟକରେ ୩୦.୪ ଓ ୨୧.୨ ଡିଗ୍ରୀ ସେଲ୍‌ସିୟସ୍ ରହିଛି । ଦାରିଙ୍ଗବାଡ଼ିରେ ୧୮ ଡିଗ୍ରୀ ସେଲସିୟସ ତାପମାତ୍ରା ରେକର୍ଡ ହୋଇଛି ।